Tusambilishiwa na Yehova
1 Kuli amasomo nomba mu fyalo 233 ayaletungululwa na Lesa. Takwaba amasomo ya muli cino calo ayengalingana na aya. Kasambilisha wesu Umukalamba, Yehova, aletusambilisha ukuti tucenjele nomba e lyo no kuipekanishisha ku mweo wa muyayaya.—Esa. 30:20; 48:17.
2 Amasukulu ya Masomo ya Bulesa: Tontonkanyeni pa masukulu yaliko ino nshita ku kulenga abantu ba kwa Yehova ukucenjela. Isukulu lya Butumikishi bwa Teokrasi, ilitungululwa cila mulungu mu filonganino mupepi na 87,000, lilasambilisha amamilioni ya bakabilisha ba Bufumu ukuba abatumikishi basuma aba mbila nsuma. Bushe mwalilembesha? Bushe na imwe mwalisangwapo kwi Sukulu lya Mulimo wa Bupainiya ilya milungu ibili? Napamo ifi amaawala ya bapainiya yabweshiwako kuti calenga abengi ukubombako bupainiya no kufikapo ukusangwa kuli ili sukulu. Isukulu lya Kukansha Ilya Butumikishi, ilyabako mu ndimi shikalamba isha mwi sonde, lilakansha baeluda na babomfi batumikila abashimbe ukuti bengabomba imilimo yafulilako iya bulesa. Baeluda na babomfi batumikila balafundwa amasomo yaibela mu nshita mu nshita kwi Sukulu lya Butumikishi bwa Bufumu.
3 Ifikuulwa fya pa Watchtower Educational Center mu Patterson, ku New York, filebomfiwa ku masukulu yaibela yatatu ayapeela ukukansha kwalundwapo ukwa bulesa. Isukulu lya Baibolo Ilya Gileadi Ilya Watchtower ilya myeshi isano lilasambilisha abatumikishi ifya kubomba bumishonari mu fyalo fimbi. Ababa mu Makomiti ya Misambo ukufuma mu fyalo fyonse balasangwa kwi sukulu lya myeshi ibili ilisambilisha pa lwa kuteyanya kwa maofesi yanono aya Sosaite. Mu May 1999 isukulu lipya ilya myeshi ibili ilya bakangalila benda lyalitendeke na basambi 48 ukufuma mu United States na Canada. Kwi pele pele ababomfi ba kwa Yehova bonse balanonkelamo mu kusambilisha kwa kwa Yehova ukupitila mu masukulu yalekanalekana.
4 Mulandu Nshi Tusambilishiwilwa? Uwa mwi Bumba Litungulula umo atile: “Umulandu kwabela uku kusambilisha wa kuti abantu ba kwa Yehova mwi sonde lyonse bafike ku kukosoka ukwalondololwa pa Amapinda 1:1-4.” Shi Yehova natwalilile ukupeela ifwe umo umo “ululimi lwa basambilila.”—Esa. 50:4.