Beni no Mukoosha wa “Kushimikisha Ubunte”
1, 2. Cinshi ico mwatemwa sana pa fyo Paulo alemona ukushimikila imbila nsuma, kabili ni shani twingapashanya ica kumwenako aimike ica “kushimikisha ubunte”?
1 Umutumwa Paulo ali kashimikila wa mbila nsuma uwapimpa, ‘uwaleshimikisha ubunte’ nangu ifintu fibe shani mu kupashanya Yesu na babomfi ba ku kale abengi aba busumino. Na lintu aali na bashilika balemulinda mu ng’anda, “bonse abaleisa kuli wene alebapokelela bwino, alebashimikila ubufumu bwa kwa Lesa no kusambilisha ifya kwa Shikulu Yesu Kristu ukwabulo mwenso nangu panono, kabili ukwabula ukuleshiwa.”—Imil. 28:16-31.
2 Na ifwe bene kuti twaba no mukoosha wa “kushimikisha ubunte” inshita fye yonse. Kuti twashimikila ku bantu tulekumanya pa lwendo ilyo tuleya kwi Bungano lya Citungu ilikwete umutwe uleti “Peeleni Lesa Ubukata” na lintu tuli mu ncende mubelele ibungano.—Imil. 28:23; Amalu.145:10-13.
3. Kuti twasengauka shani ukusangula ubunte bwa mu lyashi ukuba ubwa kushukila?
3 Bushe Bunte bwa Kushukila Nelyo Bunte bwa mu Lyashi? Bushe paliba ubupusano mwa? Ee. Ico mwashukila cicitika fye kuli cela mushuke nelyo ukwabula ipange, kwati fye caicitikila fye nelyo kwati tacacindama sana. Ifi te fyaba ubutumikishi bwesu. Nga filya cali kuli Paulo, ukupeela Lesa ubukata pa kushimikila cikankaala kuli ifwe, kabili tufwile twapangila limo ukushimikila apali ponse twingaba mu nyendo shesu luno lusuba. Lelo, inshila tulandilamo na bantu bambi kuti yalondololwa bwino ukuti ya mu lyashi—e kutila, iyabula ukupamfiwa, iya bucibusa, kwati muleambaula fye. Iyi mishimikilile ilafumamo ifisuma.
4. Cinshi calengele Paulo ukucitila ubunte pa ng’anda aleikala?
4 Ipekanyeni Ukucitila Ubunte: Paulo alelenga ukuti pabe ishuko lya kushimikila abantu bambi ilyo aalelindikwa mu ng’anda mu Roma. Ali-itendekele ukulaalika intungulushi sha baYuda ukwisa ku ng’anda uko aleikala. (Imil. 28:17) Nangu ca kuti mwali icilonganino ca Bwina Kristu mu Roma, Paulo aishileishiba ukuti abaYuda baleikala muli ulya musumba baishibe ifinono pa fyo Ubwina Kristu bwatendeke. (Imil. 28:22; Rom. 1:7) Takwindile “ukushimikisha ubunte” pa lwa kwa Yesu Kristu na pa Bufumu bwa kwa Lesa.
5, 6. Kuti twashukila mashuko nshi ayo twingashimikila mu lyashi, kabili kuti twaipekanya shani pa kuti tushimikile bwino?
5 Tontonkanyeni pa bantu bonse abo mwingakumanya pa lwendo abashaishiba bwino Inte sha kwa Yehova. Pambi te kuti beshibe no kuti tulasambilisha abantu Baibolo pa mayanda yabo ukwabula ukulipilisha. Mwipusumuna ishuko lya kushimikila ku bo mulekumanya pa lwendo, abaletuusha, abaleshita, abalelya pa matuuka bashitisha ifya kulya, abali mu ma basi, na bonse abashala. Pangileni limo ifyo mwingalanda pa kutendeka ukulanshanya no kucitila ubunte mu kwipifya. Napamo mu nshiku shileisa kuti mwabelesesha limo ukucitila ubunte bwa mu lyashi pa kushimikila ku bena mupalamano, ba lupwa, abo mubomba na bo, na bambi abo mwaishibana na bo.
6 Mufwile ukukwata impapulo sha kubomfya ilyo mulecitila ubunte bwa mu lyashi. Ni mpapulo nshi isho shine? Kuti mwabomfya trakiti itila Bushe Kuti Mwatemwa Ukwishiba na fimbi pali Baibolo? Balangeni amaparagrafu ya kubalilako 5, ayalanda pa co tufwile ukubelengela Baibolo. Balangeni apa kwipushisha isambililo lya Baibolo ilya mu ng’anda ilyabula ukulipilisha. Nga ca kuti uo mwasanga alefwaya ukusambilila, mushalikileni broshuwa ya Cintu Lesa Afwaya. Pa kuti muipekanishishe limo epali mwakumanya abalanda ululimi lumbi, sendeni akatabo ka Good News for All Nations. Pe bula 2 paba ubulondoloshi bwa fya kukabomfya mu kushimikila. Nga muli na motoka yenu, kuti mwasenda impapulo isho tubomfya lyonse isha kushiila abantu balefwaisha sana ukuumfwa ku bukombe bwa Bufumu.
7, 8. Kusoka nshi pa mimonekele ne misango uko tufwile ukumfwila ilyo tuli pa lwendo na pa nshita tuleleshe citendwe?
7 Angweni Ifyo Mulemoneka ne Misango Yenu: Tufwile ukushininkisha ukuti imisango yesu pamo ne fya kufwala tufwala ne misakwile tafilengele abantu ukutontonkanya ifyabipa pali ifwe nelyo ‘ukusosa ububi’ pa kuteyanya kwa kwa Yehova. (Imil. 28:22) Tufwile ukwangwa ku kucite fi te lintu fye tulesangwa pe bungano iyo, lelo na lintu tuli pa lwendo na lintu tuleleshe citendwe pa numa ya kulongana. Ulupungu lwa kwa Kalinda ulwa August 1, 2002, pe bula 18, paragrafu 14, lwatusokele ati: “Imifwalile yesu tailingile ukuba iya mataki, iyacishamo, iibimbula insuuna, nelyo ukufwala ifya lubeebeelu. Kabili, tufwile ukufwala imifwalile iilanga ukuti ‘tutiina Lesa.’ Ici catupeela ifya kutontonkanyapo, bushe te ifyo? Te kufwala fye bwino ilyo tulesangwa ku kulongana kwa cilonganino [nelyo ibungano] lyene ukuilekelesha pa nshita shimbi. Imimonekele yesu lyonse ifwile ukulanga ukuti twaba na katiina, iya mucinshi pantu twaba Abena Kristu kabili abatumikishi inshita yonse ubushiku na kasuba.”—1 Tim. 2:9, 10.
8 Tufwile ukufwala ifya kufwala ifiyene kabili ifya mucinshi. Nga ca kuti ifyo tumoneka ne misango yesu filangilila ukuti twalisumina muli Lesa, tatwakomfwe nsoni ukucitila ubunte bwa mu lyashi pa mulandu wa fyo tulemoneka.—1 Pet. 3:15.
9. Busuma nshi bwafumine mu kushimikila uko Paulo acitile mu Roma?
9 Mu Kucitila Ubunte bwa mu Lyashi Mulafuma Ifisuma: Imyaka ibili iyo Paulo aali mu cifungo pa ng’anda mu Roma, alimwene ubusuma bwafumine mu kubombesha mu kushimikila. Luka ashimika ati ‘bamo balesumina ifyalesoswa.’ (Imil. 28:24) Paulo umwine ashimike pa fisuma ifyafumine mu “kushimikisha ubunte” ilyo atile: “Ifyancitikiile fyalilundulula imbila nsuma ukucila ukucilikila yene, ica kuti ifikakilo fyandi nafishibikwa apabuuta muli Kristu ku Balinshi bonse aba kwa Kateeka na ku bashala bonse; kabili icinabwingi ca ba bwananyina muli Shikulu, pa kuicetekela pa mulandu wa fikakilo fyandi, nabacilapo kukosa ukulanda icebo ca kwa Lesa ukwabulo mwenso.”—Fil. 1:12-14.
10. Fisuma nshi ifyo umulume no mukashi baipakishe ulusuba lwapwile mu kushimikila?
10 Umulume no mukashi bacitile ubunte bwa mu lyashi ku mwanakashi uubomba mwi tuuka baliila ifya kulya mu lusuba lwa mwaka wapwile ilyo abepwishe pa mabaji ye bungano, pa numa ya kusangwa kwi bungano lya citungu, kabili mwafumine fisuma. Bamushimikile ifyali ibungano na pe subilo lyaba mu Baibolo ilya bantunse. Bamupeele trakiti itila Bushe Kuti Mwatemwa Ukwishiba na Fimbi Pali Baibolo? no kumulondolwela amapekanyo ye sambililo lya Baibolo ilyabulo kulipilisha. Umwanakashi atile alefwaya uwa kumutandalila, alembelepo ishina na keyala ku numa ya trakiti, kabili aebele uyu mulume no mukashi ukuti bapekanye. Fisuma nshi ifyo mwingaipakisha uno mwaka pa “kushimikisha ubunte”?
11. Mibele nshi tufwile ukulundulula pa kuti tushimikileko imbila nsuma luno lusuba pa “kushimikisha ubunte”?
11 Shimikisheni Imbila Nsuma Konse Fye: Elenganyeni insansa shakwete Paulo ilyo aumfwile ukuti Abena Kristu banankwe balepashanya ica kumwenako cakwe ica kuba abapimpa! Shi natubombeshe mu kushimikila imbila nsuma pa kucitila ubunte bwa mu lyashi pa fisumino twasuminamo ifya mu Baibolo ilyo tukalanonshiwa ne bungano lya citungu luno lusuba.
[Akabokoshi pe bula 3]
Impapulo Shifwaikwa pa Kucitila Ubunte bwa mu Lyashi
■ Bushe Kuti Mwatemwa Ukwishiba na Fimbi Pali Baibolo? (trakiti)
■ Cinshi Cintu Lesa Afwaya Kuli Ifwe? (broshuwa)
■ Good News for All Nations (akatabo)
■ Impapulo shimbi isho tubomfya sana
[Akabokoshi pe bula 4]
Mwibalaba!
Ukulaba bani? Bonse abalesekelela abasangilwe ku Cibukisho ca mfwa ya kwa Kristu nelyo ku lyashi lyaibela. Bushe twalibalaalika ukusangwa kwi bungano lya citungu ilya uno mwaka? Cilemoneka kwati abengi kuti basangwako, nga twaba ne cikuuku pa kubakoselesha. Ilyo baleipakisha ukubishanya kusuma pe bungano no kulongana ukukuula bumupashi, bakapalama kuli Yehova na ku kuteyanya kwakwe. Balaalikeni, no kumona ifyo cikaba. Bebeni fyonse ifyo balekabila ukwishiba, ukusanshako ne nshiku she bungano, ifya kwenda pa kuti bafike apa kulonganina, inshita ilyo kulongana kukalatendeka no kupwa, no kubashimikilako tumo tumo utukaba ku kulongana ukubomfya ifyalembwa ku numa ya Loleni! wa July-September, 2003.