Bushe Kuti Mwalundako Imibombele Yenu?
1. Cinshi icilekabilwa sana mu mulimo wa kushimikila, kabili mulandu nshi?
1 Ilyo Yesu amwene ukuti abantu abengi sana nabatemwa ukumfwa imbila nsuma ya Bufumu, aebele abasambi bakwe ‘ukulomba Umwine wa mulimo wa kulobolola ukuti atume ababomfi mu mulimo wakwe uwa kulobolola.’ (Mat. 9:37, 38) Apo umulimo wa kulobolola uli mupepi no kupwa, kanshi umulimo wesu naupamfya ukucila ifyo wali kale. E ico tufwile ukulapepa kuli Lesa pa kuti aletwafwa ukulabombesha mu mulimo wa kushimikila.—Yoh. 14:13, 14.
2. Bushe bamo bacita shani pa kwankula ku bwite bwa babomfi na bambi mu mulimo wa kushimikila?
2 Ico Tulingile Ukucita pa Kuti Tulebombesha: Pa mulandu wa kuti Yehova alatwafwa no kututungulula, calilenga abengi ukutendeka ukulabomba bupainiya. (Amalu. 26:2, 3; Fil. 4:6) Bamo balibombeshe ukupekanya bwino ifintu pa kuti babombeko bupainiya bwa kwafwilisha pa mweshi umo nelyo fye imyeshi iingi mu mwaka. Ukupekanya bwino ifintu kwalilenga ukuti balundeko imibombele yabo mu mulimo wa kushimikila. Insansa bakwete ilyo baalebomba bupainiya bwa kwafwilisha shalenga abengi ukutendeka ukubomba bupainiya bwa nshita yonse.—Imil. 20:35.
3. Nga ca kuti mwalibombelepo bupainiya kale, cinshi ico nalimo mwingatemwa ukucita?
3 Bushe Kuti Mwatendeka na Kabili Ukubomba Bupainiya?: Nga ca kuti ku nshiku sha ku numa mwalebomba bupainiya, mufwile mulebukisha ifisuma ifyo mwaleipakisha. Bushe mwalitontonkanyapo ukubombako bupainiya na kabili? Nalimo ubwafya ubwalengele ukuti muleke bupainiya nomba bwalipwa. Limbi nomba kuti mwabombako na kabili uyu mulimo wacindama.—1 Yoh. 5:14, 15.
4. Mulimo nshi uwacindama uo bonse tufwile ukubombako?
4 Umulimo wa kulobolola kale watampile kabili nomba line uli no kupwa. (Yoh. 4:35, 36) E ico bonse natuibebete ukumona umo twingaluka mu fyo tucita pa kuti tulebombesha mu mulimo wa kushimikila. Nomba nga ca kutila twasanga ukuti cayafya te kuti tucile pa fyo tubomba, bushe takuli fimbi ifyo twingacita pa kuti tuleshimikila bwino? (Marko 12:41-44) Ala balishuka abo imikalile yabo ilenga ukuti Yehova alebabomfya muli uyu mulimo wacindama!—Amalu. 110:3.