Bushe Mulafwaya Ukubombesha?
1 Yesu apashenye Ubufumu ku cuma ca mutengo. (Mat. 13:44-46) Umulimo wa kushimikila imbila nsuma ya Bufumu na o wine cuma ca mutengo. Uyu mulimo walinga twaucindika ukucila icintu conse mu mikalile yesu, nangu line tufwile ukuipusula pa kuti tubombeshe. (Mat. 6:19-21) Bushe mulafwaya ukubombesha mu mulimo wa Bufumu?
2 Tontonkanyeni Pali Fi Ifyacindama: Kuti twacitako ifintu fimo pa kuti tutanunune imibombele yesu mu butumikishi: (1) umupampamina wa kutangisha ifya Bufumu mu mikalile yesu (Mat. 6:33); (2) ukuba ne citetekelo no kushintilila pali Yehova (2 Kor. 4:1, 7); (3) ukulomba ukwafwa kwa kwa Lesa mwi pepo lya cishinka kabili ilya mukoosha (Luka 11:8-10); (4) ukucita umwabela amapepo yesu.—Yako. 2:14, 17.
3 Inshila sha Kulundulwilamo Ubutumikishi Bwesu: Bonse kuti twaimika ubuyo bwa kubalilapo fye ubwa kushimikilako lyonse cila mweshi mu butumikishi. Lelo bushe mwalitontonkanyapo pa kushukila amashuko yonse aya bunte bwa mu lyashi, ukubombesha pa kuti imilandile yenu pa kushimikila ileba iyalondoloka sana, ukupekanya bwino ifya kulanda ku fipempu fya kubwelelamo, no kwesha na maka yonse ukutungulula amasambililo ya Baibolo ayalunduluka? Bushe kuti mwakumanisha ukubombako bupainiya bwa kwaafwilisha nelyo ubwa nshita yonse nangu fye ukuyabombela ukuli ukukabila? Nga uli mwaume wabatishiwa, bushe kuti watinamina ukufikapo ukuba umubomfi utumikila nelyo eluda? (1 Tim. 3:1, 10) Bushe kuti walundulula ubutumikishi bobe pa kulembako formu wa mulimo wa pa Bethel nelyo uwa Isukulu lya Kukansha Ilya Butumikishi?—Luka 10:2.
4 Munyinefwe umo uwalebomba incito ya ku mubili kabili uwalepoosa ne nshita ikalamba ku fyangalo akoseleshiwe ukutendeka bupainiya bwa nshita yonse. Atendeke bupainiya bwa kwaafwilisha kabili ayalwile imibombele yakwe no kwingila mu butumikishi bwa nshita yonse. Inshita imbi asangilwe kwi Sukulu lya Kukansha ilya Butumikishi, ilyamwafwileko no kusambilila ifya kubomba umulimo abomba nomba uwa bukangalila bwa muputule. Alayumfwa bwino sana ukuti alikonkele ifyo bamukoseleshe, kabili alicetekela ukuti pali nomba ali ne nsansa pa fyo asalile ukubombesha mu mulimo wa Bufumu.
5 Yehova alapaala abaipeela ku kubomfiwa. (Esa. 6:8) Mwileka icintu nelyo cimo cimulenge ukufilwa ukulundulula ubutumikishi no kuipakisha umulimo usuma no kusekelela ifibako pa mulandu wa kubombesha.