Bushe Muli no Kukuuka?
Nga ca kuti mwayasuka ukuti ee tuli no kukuuka, ninshi kuli ifingi ifyo imwe na bantu bambi mulekabila ukuitendekelako ukucita. Nga mwakonka ifilondolwelwe pe samba, mukabelesha bwangu mu cilonganino cenu icipya.
(1) Nga namwishiba uko muli no kuya, kalemba mu cilonganino mwaba kuti afwailisha akeyala ka cilonganino muli no kukuukilako. Ilyo fye mwafika ku cifulo icipya, bwangu bwangu fwayeni ukwabela Ing’anda ya Bufumu no kwipusha inshita ya kulongana. Nga paba ifilonganino ifingi, ipusheni baeluda ukumweba abene ba cifulo ca kubombelamo ico muleikalamo. Mwishingashinga ukusangwa ku kulongana no kwishibana na baeluda.
(2) Bakalemba mu cilonganino mwali no mo mulekuukila bali no kulembeshanya pa kuti Icalembwa ca Bukasabankanya ica Cilonganino cikatumwe ku cilonganino mwile. Kabili kukaba no kutumina baeluda mu cilonganino cenu icipya kalata wa kumulondolola. (Moneni Umukululo wa Cipusho mu Ubutumikishi Bwesu Ubwa Bufumu ubwa February 1991. Linganyeniko no Umukululo wa Fipusho mu Ubutumikishi Bwesu Ubwa Bufumu ubwa October 1998.) Komiti wa Mulimo ali no kwishibisha katungulula we sambililo lya citabo pa lwa imwe pa kuti engamumona no kumwaafwa ukwishiba isambililo lya citabo uko mukalasangwa.—Rom. 15:7.
(3) Bakasabankanya bonse aba mu cilonganino cenu icipya kuti bamwaafwako ukupitila mu kwishibana na imwe no kumusengela bwino bwino. (Linganyeniko 3 Yohane 8.) Kwena, ici cilepilibula ukuti mufwile ukulasangwa ku kulongana pa kuti mwingakoseleshanya no kukuulana na bamunyina na bankashi.
(4) Tamulingile ukulolela ukufikila mwakuukilila e pa kutendeka ukubombako ubutumikishi bwa mwi bala ne cilonganino cenu icipya. Ilyo muletangishako ifya Bufumu, fimbi fikasakamanwa na fyo fine kabili mukaba aba nsansa nga nshi mu cilonganino cenu icipya. (Mat. 6:33) Cilya mwayumfwa ukuti nomba namufika, kuti pambi mwatemwa ukulaalikako bamo mu cilonganino ku kumutandalila no kwishibana bwino na bo.—Rom. 12:13b.
Ala ukukuuka ni ncito. Nangu cibe fyo, nga bonse ababimbilwemo bakonka ifyatubululwa, takwakabe ukubwelela ku numa lwa ku mupashi. Bonse bakapapa ukumona bumunyina bwesu ubwa Bwina Kristu umwaba ukutemwa.