Bushe Mulolesha fye Ubuntu bwa ku Nse?
1 Ilyo tulebomba ubutumikishi bwesu ubwa ku cintubwingi, ica kubalilapo tutontonkanya pa muntu kuti catulenga ukushimunuka ukumushimikilako imbila nsuma. Ku ca kumwenako, kuti mwacita shani nga ca kuti umuntu ulemoneka umukali alemulolesha mu kutwishika ilyo muleya pa mwina mupalamano wakwe uulefwaya ukusambilila icine? Nkashi umo uo ici cacitikile apingwilepo ukubinga uyo muntu no kulanda nankwe. Asaswike fye pa kwasuka. Lelo ku ca kupapusha, alikutike ku fyebo fya mu Baibolo kabili alitemenwe nga nshi, kabili alisumine ukusambilila Baibolo. Pa mulandu wa kuti nkashi taloleshe fye ubuntu bwa ku nse, calengele uyu mwaume no mukashi wakwe ukusambilile cine.
2 Nkashi na umbi pa kubala aletiina umulumendo umo uwa cunsu lelo akoselepo fye ukumushimikila mu kwipifya lyonse nga aya kwi shitolo alebomba. Ukubombesha kwakwe kwaletele ifisuma, kabili uyu mulumendo nomba ni Nte yalibatishiwa. Cinshi cikalenga ukuti twilasuswa ukutontonkanya ukuti abantu ba musango yo tabakakutike?
3 Ukupashanya Ica Kumwenako ca kwa Yesu: Yesu alishibe fyo ali no kufwila bonse. E co talefuupulwa ku mimonekele ya buntu bwa ku nse. Alishibe ukuti nangu fye ni mpulumushi pambi kuti shafwaya ukwaluka nga shayafwiwa bwino no kucincishiwa. (Mat. 9:9-13) Alyeseshe ukwaafwa aba fyuma kumo na babusu. (Mat. 11:5; Marko 10:17-22) Shi twilapingula abantu tukumanya mu butumikishi pa kulolesha fye ubuntu bwa ku nse, muli fyo ukukanamona umutima uyo pambi uwingaba fye bwino. (Mat. 7:1; Yoh. 7:24) Cinshi cingatwafwa ukupashanya ica kumwenako ca kwa Yesu icapulamo?
4 Ukupitila mwi sambililo lyesu ilya Baibolo, twalitesekesha ukuti Icebo ca kwa Lesa calikwata amaka ya kwalula imitontonkanishishe ya muntu, imyendele, no buntu bwakwe. (Efes. 4:22-24; Heb. 4:12) Muli fyo, ifwe tufwile fye ukutontonkanya ukuti onse kuti akutika, no kushiila fimbi kuli Yehova, Uwishiba ifyaba imitima ya bantunse.—1 Sam. 16:7; Imil. 10:34, 35.
5 Lekeni kanshi twebeko abantu ba misango yonse imbila nsuma, te mulandu no buntu bwabo ubwa ku nse, pa kuti ico cilundeko ku kulobolola kukalamba ukwa muno nshiku sha kulekelesha.—1 Tim. 2:3, 4.