Pashanyeni Yehova Uushaba na Kapaatulula
1 Yehova alasakamana abantu. Ukwabula akapaatulula, alapokelela bonse abacita ifyo afwaya. (Imil. 10:34, 35) Na Yesu wine ilyo aleshimikila ku bantu, takwete akapaatulula. (Luka 20:21) Tufwile ukupashanya Yehova na Yesu, nge fyacitile Paulo uwalembele ukuti: “Uyo wine e Shikulu wa bonse, uwacindama kuli bonse abalilila kuli wene.”—Rom. 10:12.
2 Ukubilisha imbila nsuma ya Bufumu bwa kwa Lesa ku bantu bonse abo tukumanya “kulacindika Lesa.” Tufwile ukutwalilila ukushimikila bambi ubu bukombe bwacindamisha, te mulandu no mushobo wabo, ifyo baba mu bwikashi, amasomo yabo, babe bakankaala nelyo bapiina. (Rom. 10:11-13) E kutila tufwile ukushimikila bonse abengomfwa, babe baume, banakashi, baice, nelyo bakote. Tufwile ukuya pa ng’anda yonse, pa kuti abekalapo bomfweko icine.
3 Temweni Abantu Bonse: Ico twaimininapo kulanda ku muntu onse. Apo balebukisha ico, bakasabankanya bamo balishimikila mu maofesi ya badokota, mu fipatala, mu mayanda basungilamo abakote na balwalilila, na mu maofesi ya babomfi ba milimo ya kwafwilisha abantu mu bwikashi. Bakasabankanya bambi na bo balishimikila kuli bakafundisha ba mu masukulu, pa fililo, ku mpanda mano, na kuli bakapingula. Ilyo muleshimikila ku babomba umulimo wa kwafwilisha abantu mu bwikashi, caliwama ukubatasha pa mulimo babomba. Beni aba mucinshi, kabili saleni ifipande fya ndakai ifilelanda maka maka pa mulimo babomba na pa mafya bakwata muli uyo mulimo.
4 Inshita imo, nkashi alandile kuli kapingula mu ofesi mu mwakwe. Ilyo balanshenye bwino sana, kapingula asukile amweba fimo ifyali mu mutima. Atile: “Bushe mwalishiba ico natemwako ku Nte sha kwa Yehova? Balikwata ifishinte fisuma ifyo bakonka ukwabula ukupumbukako.” Ubunte busuma bwapeelwe kuli ulya muntu wacindikwa mu bwikashi.
5 Te kuti twishibe ifyaba mu mitima ya bantu. Nalyo line, ilyo tulelanda na bonse abo tukumanya, tulalanga ukuti twalitetekela amaka ya kwa Lesa aya kutungulula umulimo wesu. Lyene ico cilalenga abantu ukuba ne shuko lya kumfwa no kwankulako ku bukombe bwe subilo. (1 Tim. 2:3, 4) Shi natulebomfya inshita yesu bwino, no kutukusha ukulapashanya Yehova uushaba na kapaatulula pa kuya kuli bonse abo twingayako no kubashimikila imbila nsuma.—Rom. 2:11; Efes. 5:1, 2.