Ndefwaya Isambililo lya Baibolo!
1 Fwe bengi tufwaisha isambililo lya Baibolo. Umulimo wa kusambilisha Baibolo e ulengo kuti tulefikilisha ubuyo bwesu bwa kupanga abasambi abapya. (Mat. 28:19, 20) Lelo fwe bengi imyeshi napamo imyaka yalipitapo, ukwabula ukusondako ubuseko bwaibela ubufuma mu kusambilisha umuntu icine. Mu November tukacita shani pa kufwaya isambililo lya Baibolo? Apantu uno mweshi tuletambika icitabo ca Ukwishiba, kuti twabombesha ukucibomfya ku kutendeka amasambililo ya Baibolo ayapya.
2 Tantikeni Impela sha Mulungu Shimo Isha Kubombamo: Tulekoselesha bonse ukutantikako inshita uno mweshi iya kutontomesha pa kutendeka isambililo lya Baibolo ilipya. Bakatungulula ba Masambililo ya Citabo pa Cilonganino balingile ukusala impela sha mulungu ishingabomfiwa kuli uyu mulimo kabili lyene ukuteyanya amabumba yabo ukubombesha mu fipempu fya kubwelelamo.
3 Lyonse mulesenda ifyalembwa fyenu ifya fipempu fya kubwelelamo ku kukumana kwa mulimo wa mwi bala. Lyene mubweleleko kuli bonse abayankwileko bwino, abapokeleko ifitabo, nelyo abasangilweko ku kulongana. Imifwaile ya kubwelelako kutendeka isambililo.
4 Langilileni Ifya Kutungulula Isambililo lya Baibolo: Pa kukumana kumo ukwa mulimo wa mwi bala, kuti mwatantikako icilangililo icapekanishiwa bwino ica kulangilila ifya kutendeka isambililo pa cipempu ca kubwelelamo. Napamo kuti mwatila: “Abantu abengi balikwata Baibolo, lelo tabaishibo kuti e mwaba ifyasuko ku fipusho fyacindama ifyo tukumanya. [Mulangeni ibula lya filimo mu citabo ca Ukwishiba, kabili belengeni imitwe ya fipandwa 3, 5, 6, 8, na 9.] Ukubomfya ici citabo pe awala limo nelyo ukucilapo cila mulungu, kuti mwaishibe fingi muli Baibolo mu myeshi fye inono. Nalamulanga ifyo uyu programu abomba nga ca kuti pali iyi mitwe mwasalapo umo.” Nga ca kuti umuntu akaana ukusambilila pa mulandu wa kupamfiwa, mulondolweleni ukuti twalikwatako programu uwaipifiwa. Mulangeni broshuwa wa Cintu Lesa Afwaya, no kumutambika isambililo ilyaipifiwa ilya maminiti 15 nelyo 30 cila mulungu.
5 Nga ca kuti bonse capamo twabombesha mu kutendeka amasambililo no kupepela ipaalo lya kwa Yehova ukuba pa mulimo wesu, cine cine tukaba na masambililo ayapya! (1 Yoh. 5:14, 15) Nga mulefwaya isambililo lya Baibolo, ino e nshita iya kutendeka isambililo.