“Tekanyeni”
1 Ilyo tulemona impela ya ino micitile ikote iya fintu iya kwa Satana ilepalamina lubilo lubilo, cintu cacindama ‘ukutekanya’ pa kulolela ubushiku bwa kwa Yehova lintu tukalubulwa. Maka maka apo nomba inshita naipitingana, abalwani babipa tabalepeema ku kufwaya ukutupumbula ukufuma ku fikansa fyacindama ifya bumulopwe bwa kwa Yehova no kutusembeleka ukuti tulepumfyanishiwa ku kufwayafwaya ifintu fimbi ifya bukaitemwe. Muli iyi nshila, Satana kuti atubeleleka ku kuba aba muleele nelyo fye no kuleka umulimo wa kushimikila Ubufumu. (Yako. 5:7, 8; Mat. 24:13, 14) Ni nshila nshi twingalangilamo uku kutekanya ukulefwaikwa?
2 Pa Kuba Abashipikisha: Lintu tulesanga abashileangwako nelyo abaletusuusha ilyo tuleshimikila, ukushipikisha kukatwaafwa ukukonkanyapo fye ukushimikila. Tatwakafuupulwe fye apo pene nelyo ukufulwa lintu twasanga abantu abasasuka nelyo aba cipyu. (1 Pet. 2:23) Aya maka ya mu mutima yakatulenga ukutaluka ku milandile ya kufuupula pa lwa bantu baba mu cifulo tubombelamo abamoneka aba misuula nelyo aba cipyu ilyo tufwaya ukubashimikila, tufwile ukulaibukisha ukuti ukulanda kwa musango yo kukatufuupula kumo fye na bantu tubomba na bo mu butumikishi.
3 Pa Kuba Aba Mupampamina mu Kutekanya: Kuti twafuupulwa nga ca kuti twalanshanya fye bwino bwino no muntu mu mulimo wa mwi bala, lyene twanaka fye ukubwelelako te wa kumoneka libili. E fyo twingafuupulwa na lintu abo tusambilila na bo tabalelunduluka nelyo tabaleisa mu cine. Lelo kwena, umupampamina mu kutekanya ilingi line ulafumamo ifisuma. (Gal. 6:9) Nkashi alitandalile umukashana imiku iingi e lyo asukile atendeka isambililo lya Baibolo. Imiku ya kubalilapo isano intu atandele, umukashana aleba ne fya kucita fimbi ifishaifulila. Pa bulendo bwalenga 6, imfula ishaikulila yalokele nkashi icipesha mano, awe nalyo line ailesanga ulya mukashana talipo. Nangu line cali fyo, alipampamine pa kupeelako ishuko kuli ulya mukashana umuku fye na umbi umo, nkashi alibweleleko e pa kusanga umukashana naipekanya ku kusambilila. Ukufuma fye apo pene, ulya mukashana alilundulwike, kabili tapakokwele aliipeele na kuli Yehova.
4 Twalishiba ukuti ubushiku bwa kwa Yehova tabwakashimbe. Kanshi tulalolela imibombele yakwe, ukwishiba ukuti ukutekanya kwa bulesa kulatwala ifisabo fisuma. (Haba. 2:3; 2 Pet. 3:9-15) Tulingile ukutekanya nga fintu Yehova aba, tatufwile ukunenuka mu butumikishi. “Mu kutetekela na mu kutekanya,” shintilileni pali Yehova ku kumulambula pa kubombesha kwenu.—Heb. 6:10-12.