Tabaakwinda Ukucitilo Bunte
1 Ishina lyesu, Inte sha kwa Yehova, lilatwishibisha no kulondolola cintu tucita. Tucitilo bunte ku fya bulumba fya kwa Lesa wesu, Yehova. (Esa. 43:10, 12) Umo na umo afwile ukwakana mu kupeelo bu bunte nga ca kuti ali no kuba icilundwa ca cilonganino. Ukucitilo bunte kucitwa maka maka ukupitila mu butumikishi bwesu ubwa pa cintubwingi, ubusanshamo ukutandala ku ŋanda ne ŋanda, ukucita umulimo wa mu musebo, ukucite fipempu fya kubwelelamo, no kutungulula amasambililo ya Baibolo. Ifwe bonse tulacincishiwa mu kulungika ukutinamina ukwakanamo kwakumanina.—1 Kor. 15:58.
2 Ifilundwa fimo ifya cilonganino, nangu cibe fyo, balipeleshiwa mu bwingi bwa fyo bengacita. Ubulwele bwabipisha nelyo ukunakuka kuti fyabalenga ukukanaenda. Balupwa bakaanya kuti baimya ifipindami fikalamba. Uwacaice kuti pambi abindwa ku mufyashi uushasumina. Abantu bekala mu ncende shaba sheka ishabula imyendele kuti pambi bayumfwa abapindililwa. Insoni sha cifyalilwa kuti shalenga aba mwenso ukukwinda. Bakasabankanya bamo abaisanga abene muli iyi mibele nelyo imibele yapalako kuti pambi bayumfwa ukuti tabalefikapo nga Abena Kristu pa mulandu wa kuti cintu bali na maka ya kucita nacicepako pa co bambi balecita no kucepako pa co mu cituntulu bafwaya ukucita. Takuli umulandu uwa kucefesha ukubombesha kwabo. (Gal. 6:4) Kuti basanga icisansamushi mu kwishiba ukuti Yehova alatemunwa lintu bapeela apapelele amaka yabo mu mibele iili yonse baisangamo abene.—Luka 21:1-4.
3 Ukusanga Inshila ya Kwakaninamo: Ifya kukumanya ifingi fyalishimikwa ukulanga fintu abantu umo umo mu mibele yaafya bashasuminisha ifipindami ukubacilikila ku kucitilo bunte. Ukubomfya ukuitendekelako kwabo, balisangako inshila shalekanalekana ishingi isha kucitilamo ubunte bwa mu lyashi. Abo bashingasela pa ŋanda balibomfya lamya ku kwisula umwinshi ukalamba ku kucitilo bunte. Umutandashi uuli onse amonwa ngo wingaba kakutika. Nelyo cingati namayanda uwakwata ulupwa lukaanya te kuti pambi abe na maka ya kucitilo bunte mu ŋanda, alashukila utushita twa kulanda ku bena mupalamano nelyo bambi abo akumanya mu mibombele yakwe iya cila bushiku.
4 Uwacaice kuti pambi abindwa ukwakana mu kucitilo bunte kwa pa cintubwingi ku mufyashi ushasumina. Ukucila ukupokelela ico nge cipindami cishingacimfiwa, kuti pambi amona abanankwe ba mu kalasi na bakafundisha nge “cifulo ca kubombelamo” ica pa lwakwe no kuba na maka ya kupeela ubunte bushaiwamina kabili nakalimo nelyo fye ukutungulula amasambililo ya Baibolo. Abengi abekala mu fifulo fyaba fyeka baliba na maka ya kwakanamo ukupitila mu kulemba bakalata. Abo abaseshiwa no kupimpa kwa Bwina Kristu lyonse bakasanga inshila imo iya kusengaukilamo kuba ‘abashipilikita, kabili abashitwale fisabo mu kwishiba Shikulwifwe Yesu Kristu.’—2 Pet. 1:8.
5 Lintu caisa ku kwakanamo kwesu mu mulimo wa kucitilo bunte, Yehova alimikako icipimo calingana kuli bonse, ukucilumbula, ukuti tulingile ukuba aba “mutima onse.” (Kol. 3:23) Nangu ca kuti ubwingi bwa nshita tupoosa na cintu tupwilikisha fikapusanapusana, ukukuntwa kwa kutendekelako kumo kwine—ukutemwa kwa cine cine uko kufuma mu “mutima wa cishinka.” (1 Imila. 28:9; 1 Kor. 16:14) Nga ca kuti tulebomba ukufika apo twingapesha, tatwakabale atuba no mulandu wa kuyumfwila ukuti tulebulisha icitetekelo nelyo ukuti tuli filundwa fyabule ncito ifya cilonganino pa mulandu wa kuti icipimo cintu tuli na maka ya kucita cili icacepa. Ukupala Paulo, mu cishinka kuti twasoso kuti ‘tatwakwinda ukulondolola conse ica kwafwa, no kusambilisha abantu.’—Imil. 20:20.