Bushe Umwinshi wa Kubombako Bupainiya Nomba Nawisuka Kuli Imwe?
1 Ilembo lya mwaka wa 1999 litucinkulako ukuti tucili mu “bushiku bwe pusukilo” ubwa kwa Yehova. (2 Kor. 6:2) Lelo ubushiku bwakwe ubwe pusukilo bwalapwa nomba line. Lyene ‘ubushiku bwakwe ubwa bupingushi’ bukatendeka. (2 Pet. 2:9) Ilintu Yehova aletwalililo kupeela abantunse ishuko lye pusukilo, mwandi tulacincimushiwa pa kumona fintu abantu abengi abalefulilako baleankulako!
2 Ilyo inshita tailapwa, abantu ba kwa Yehova baletukuta mu kushimikila ku baleankulako. Ici calilengo kuti bakasabankanya ba Bufumu abengi batendeko mulimo wa bupainiya. Bushe umwinshi wa kubombako bupainiya nomba nawisuka kuli imwe? Mulandu nshi twaipushisha?
3 Amashiwi ya Kutasha: Nga fintu cabilishiwe mu Ubutumikishi Bwesu Ubwa Bufumu ubwa January 1999, amaawala ayafwaikwa kuli bapainiya ba nshita yonse na ba kwafwilisha yalicefiwako. Pa kukumanisha amaawala ayalefwaikwa nomba, bapainiya ba nshita yonse bakabila ukubomba amaawala 70 mu butumikishi cila mweshi ukufika ku maawala yonse pamo 840 mu mwaka wa mulimo umo na umo. Bapainiya ba kwafwilisha bakalabomba amaawala 50 mu mulimo cila mweshi. Pano pali amashiwi yanono aya kutasha ukwingi ukwapokelelwe pa mulandu wa uku kuteuluka:
“Mwandi ici ca bupe icapaalwa icafuma kuli Shifwe wa mu muulu!”
“Takuli amashiwi ayengalondolola ubuseko, ukutemwa, no kutasha pali uku kupayanya!”
“Cikatwangukilako ukukonka ukutantika kwa mulimo wesu!”
“Tulepepelo kuti abengi nomba kuti babombako ubutumikishi bwa nshita yonse no kuipakisha amapaalo ayafuma mu kubombela Yehova apakalamba.”
4 Ilintu tulepalamina ku kalume ka bushiku bwe pusukilo ubwa kwa Lesa, cilemoneke fyo Yehova alefwaisho kuti abantu bakwe bamulumbanye sana pa muku wa kulekelesha. Ukusaalala no kuluma kwa ubu bukombe kuleingilishiwako (1) ukupitila mu kulunduluka kwatwalilila mu mpendwa ya bakabilisha ba Bufumu kabili (2) ukupitila muli umo umo ukufwaisha ukulundako imibombele yakwe mu kushimikila pa lwa Bufumu. Yehova, ‘uumesha,’ alilenga ishi nshila shibili ukubomba bwino ukupitila mu kupaala ukuitemenwa kwa bonse abapokelela ipusukilo.—1 Kor. 3:6, 7; Amalu. 110:3.
5 Mwipokelela Ibusha Ukusenamina kwa kwa Lesa: Paulo alelanda pa bushiku bwe pusukilo ubwa kwa Yehova lintu akonkomeshe Abena Kristu banankwe ati: “Pa kubombela pamo na Lesa, no kupaapaata tulamupaapaata, atuti, mwipokelela ibusha ukusenamina kwa kwa Lesa.” ‘Tatwakapokelele ibusha ukusenamina kwa kwa Lesa’ nga ca kuti ino nshita tuleimona nge “nshita ya kupokelelwamo” iya kubombela ipusukilo lya bambi pa nshita yonse iyo twashukila. (2 Kor. 6:1, 2) Ilelo, amashiwi ya kwa Paulo yali aye pamfya nga nshi. Abena Kristu abalangisho kuti balitemwa Yehova ku mutima bacimona nge shuko ukubombesha mu butumikishi bapeelwa. Bushe nomba kuti mwabombako sana mu butumikishi nga painiya wa nshita yonse?
6 Icipendo Icilefwaikwa Cili fye Bwino: Muno Zambia, tulefwaya icipendo ca bapainiya ba nshita yonse 10,000 bakalembeshe ilyo September 1 ishilafika. Natucetekelo kuti ici cipendo cili fye bwino kabili kuti twafikapo. Mulandu nshi twacetekele fyo? Mu May 1997 kwali bamunyina na bankashi 7,695 ababombele bupainiya bwa kwafwilisha, kabili mu April 1998 kwali mupepi na 6,106 abacitile fyo. Abengi aba bene babombele amaawala 60—babulisheko fye amaawala 10 ukufika ku maawala ayalefwaikwa nomba kuli bapainiya ba nshita yonse! Nga ca kuti fye 3,000 pa babombeleko bupainiya bwa kwafwilisha balembesha bupainiya bwa nshita yonse ilyo uno mwaka wa mulimo ushilapwa, kuti twatendeka September na bapainiya ba nshita yonse 10,000 nelyo ukucilapo!
7 Ukutantika Kulakabilwa: Bushe mucili mulemona kwati tamwingabomba amaawala 70 cila mweshi? Nalimo kuti camwafwako nga mwatontonkanya pa lwa kubomba amaawala 17 cila mulungu. Ukubomfya ukutantika ukulangililwe pe bula lyakonkapo, esheniko ukulemba ukutantika kwa mulimo wa bupainiya bwa nshita yonse ukwingalinga imibele mwabamo. Pa kulemba uku kutantika, landeni na bapainiya babelesha bamupandeko amano pa fyo mwingaakanya umulimo wa bupainiya ne milimo ya pa lwenu ne ya kusakamana ulupwa. Ipusheni kangalila wenu uwa muputule ifyo bapainiya bambi mu muputule batantika imibombele yabo cila mulungu. Lyene cetekeleni ukuti Yehova akapaala amapange yenu aya kubombako bupainiya.—Amapi. 16:3.
8 Bombeniko Uyu Mulimo pa Lupwa Lwenu: Bushe mwalitontonkanyapo pa lwa kubombako bupainiya pa lupwa lwenu? Kuti mwaikala pa nshi ngo lupwa no kulanshanya fintu umo nelyo babili mu lupwa bengabombako bupainiya lintu bapekanya bwino no kubombela pamo. Ca cine, bamo pa numa ya kubebeta bwino imibele babamo kuti basango kuti pali nomba te kuti babombeko bupainiya bwa nshita yonse. Nga e fyo cili, imikeni ubuyo bwa kwisabombako bupainiya ku ntanshi. Lelo tendekeni amapekanyo ya kwisatendeka bupainiya pa bushiku ubwaimikwa. Napamo kuti mwabombako bupainiya bwa kwafwilisha imiku iingi mu mwaka mukasuke mukafike ku buyo bwa kubombako umulimo wa bupainiya bwa nshita yonse.
9 Bapainiya ba nshita yonse ukucila pali 8,000 muno Zambia baba mu mibele yalekanalekana. Te bonse baba no bumi ubutuntulu sana, abengi balasakamana indupwa ne fya ndalama. Pali bapainiya 2,500 abalembeshe mu myaka ibili iyapita, ukucila pali 400 balicila imyaka 50, kabili mupepi na 200 balicila imyaka 65. Mupepi na 1,600 bashimbe kabili ukucila pali 200 bali ne myaka 20 nelyo tabalakumanya. Ukucila pa mapesenti 33 ya balembeshe mu myaka ibili iyapita ni bamunyina, abengi aba bene balikwata imilimo ya kusakamana indupwa ne cilonganino. Bonse aba ‘balabomfye nshita’ muli bupainiya, ico ilingi calipilibulo kuti baleikala ubumi ubwayanguka lelo ubwa kwikusha.—Kol. 4:5.
10 Bushe Mulekabila Ukwangusha Ubumi Bwenu? Ukwangushako ubumi bwenu kuti kwamwiswila umwinshi wa kubombako bupainiya. Bushe ubumi bwenu bwaba nge ng’anda iikalamba iyakwata imiputule ne fipe ifishikabilwa, iikabila inshita iikalamba, indalama ishingi, no kubombesha pa kuisakamana? Nga e fyo bwaba, teulukeni ku mibele yalinga iingamusuminisha ukubombako bupainiya. Bushe kuti mwacefyako inshita mupoosa ku ncito ya ku calo? Bushe kuti mwalubulako inshita ku milimo iishacindama nelyo ukucefyako inshita mupoosa mu kukokoloka?
11 Baibolo, pali 1 Timote 6:8, itukonkomesha ati: “Pa kuba ne fya kulya ne fya kufwala, tuteke imitima [“tube abaikushiwa,” NW] kuli ifyo fine. Ukwikushiwa ku finono e cingatwafwa ukubombesha mu mulimo wa kwa Yehova no kulenga citwangukile ukutangishako ifya ku mupashi. (Mat. 6:22, 33) Pe bula 104 muli 1998 Yearbook muli lipoti ya Japan, mwaba imitubululo yafulilako ilanda umulandu abengi batemenwa ukubombako bupainiya muli cilya calo. Imitubululo imo itila: “Ca cine ukuti amayanda ya bena Japan tayakwata ifipe ifingi, na muli fyo yakabila inshita inono pa kuyasakamana, e ico ilingi line ubumi bwabo bwalyanguka.” Bushe te fyo 1 Timote 6:8 ikomailapo?
12 Mwi sonde lyonse, ababomfi ba kwa Lesa baleluminisha umulimo wa kushimikila imbila nsuma ilyo ubushiku bwe pusukilo ubwa kwa Yehova tabulapwa. Ku ca kutasha, uyu mwaka wapwile avareji wa bantu mupepi na 700,000 balibombeleko umulimo wa bupainiya cila mweshi. Bushe kuti mwateululo bumi bwenu pa kuti mwingabombako na bo? Shi bebeteni bwino bwino imibele mwabamo ilintu muleasuka icipusho icileti: “Bushe umwinshi wa kubombako bupainiya nomba nawisuka kuli imwe?”
[Amashiwi pe bula 3]
BAPAINIYA BA NSHITA YONSE 10,000 BALEFWAIKWA!
[Akabokoshi pe bula 4]
Ukulangilila Ukutantika kwa Mulimo wa Bupainiya bwa Nshita Yonse
Amaawala ayakabilwa cila mulungu: 17
Ubushiku Bumo mu Mulungu na pa Mpela ya Mulungu
Ubushiku Amaawala
Pali Cisano 8
Pa Cibelushi 6
Pa Mulungu 3
Amaawala Yonse: 17
Inshiku Shibili mu Mulungu na pa Cibelushi
Ubushiku Amaawala
Pali Cibili 7
Pali Cine 7
Pa Cibelushi 3
Amaawala Yonse: 17
Inshiku Shitatu mu Mulungu na pa Mulungu
Ubushiku Amaawala
Pali Cimo 5
Pali Citatu 5
Pali Cisano 5
Pa Mulungu 2
Amaawala Yonse: 17
Ifyungulo Fibili na pa Mpela ya Mulungu
Ubushiku Amaawala
Pali Cimo 3
Pali Citatu 3
Pa Cibelushi 8
Pa Mulungu 3
Amaawala Yonse: 17
Lembeni Ukutantika Kwenu kwa Mulimo wa Bupainiya bwa Nshita Yonse
Ubushiku Amaawala
Pali Cimo
Pali Cibili
Pali Citatu
Pali Cine
Pali Cisano
Pa Cibelushi
Pa Mulungu
Amaawala Yonse: 17