Lumbanyeni Yehova Ukupitila mu Kushimikila Ubunte bwa mu Lyashi
1 Ababomfi ba kwa Yehova aba cishinka bafwaya amashuko ya kumulumbanya cila bushiku. (Amalu. 96:2, 3; Heb. 13:15) Inshila imo twingacitilamo ici kushimikila ubunte bwa mu lyashi. Bakapepa ba kwa Yehova abengi lelo balatasha pantu umuntu umo abebele ubukombe bwa Bufumu ukupitila mu bunte bwa mu lyashi.
2 Ukushimikila ubunte bwa mu lyashi ku muntu umo ilingi line cilenga na bambi baumfwako ubukombe bwa Bufumu. Ku ca kumwenako, ilyo Yesu alanshenye no mwanakashi umwina Samaria pa cishima ca kwa Yakobo, icatumbwikemo ca kuti abengi balefwaya ukumfwako imbila nsuma. (Yoh. 4:6-30, 39-42) Ilyo Paulo na Sila bali mu cifungo mu Filipi, bashimikile kuli kalinda wa cifungo, kabili aba mu ng’anda ya ulya muntu bonse balipokelele icine.—Imil. 16:25-34.
3 Amashuko: Mashuko nshi mukwata aya kushimikila ubunte bwa mu lyashi? Bamo bacite fyo ilyo baleshita, ilyo bali muli basi nelyo mu myendele imbi iya cintubwingi, nelyo ilyo bali pa mulongo ku cipatala. Bamo bashimikila pa nshita ya kutuusha ku ncito atemwa ku sukulu. Ukubika fye ulupapulo lwesu ululanda pali Baibolo apalemoneka kuti kwalenga bambi ukwipusha ifyo twasuminamo.—1 Pet. 3:15.
4 Ifya Kutampa: Umukashana wa nsoni uwa myaka 7 aumfwile ku kulongana balelanda pa fyo cacindama ukushimikila ku bantu bonse. E ico ilyo baleya ku kushita fimo na banyina, abikile amabroshuwa yabili mu kacola kakwe. Ilyo banyina bali balelipila pa kaunta, uyu mukashana atambike broshuwa kuli namayo umo, na o alipokele. Ilyo bamwipwishe uko acifumya ubukose bwa kulanda na ulya namayo, uyu mukashana wa nsoni ayaswike ati: “Nacitila fye, Ipekanye, Ale, Kabiye! E fyo naciima no kuya!”
5 Pa kushimikila ubunte bwa mu lyashi, ifwe bonse tukabila ukuba ne mibele nge ya ulya mukashana munono. Cinshi cingatwafwa? Pepeleni ubukose bwa kuti mulande mu kushipa. (1 Tes. 2:2) Pekanyeniko icipusho mu mutima nelyo ica kulanda pa fintu ifyo abantu batemwa ukulandapo. Kuti mwabomfye co ku kutampa ukulanshanya. Lyene tetekeleni ukuti Yehova akapaala ukubombesha kwenu.—Luka 12:11, 12.
6 Ukushimikila ubunte bwa mu lyashi ku bantu tukumanya cila bushiku kuletela Yehova amalumbo no kutuletela ubuseko. Kuti kwayafwa umo ukuya mu nshila ya ku mweo wa muyayaya.