‘Abaiteyanya ku Kubombo Mulimo Onse Usuma’
1 Abantu ba kwa Yehova ilelo bakwata ica kulya ca ku mupashi icisuma icingi. (Esa. 25:6) Kwaliba ifya mu Malembo ifingi ifyo twingaipakisha ukupitila mwi sambililo lya pa lwesu, ilya lupwa, pa kulongana, pa kulongana kukalamba, na pa mabungano. Lelo bushe tulebomfya bwino ifi fyonse ku kufwaya ukuba ‘abapwililila, abaiteyanya ku kubombo mulimo onse usuma’?—2 Tim. 3:17.
2 Tontonkanyeni pa fya kulya fya ku mupashi tukwete mu mwaka wa 1998, uufikile na pa kati kale! Ukupitila mu kulongana kwa cila mulungu, tulesambilila ifishinka fikalamba fimo ifya mabuuku 23 aya Amalembo ya Bwina Kristu aya ciGriki, tulepituluka mu fyebo fisangwa mu citabo ca Amalembo Yonse, no kusambilila icitabo ca Ukupelulula. Na kabili tulepituluka mu ciputulwa cikalamba ica citabo ca Ukwishiba, mupepi ne citabo conse ica Insansa sha Lupwa, ne citabo conse ica Insansa. Mu kulundapo, tuleliishiwa na Ubutumikishi Bwesu Ubwa Bufumu ubuli 12, ifipande 52 ifye sambililo lya Ulupungu lwa kwa Kalinda, kabili amalyashi ya pa cintubwingi pa malyashi yalekanalekana aya Baibolo ayali mupepi na 52. Amaprogramu yasuma aya mabungano no kulongana kukalamba yalelundako kuli ifi fyonse. We fintu ubwingi ifya ku mupashi ifisuma ifyo batupayanishisha!
3 Muletasha Ifyo Yehova Apayanya: Pa kuti tunonkelemo mu kukumanina, tulekabila ukumfwikisha umulandu Yehova apayanishisha ifya ku mupashi ifingi umusango yu. Ukulya ifi fintu fisuma kukuula icitetekelo cesu no kukosha bucibusa bwesu na wene. (1 Tim. 4:6) Nangu cibe fyo, ica kulya ca ku mupashi tacipayanishiwa ukuti tukambishiwe fye. Citulenga ukushimikila icine kuli bambi no kutupangasha ku kucite co bwino pamo nga batumikishi ba mbila nsuma.—2 Tim. 4:5.
4 Twilekelesha ukukabila kwesu ukwa fya ku mupashi, lelo lyonse tulefuluka ukupayanya kusuma kabili ukwikusha lwa ku mupashi ukufuma pe tebulo lya kwa Yehova. (Mat. 5:3; 1 Pet. 2:2) Pa kuti tumwenemo mu kukumanina cifwaya ukupaatulako inshita ya fintu fyacindama ifya musango yu pamo nge sambililo lya pa lwesu ilya lyonse ne sambililo lya Baibolo ilya lupwa no kusangwa ku kulongana. (Efes. 5:15, 16) Ifilambu filenge nsansa ififuma mu kucite fyo fikaba mu kumfwana no kukoselesha kwapuutwamo uko Paulo alembeele Abena Kristu abaHebere aba busumino, nga fintu calembwa pa AbaHebere 13:20, 21.