Tanununa Icuma Cobe ica Mulimo wa Bufumu
1 Yesu apashenye isubilo lya Bufumu ku cuma caumo mutengo. (Mat. 13:44-46) Bushe twaba nga balya bantu ba mu filangililo fya kwa Yesu abashitishe ifikwatwa fyabo fyonse pa kushita icintu cimo ica mutengo wakatama? Nga ni fyo, tukapeela Ubufumu bwa kwa Lesa icifulo ca ntanshi, nelyo cingati kuti casanshamo ukuipusula no kuikaana.—Mat. 6:19-22.
2 Apantu umulimo wesu uwa Bufumu waba cuma, tulingile ukufwaya ukutanununa wene. Cinshi cintu inshila ya bumi bwa pa lwesu ilangisha? Bushe tuletanununa imibombele yesu iya Bufumu? Kuti twacite fyo pa kwakana mu mbali shalekanalekana isha butumikishi, ukusanshako umulimo wa ku ŋanda ne ŋanda, ukucite fipempu fya kubwelelamo, ukutungulula amasambililo ya Baibolo, no kucitilo bunte bwa mu lyashi.
3 ‘Ni Shani Fintu Ningatanununa Ukwakanamo Kwandi?’ Mu kuba no kutampa kwa mwaka wa mulimo uupya, cili bwino kuli umo na umo ukupituluka mu mibombele ya pa lwakwe ku kumona cintu pambi engacita pa kwingilishako inshita ipooswa mu butumikishi bwa mwi bala no kuipusha ati: ‘Bushe kuti natantika imibombele yandi pa kuti ningalembesha pamo nga painiya wa kwafwilisha ukufuma ku nshita ne nshita nelyo fye mu kutwalilila? Mu kuba no kuteulula kunono, bushe kuti naingila mu mulimo wa bupainiya bwa nshita yonse?’ Bapainiya bapya abatendeka pa September 1 bakafikapo ukusangwa kwi Sukulu lya Mulimo wa Bupainiya umwaka ukonkelepo.
4 Bakasabankanya bamo balimikako ubuyo bwa pa lwabo ku kucita ubunte bwa mu lyashi ubwafulilako. Ilingi line iyi mibombele ilaletako ifisabo fyawamisha. Bambi kuti pambi bayumfwa ukukabila kwa kuwamyako mu kucite fipempu fya kubwelelamo ifyafumamo cimo nelyo ukutampa amasambililo ya Baibolo ayapya.
5 Nga ca kuti twasondwelela ifyo ubutumikishi bwesu buli ubwapelela mu nshila imo, cinshi twingacita ku kutanununa bwene? Abo abatunguluka mu kukumanisha amabuyo yasumbukako batasha ukuti intanshi tube no mupampamina wa kubika amabuseko ya Bufumu pa ntanshi nangu cibe shani. (Mat. 6:33) Icitetekelo no kushintilila kwakumanina pali Yehova filakabilwa. (2 Kor. 4:7) Fwaya ukwaafwa kwakwe ukupitila mwi pepo lyafumaluka kabili ilya mukoosha. (Luka 11:8, 9) Kuti twaba abacetekela ukuti Yehova akapaala ukubombesha kwesu ukwa cine cine ku kwingilishako ukwakanamo kwesu mu mulimo wakwe.—1 Yoh. 5:14.
6 Landa kuli bamunyina bambi na bankashi abatanununa ubutumikishi bwabo mu kutunguluka. Bepushe fintu baali na maka ya kucimfya ifipindami ukwabula ukufuupulwa. Ifya kukumanya fya pa lwabo kuti fyaba fye e filekabilwa ku kukushinina ukuti ubutumikishi bwatanununwa kuti bwafikwapo.
7 Lintu ulebelenga ifipande mu Ulupungu lwa kwa Kalinda nelyo Ubutumikishi Bwesu Ubwa Bufumu ifilebomba no mulimo wa mwi bala, mu kubamo ipepo languluka fintu wingabomfya imitubululo ku butumikishi bobe. Cita cimo cine lintu ulesangwa ku kulongana kwa cilonganino nelyo ukulongana kukalamba. Imitubululo ipeelwe muli cino cipande ishimpilwe pa kulanshanya ukwali lubali lwa programu wa kulongana kwa muputule ukwa mwaka wapwa. Cili e ca kubalilapo ica kukonkana kwa fipande ifipekanishiwilwe ku kutwaafwa ukufishapo no kubomfya ukukoselesha ukwapayanishiwe na ulya programu.
8 Yesu aali uwasakamanishisha mu butumikishi bwakwe, ukubulenga ukuba ukwangwako kukalamba. Abilishe ukuti: “Ica kulya candi kucito kufwaya kwa wantumine.” (Yoh. 4:34) Bushe tulayumfwa mu nshila imo ine? Nga ca kuti e fyo tuyumfwa, mu kushininkisha tukafwaya ukwakana “icisuma” na bambi pa kupoosa amaawala ayacilile pali avareji wa mulimo wa mwi bala uwa lyonse uwa maawala 9 pali kasabankanya cila mweshi.—Mat. 12:35; Luka 6:45.