Bushe Muleinonsha mwe Bene?
1 Abantu na bantu ndakai balefwaya ukwishiba ifya kupwisha amafya ne fya kwikala aba nsansa. Basokota mu fitabo fifunda pa lwa mikalile no kuya ku tubungwe twa kubapanda amano pa fya kuwamyako imikalile yabo. Napamo bamo kuti balanda fimo ifisuma basangamo. Nalyo line, nga twalolesha pa mikalile ya bantu shino nshiku, bushe abengi abakonka ifyebo abantunse bafunda balasekelamo icine cine mu bwikalo bwabo? Nakalya!—1 Kor. 3:18-20.
2 Lelo Kabumba ena, alasambilisha bonse abengomfwa ifyebo fyawamisha ukwabula no kubalipilisha. Yehova afwaya umuntu onse ukusangamo ubusuma mu kusambilisha kwakwe. Apo ni kapekape, alitupeela Icebo cakwe icapuutwamo ku kutungulula abantunse mu bulungami. E walenga ne mbila nsuma ya Bufumu bwakwe ukubilwa mwi sonde lyonse. (Amalu. 19:7, 8; Mat. 24:14; 2 Tim. 3:16) Imikalile ya nsansa shine shine yalaala mu kupeepeka ku mafunde ya kwa Yehova.—Esa. 48:17, 18.
3 Ubutungulushi bwa kwa Yehova bwacila pa butungulushi bonse mu calo, ubwa mu fitabo fya bantu nelyo ubwa mu tubungwe twa bampanda mano. Kuti twayafwiwa icine cine no kusangamo ubusuma ubwingi nga twashukila ukupayanya kwa kwa Yehova nga filya fine kwaba mu Cebo cakwe ne fyo ukuteyanya kwakwe kusambilisha.—1 Pet. 3:10-12.
4 Sangenimo Ubusuma mu Kulongana kwa pa Cilonganino: Pali lelo, Yehova alanga ukuti alitupoosako amano cine cine ukupitila mu kutusambilisha inshila shakwe, kabili tulasangamo ubusuma mu kumfwila ukufunda kwakwe. Ukulongana kwesu kusano ukubako cila mulungu bushinino bwa kuti Yehova alitutemwa kabili alatusakamana. Ilyo tusangwa ku kulongana kwa pa cilonganino, tulalundako ukwishiba Lesa. Tusambilila ifya kuicingilila ku bubi ilyo tulepalama kuli Yehova. Ico cilenga imitima yesu ukucincishiwa.
5 Kwaliba na fimbi. Pa kulongana kwa pa cilonganino kuti ‘twakushe mitima.’ (2 Kor. 6:13) Ico calola mu kuti tufwile ukwishibana na bambi abo twaba na bo mu cilonganino. Tulamwenamo mu kukoseleshanya, nga filya umutumwa Paulo alembele muli kalata atumine ku bena Roma. (Rom. 1:11, 12) Ilyo alembeele abaHebere, ashimawile bamo nakalimo abatendeke ukulundulula umusango wa kupuswa ku kulongana kwa Bwina Kristu.—Heb. 10:24, 25.
6 Ukusekelela kwine kwine mu mikalile yesu kubako ilyo twapoosa amano ku banensu. Twakoseleshiwa ukufwayako fimo ifyo twingacita ku kusansamusha abanensu. Ukulongana kwesu ukwa Bwina Kristu kanshi, kwabelako ku kumwenamo kwesu no kwa banensu abo tupanga na bo bucibusa busuma. Tufwile ukucitapo fimo ukufuma ku mutima ifingakoselesha abanensu.
7 Umutumwa Paulo alandile pa mulandu umo wine pa kufunda Timote ilyo amulembeele ukuti: “Uitukushe ukuba na bukapepa.” (1 Tim. 4:7) Kuti twaipusha ukuti: ‘Bushe ndeitukusha? Bushe ndecitapo cimo ku kumwenamo mu fyo ng’umfwa ku kulongana kwa pa cilonganino?’ Kuti twatila tulecitapo cimo nga tulakutikisha ku filandwa ku kulongana no kwesha na maka ukukonka fintu tusambilila. Ukubomfya amenso yesu aya citetekelo, tufwile ukwiluka ukuti bamunyina balefunda, te fyebo fyabo balelanda, tufwile twamona Yehova ukuti e Kasambilisha Mukalamba uwa bantu bakwe.—Isa. 30:20.
8 Isukulu lya Butumikishi bwa Teokrasi no Kulongana kwa Mulimo: Uku kulongana kubili kwabelako ku kutwafwa ukuba abafikapo mu butumikishi bwa Bwina Kristu. Pali bufi nga kulongana kwe Sukulu lya Butumikishi bwa Teokrasi kwena e co fye kwabelako, pantu abasambi abalandako amalyashi muli ili sukulu balafundwa lyonse. Mukwata ishuko lya kulanga ukulunduluka kwenu ukufika ku kuba kalanda wa pa cintubwingi kabili kasambilisha wa Cebo ca kwa Lesa. Lelo pa kumwenamo icine cine mwi sukulu, mufwile ukulembesha, ukulasangwako, ukulandako amalyashi lyonse, no kulabikako sana amano pa kupekanya amalyashi. Ukupokelela no kukonka ifyo mwafundwa kukamwafwa ukulunduluka.
9 Ukulongana kwa Mulimo kutusambilisha ubucindami bwa butumikishi bwa Bwina Kristu kabili kutulanga ifya kubomba umulimo wa kupanga abasambi. Bushe imwe no lupwa lwenu mulamwenamo icine cine mu malyashi yalandwa muli uku kulongana kubili? Abena Kristu abaupana batila: “Mu Kulongana kwa Mulimo kumo twaumfwile ukuti tufwile ukubebeta ilembo lya bushiku pamo ngo lupwa. Kale tatwalebebeta, nomba twalitendeka ukucite co.” Bushe ulu lupwa lwamwenamo shani? Bailandila abene ukuti: “Twasanga ukuti ukulanshanya kubako pa nshita ya ca kulya kuba ukusuma. Nomba takuba ukuumana pa kulya.” Bushe na bana banono na bo bene balamwenamo mu kulongana? Ee. Nyina atila: “Ukwabula no kutwishika abana besu balasambilile fingi ku kulongana. Umulungu umo twaumfwile uko umwana wesu umwaume uwa myaka 6 alebepa. Lelo ulya wine mulungu, ilyashi lya kufunda ku kulongana lyalelanda pa kubepa. Insoni shalimwikete icibi, aloleshe bawishi no kukontama alaikataula fye ku cipuna. Apo pene alyumfwile kabili tatala abepapo na kabili.”
10 Nkashi painiya atile alatasha pa kuti imitubululo ilapeelwa mu Kulongana kwa Mulimo pa lwa kuwamyako ubutumikishi bwesu. Mulandu nshi? Atila: “Limo ntendeka ukumona kwati fya kulandalanda fye. Kwati nalimo imitubululo iba mu Ubutumikishi Bwesu Ubwa Bufumu te kuti ibombe. Lelo mu Kulongana kwa Mulimo, ilyo naumfwa bakoselesha ukuti tufwile ukweshako iyi mitubululo, ciba kwati basonkeleshako inkuni kabili ndacincishiwa ukubomfya imitubululo. Ilyo ncite co, ndaipakisha nga nshi ubutumikishi!” Pa milungu iingi alyesesheko ukukonka imitubululo imo pa fya kutendeka isambililo lya Baibolo pa kutandala kwa kubalilapo, asukile atendeka isambililo ilya pa kutandala kwa kubalilapo ku mukashana uwalepepela ubwafwilisho.
11 Ilyo mwaumfwa ilyashi limo lyalanda pa kufunda kwa mu Baibolo pa lwa kusalapo kumo ukwa pa lwenu, bushe muleluka ukuti ni Yehova alelanda na imwe mu kulungatika? Munyina umo e fyo aumfwile. Atile: “Nomba line pa kulongana kumo, kwali ilyashi limo kabili munyina alandile pa fya kusekesha fimo fimo ifisuma ne fyabipa ku Bena Kristu. Natemenwe ukutamba bakapoosa wa nkonya pa TV. Lelo ilyo naumfwile ili lyashi pali uku kulongana, namwene ukuti ici cangalo caba pa misango ya fya kusekesha fyabipa ku Bena Kristu. Kanshi nomba nalileka ukutamba.” Cine cine nangu line uyu munyina atemenwe ukutamba imbuli, aliicefeshe no kucitapo cimo pa kufunda kwa kwa Yehova.—Amalu. 11:5.
12 Ilyashi lya Cintubwingi, Isambililo lya Ulupungu lwa kwa Kalinda, ne Sambililo lya Citabo pa Cilonganino: Amalyashi ya cintubwingi yantu tumfwa cila mulungu yalanda pa masambililo yalekanalekana aya mu Baibolo. Cinshi musambililamo muli aya malyashi? Umulume umo Umwina Kristu alandile pa fyo asambililamo ukuti: “Kalanda umo uwa lyashi lya cintubwingi akomaile pa fisabo fya ku mupashi. Atile ifyo ena acita, pa kuti abombelepo pa kulundulula ifi fisabo, alasalapo icisabo cimo no kutendeka ukubombela pali co cine pa mulungu umo. Lilya umulungu wapwa, alekala pa nshi no kutontonkanya pa fyo abombele mu kulangisha ico cisabo mu micitile yakwe iya cila bushiku mu kati ka uyo mulungu. Lyena kuti abombela pa cisabo cimbi umulungu wakonkapo. Namwene ukuti uyo musango usuma sana kabili natendeke ukucita ifyo fine na ine.” Mwandi alibombelepo bwino pa fyo asambilile!
13 Isambililo lya Ulupungu lwa kwa Kalinda litusambilisha ukukonka ifishinte fya mu Baibolo mu mibele yalekanalekana iya mu bwikalo bwesu. Ifyebo fibamo fitwafwa ukuteka imitima te mulandu na masakamika ya mikalile. Ulupungu lwa kwa Kalinda lutwafwa no kwendela pamo ne cine icileya cilelunduluka. Ku ca kumwenako, bushe tatwamwenenemo mu masambililo ya Ulupungu lwa kwa Kalinda aya muli magazini wa May 1, 1999, ayaleti: “Ifi Fintu Fili No Kwisa,” “Uulebelenga Eluke,” ne lyaleti, “Beni Abalola Kabili Abapikintika!” Bushe aya masambililo yamukumine shani pa lwenu? Bushe imicitile yenu ilelanga ukuti mwalyumfwila ukusoka kwa kwa Yesu pa lwa fikacitika ku ntanshi? Bushe muleipekanya ku mesho yakesa ku ntanshi ilyo tukamona “ica muselu icipomona . . . naciminina umuntu mwashila”? (Mat. 24:15-22) Bushe ifyo mupanga ukucita ne fyo mucita mu mikalile yenu filanga ukuti ico mwapooseshako amano te kunonka ifyuma, lelo mwacindikisha ukushisha ishina lya kwa Yehova? Pe Sambililo lya Ulupungu lwa kwa Kalinda, bushe tatusambilila ku kumwenamo fwe bene pali lelo?
14 Tontonkanyeni pa fyo tusambilila cila mulungu pe Sambililo lya Citabo pa Cilonganino. Ndakai tulesambilila ibuuku lya mu Baibolo ilya kwa Daniele. Pa myeshi ine iyo tusambilileko ili buuku, bushe tatulemona icitetekelo cesu cilekoselako cila mulungu? Ukupala Daniele kasesema watemwikwa uwa kwa Yehova, tukosha icitetekelo cesu pa kuti tushipikishe.
15 Yehova Atusambilisha Ukwikala Abasekelela: Nga tuleumfwila amafunde ya kwa Lesa, tutaluka ku mafya ayengi. Ico na kuba citulenga ukwikala abasekelela. Ilyo tutungululwa na Yehova, tulabombako incito shimo mu mulimo wakwe, tatwikala fye tuletamba bambi ilyo balebomba. Na ka cine ababombela Lesa bantu ba nsansa.—1 Kor. 3:9; Yako. 1:25.
16 Ilyo muli ku kulongana kwa cilonganino, bikeniko amano no kutontonkanya pa fyo mukabomfya ifyebo muleumfwa pa kulongana kwa pa cilonganino. (Yoh. 13:17) Cincileni mu mulimo wa kwa Lesa, bombeni no mutima onse. Mwakulasekelela icine cine. Imikalile yenu ikawaminako kabili mukeshiba ukuti mubomba umulimo wacindama. Mwakulamwenamo ubusuma.