Balaalikeni Ukusangwako

¹ Ubwite bwabilishiwe imyanda ya myaka iyapitapo nomba buleumfwika mu fyalo 233. Bwite bwa kuti: “Endeni, natunine tuye ku lupili lwa kwa Yehova, . . . ukuti atulange imibele yakwe, no kuleka twende mu nshila shakwe.” (Esa. 2:3) Ukutungulula abantu ku kuteyanya kwa kwa Yehova e nshila imo iyawamisha iya kubaafwa ukulunduluka lwa ku mupashi uko kwingabatungulula ku mweo wa muyayaya.

² Bakasabankanya bamo kuti bashimunuka ukulaalika abantu ku Ng’anda ya Bufumu ukufikila balangisha ukuti balelundulukako eyefilya mwi sambililo lya Baibolo. Lelo inshita shimo abantu batendeka ukusangwa ku kulongana ilyo bashilakwata no wa kusambilila na bo. Tatulingile ukushingashinga ukulaalika abantu mu kucincimuka no kubakoselesha ukusangwa ku kulongana.

³ Ifya Kucita: Shukileni inshita iili yonse ukwebako abantu pa lwa kulongana kwesu ukwa pa cilonganino. Bebeni ukuti tatulipilisha pa kusangwako no kuti tatupishamo akabale ku kupoosamo indalama. Londololeni ifyo ukulongana kutungululwa. Londololeni ukuti kwaba kusambilila Baibolo no kuti tulakwata ifya kusambililamo pa lwesu pa kuti bonse tulekonkamo. Bebeniko ukuti abasangwako bantu abafuma ku ndupwa shalekanalekana ne nyendelo. Balondolweleni ukuti bantu bekala mu bwina mupalamano no kuti na bana na bo aba mishinku yonse kuti basangwako. Tufwile ukulaalikako amasambililo yesu, no kubaafwa mu nshila iili yonse ukuti bengasangwako.

⁴ Cimo ica fintu fya kulekelesha ifyalembwa mu Baibolo caba bwite bwa kunwako fintu Yehova apayanya ku bumi: “Umupashi na Nabwinga batila, Iseni . . . no uleumfwe cilaka ese, uulefwaya abuulepo ica bupe amenshi ya Mweo.” (Ukus. 22:17) Takwaba ico twingapyanika pa kulaalika bambi ku kulongana.

⁵ Mu kusesema, Esaya 60:8 alangilila abalumbanya Yehova abengi icine cine abaleisa mu filonganino fya bantu ba kwa Lesa nge nkunda ‘ukupupuka nge kumbi, nge nkunda ku miinshi ya shiko.’ Bonse kuti twalaalikako abapya ukusangwa ku kulongana no kubalenga bayumfwe fyo nabasengelwa. Nga twacite fi, tukalabombela pamo na Yehova ilyo alekalakasha umulimo wa kulonganya.—Esa. 60:22.