Tuli Nte Inshita Yonse
1. Finshi twingasambililako kuli filya Yesu ashimikile ku mwanakashi uwaishile pa cishima?
1 Yesu aali pa lwendo apo aendele ama-awala ayengi. Alinakile kabili ali ne cilaka. Ilyo abasambi bakwe baile ku kushita ifya kulya, aikele pa cishima ku nse ya musumba wa Samaria aletuusha. Yesu taile ku Samaria ku kushimikila, lelo alepita fye ukuya ku Galili pa kuti ayetwalilila ukushimikila kulya. Lelo ilyo aletuusha amwene umwanakashi uwaishile ku kutapa amenshi kabili atendeke ukumushimikila. (Yoh. 4:5-14) Mulandu nshi ashimikile kuli uyu mwanakashi? Yesu talekele ukuba “inte ya cishinka kabili iya cine” iya kwa Yehova. (Ukus. 3:14) Na ifwe tulacita filya fine Yesu alecita pa kuba Inte sha kwa Yehova inshita fye iili yonse.—1 Pet. 2:21.
2. Kuti twacita shani pa kutila tuleshimikila apali ponse?
2 Muleipekanya: Kuti twaipekanya ukulashimikila apali ponse nga tuli ne mpapulo. Bakasabankanya abengi balasenda amatrakiti konse uko bali kabili balapeela ababomba mu mashitolo, ababombela apo babikila amafuta muli bamotoka, na ku bantu bambi abo bakumanya. (Luk. Mil. 11:6) Nkashi uo ilingi line aba pa lwendo, lyonse alasenda Baibolo ne citabo ca Bushe Cinshi Baibolo Isambilisha? mu cola cakwe, kabili alatendeka ukulanshanya na bekele mupepi nankwe.
3. Kuti twatendeka shani ukulanshanya na bantu?
3 Tendekeni Ukulanshanya: Ilyo tuleshimikila ku bantu mu lyashi fye, tatulekabila bwangu bwangu ukulanda pali Baibolo. Ilyo Yesu alelanda no mwanakashi pa cishima tabalilepo ukuilondolola ukuti ni Mesia. Ico acitile fye amulombele amenshi, ici calengele umwanakashi ukufwaya ukwishiba umulandu amulombeele amenshi. (Yoh. 4:7-9) Nkashi umo asangile ukuti ukucita filya fine Yesu acitile kulamwafwa ukutendeka ukulanshanya na bantu nga bamwipusha nga ca kutila alasefyako inshiku sha mwikalwe. Mu nshita ya kubeba ukuti ico ashisefeshako inshiku sha mwikalwe ni co ni Nte ya kwa Yehova, abeba fye ukuti, “Nshifwaya fye ukusefyako.” Ilingi line abamwipusha pa nshiku sha mwikalwe balafwaya ukwishiba umulandu tasefeshako, ne ci cilenga nkashi ukutendeka ukubashimikila.
4. Mulandu nshi Mateo 28:18-20 ilenga ukuti mube abacincila?
4 Nangu ca kutila Yesu alipwisha umulimo wakwe uwa kushimikila pano isonde, na nomba acili alibika amano ku mulimo wa kushimikila uo Inte sha kwa Yehova balebomba nga fintu na o abombele. (Mat. 28:18-20) Kanshi, na ifwe tulakonka Yesu uwaba icakumwenako cesu. Tuli Nte ababa abaiteyanya ukulanda pe subilo lyesu inshita fye iili yonse.—Heb. 10:23.