Langeni Ukuti Mulasakamana Abantu—Pa Kubila Ukwabula Akapaatulula
1 Umutumwa Yohane amwene malaika mu cimonwa alepupuka mu muulu alebila imbila nsuma ku “luko lonse no mutundu no lulimi na bantu.” (Ukus. 14:6) Bushe tulabila imbila nsuma ukwabula akapatulula nga filya fine malaika acitile? Limbi kuti twaba na kapaatulula nelyo umusobolola ukwabula no kwishiba. Ifyo tumona abantu tusanga ilyo tuleshimikila kuti fyakuma ne fyo tubila imbila nsuma kuli bena. Kanshi ilyo tuleshimikila abantu abafuma kumbi, cifwile ukumoneka ukutila twalibatemwa kabili tulabasakamana.
2 Moneni Ifyo Icifulo Mubombelamo Caba: Bushe muli abakuukilamo ukufuma ku fyalo fimbi nelyo bushe namwisa imbutushi? Limbi te kuti tulebikako amano ku kushimikila aba bantu. Mufwile ukubafwaya, no kwesha ukubeshiba. Esheni ukwishiba ifyo bafwaya, ifibasakamika, ifyo batemwa ne fyo bashifwaya, e lyo ne fyo batiina nangu ifyo bapata? Nga mwaishibe fyo, esheni ukubashimikila pa Bufumu ukulingana ne fyo mwishibe pali bena. (1 Kor. 9:19-23) Nga filya fyali Paulo, na ifwe tufwile ukuyumfwa ukutila twalikwata imisha ya kubila imbila nsuma ku bantu bonse mu cifulo tubombela, pamo na bafuma ku fyalo fimbi, na bakonka intambi shimbi, abalanda ululimi lumbi, nelyo abakankaala sana.—Rom. 1:14.
3 Nomba kuti mwacita shani pa kuti mushimikile uulanda ululimi lumbi? Bomfyeni akatabo katila Good News for People of All Nations. Kuti mulesendako na matrakiti mu ndimi isho abantu mu cifulo mubombela balanda. (Moneni Ubutumikishi Bwesu Ubwa Bufumu ubwa July 2003, ibu. 8 amapara. 2 na 3.) E lyo bakasabankanya bamo balesha na maka ukusambilila ukuposha e lyo ne fyebo finono mu ndimi shimbi ifyo bengalanda pa kutendeka ukushimikila abantu. Abengi balatemwa nga baumfwa uko umo aleesha ukulanda na bo mu lulimi lwabo nangu te fingi aishiba, kabili ici kuti calenga balafwaya ukumfwa imbila nsuma.
4 Pashanyeni Yehova: Nga tuleesha na maka ukulanda na bantu aba nkulilo shalekanalekana, ninshi tulepashanya Yehova, Lesa wesu uushakwata kapatulula, “uufwaya ukuti abantu ba misango yonse bakapusuke no kufika ku kwishiba bwino bwino icine.”—1 Tim. 2:3, 4.