Inshila sha Kulundulwilamo Ubutumikishi Bwenu
1 Ukucila pa myaka 40 iyapitapo, icipande icaleti “Bushe Mulebomba Ukufika Apo Mwingapesha?” cali muli Watchtower uwa January 15, 1955. Mu kutemwa calumbwile ifyo abantu ba kwa Yehova bengawamya imibombele yabo mu butumikishi pa kuti bengalundulula umulimo wabo uwa Bufumu. Na lelo ilya mitubululo isuma ilabomba, ilintu tuletwalilila ukuwamyako imibombele yesu.
2 Icilingile ukutukunta ukubombo mulimo wesu onse lifunde likalamba ilitila: “Uletemwa Sokulu Lesa obe ku mutima obe onse, na ku mweo obe onse, na ku mano yobe yonse, na ku maka yobe yonse.” (Marko 12:30) Ukupitila mu kubomfya bwino amashuko ya kulundulula umulimo wa Bufumu tulalango kuti twalitemwisha Yehova. Bebeteni inshila shakonkapo mwingalundulwilamo ubutumikishi bwenu.
3 Ikatisheni Umulimo Wenu: Bamunyina abaipeela kuti batukuta ukufikapo ku kuba ababomfi batumikila kabili lyene ukulunduluka ku kuba baeluda. Icipande icaleti “Bushe Uletinamina?” ne caleti “Bushe Walifikapo ku Kubomba?,” mu Ulupungu lwa kwa Kalinda ulwa September 1, 1990, fyalikoselesha bamunyina abengi ukuipeelesha ukubomba mu milimo ya cilonganino. Ipusheni baeluda ba pa mwenu bamupandeko amano pa fyo mwingatinamina no kufikapo.
4 Baeluda na babomfi batumikila abashimbe bafwile ukutontonkanyapo sana pa lwa Isukulu lya Kukansha Ilya Butumikishi. Kuti mwaishibapo fimo pali ili sukulu nga mwabelenga ifya kuloshako ifyaba pa mutwe wa kuti “Ministerial Training School” mu fisontelelo fya Watch Tower Publications Index ifya 1986-1995, 1996, na 1997. Bushe namumona ukuti ‘umwinshi ukulamba uwa mulimo’ nawisukila imwe? (1 Kor. 16:9a) Bamunyina abengi abaingilamo, tabaishibe ukuti mukafumamo amashuko ya mulimo. Ilelo baleipakisha ukubomba pa Bethel nelyo ni bapainiya baibela, bamishonari, atemwa bakangalila ba miputule mwi bala muno Zambia.
5 Tinamineni Umulimo wa Nshita Yonse: Abacaice abalepwisha amasukulu, banamayanda, na bonse abapoka amapenshoni balingile ukutontonkanyapo sana pali bupainiya. Belengeni ica mu kati mu Ubutumikishi Bwesu Ubwa Bufumu ubwa February 1999, lyene landeni na bapainiya abapitile mu mibele iyapalana ne ya mu bumi bwenu. Nalimo kuti balenga na imwe ukulundululo butumikishi bwenu ukupitila muli bupainiya. (1 Kor. 11:1) Bushe kuti mwalundulula umulimo wenu ukufika ku maawala 70 cila mweshi no kwisaba painiya wa nshita yonse?
6 Pali nomba bamunyina na bankashi ababomba mu maofeshi ya Sosaite na pa Bethel mwi sonde lyonse balicila pali 17,000. Icitabo ca Abateyanishiwa ibula 116 cilanda pa mulimo wa pa Bethel. Mulandu nshi tamwingabelengela ici citabo no kumona nga kuti mwafikapo ukubombako uyu mulimo waibela uwa pa Bethel?
7 Kabombeni Ukuli Ukubulisha Kukalamba: Bushe uko mwikala icifulo ca kubombelamo cilashimikilwamo libili libili atemwa kwaliba bamunyina abengi aba kushimikilamo? Bushe mwalitontonkanyapo pa lwa kulundulula ubutumikishi bwenu ukupitila mu kukuukila ukuli ukubulisha kukalamba? Nalimo kuti mwakuukila ku mushi wa mupepi ukulekabilwa ababomfi abengi. (Mat. 9:37, 38) Tamulingile ukucite ci ukwabula ukulingulula. Mulingile ukupepelapo. (Luka 14:28-30) Lanshanyeni imibele yenu na baeluda na kangalila wa muputule. Bakapelulula na imwe ukumona nampo nga kuti mwayako nomba nelyo kuti mwapekanya ukuyako limbi. Nga mulefwaya ukulembela Sosaite imwebe uko mwingakuukila, kalata wenu afwile ukutuminwa pamo na kalata uwasainwa na Komiti wa Mulimo uwa Cilonganino.
8 Wamyeniko Imibombele Yenu: Bonse kuti tuleibimbamo sana mu butumikishi ukupitila mu kuwamyako imibombele yesu mu mulimo wa mwi bala. Bushe mulaibimbamo mu mbali shonse isha mulimo, pamo ngo kushimikila kwa ku ng’anda ne ng’anda no kwa mu lyashi ukusanshako umulimo wa fipempu fya kubwelelamo no wa masambililo ya Baibolo? Nga mulatungulula isambililo, bushe kuti mwawamyako imisambilishishe yenu? Kuti cawama ukupituluka mu mitubululo ya ca mu kati ca Ubutumikishi Bwesu Ubwa Bufumu ubwa June 1996 iyo mwingabomfya ku kukoselesha abasambi benu ukulola ku kuipeela no lubatisho.
9 Icipandwa 9 mu citabo ca Abateyanishiwa ku Kupwilikisha Ubutumikishi Bwesu calilandapo sana pa lwa nshila sha kulundulwilamo no kuwamishamo ubutumikishi bwesu. Na kuba ifwe bonse tulingile ukufwaisha ukubombesha mu mulimo wa kwa Lesa. Mulandu nshi tamwingatontonkanishisha pa mabuyo yenu aya ku mupashi? Citeni nga fintu 1 Timote 4:15 akoselesha ati: “Ube no mute ku fintu ifi, ikala muli ifyo, ukuti ukulunduluka kobe kumoneke kuli bonse.”