Amasomo ya ku Calo na Mabuyo Yenu aya ku Mupashi
1 Ukukwata amasomo yasuma ilyo ucili umwaice kuti kwakusambilisha ukukampuka no kulenga wishibe ukubelenga bwino no kulemba no kumfwikisha geography, history, insamushi, na sayansi. Na muli fyo, kuti wasambilila ukutontonkanya bwino, ukulingulula ifishinka, ukukalulula amafya, no kupingula na mano yasuma. Amasomo ya musango yo yakawamina ubumi bobe bonse. Bushe amasomo yobe aya ku calo yayampana shani na mabuyo yobe aya ku mupashi mu bumi kabili kuti yakwafwa shani ukunonka “amano no bupanda”?—Amapi. 3:21, 22.
2 Bo wa Mulimo mu Kubombela Lesa: Ilyo ucili pa sukulu, ulepoosa amano mu kalasi no kulemba bwino ifya ku sukulu. Nga waishibo kubelenga bwino no kusambilila, kuti cakwangukilako ukubebeta Icebo ca kwa Lesa kabili kuti waba uwakosa lwa ku mupashi. (Imil. 17:11) Ukwishiba ifingi kukakwafwa ukulanda na bantu abalekanalekana mu fikulilo, mu fintu batemwa, na mu fisumino, ilintu wabakumanya mu butumikishi. Amasomo usambilila ku sukulu yakakwafwa ukubomba bwino imilimo yobe iya Bwina Kristu mu kuteyanya kwa kwa Lesa.—Linganyeniko 2 Timote 2:21; 4:11.
3 Sambilila Ukuikalila: Nga wabombesha, na kabili kuti wasambililako imilimo imo imo iingakwafwa ukuikalila pa numa ya kupwishe sukulu. (Linganyeniko 1 Timote 5:8.) Sala bwino amasambililo yobe. Wisala amasambililo ayakalenga ukacule ukusange ncito, lelo tontonkanya pa lwa kusambilila ubutukushi nelyo umulimo uwingakwafwa ukusanga incito yalinga ukuli konse. (Amapi. 22:29) Ukusambilila kwa musango yo kukalenga ukaleikalila ilyo ukapingulapo ukubombela ukuli ukubulisha kukalamba.—Linganyeniko Imilimo 18:1-4.
4 Ukukwata amasomo yasuma ilyo ucili pa sukulu kuti kwakwafwa ukulundululo butumikishi bobe. Bombesha ku kusambililako imilimo imo imo pa kuti ukaleikalila ilintu ulelunduluka mu mulimo wa kwa Yehova. E ico amasomo yobe yakakwafwa ukufikilisha amabuyo yobe aya ku mupashi.