Cinshi Mukasosa ku Muntu Uutila Takwaba Lesa?
1 Incenshi ya ku Poland yaebele mishonari muno Afrika ukuti: “Ine naishiba ati takwaba Lesa.” Nalyo line, nkashi alilanshenye no yu mwanakashi no kumupa icitabo ca Life—How Did It Get Here? By Evolution or by Creation? Ilyo mishonari abweleleko umulungu wakonkelepo, incenshi yamwebele ukuti: “Nomba ninsumina ukuti Lesa e ko aba!” Yalibelengele icitabo conse ica Creation, kabili yatile yalefwaya isambililo lya Baibolo. Kuti mwacita shani pa kulanshanya bwino na bantu abatila takwaba Lesa? Natutale tulande pa milandu yapusanapusana iilenga bamo ukulanda ati takwaba Lesa.
2 Fimo Ifilenga Abantu Ukumona Kwati Takwaba Lesa: Te bonse abatila takwaba Lesa abasumine fyo ukufuma ku bwaice. Abengi balisambililapo ifya kwa Lesa kabili kale balisumine ukuti e ko aba. Nangu cibe fyo, ukulwalilila, amacushi ya mu lupwa, nelyo ulufyengo, fyalinasha icitetekelo cabo. Bambi na bo ifyo basomene ku koleji nelyo ku yuniversiti fyalibalenga ukumona kwati takwaba Lesa. Umfweni ifya kumwenako fya bantu bamo abaletila takwaba Lesa abasukile balundulula icitetekelo cakosa muli Yehova Lesa kabili babele Inte shakwe.
3 Umwanakashi umo ku Paris afyelwe no bulwele bwa mu mafupa ubwalemucululusha. Nangu cingati alibatishiwe ku Katolika, asukile alanda apabuuta ukuti takwaba Lesa. Ilyo aipwishe abashimbe banakashi aba fya mapepo ico Lesa asuminishishe ukuti afyalwe no bu bulwele, bamwaswike ukuti: “Pantu Lesa alikutemwa.” Alikeene ukusumina ico casuko ca buwelewele. Umbi na o mulumendo umwina Finland uwasangilwe no bulwele bwa mu mishipa ubushipola, kabili atendeke ukwendela mu cicinga ca balemana. Banyina bamutwele kuli kapepa wa ku Pentekoste uwaleitunga ati alaposha abalwele. Lelo, alifililwe ukumundapa ku kumupepelela. Ulya mulumendo kuli pele pele alipatile Lesa kabili atendeke ukulanda ati takwaba Lesa.
4 Umwaume umwina Honduras akushiwe nga Katolika lelo asomene amano ya buntunse ne fya bumukaana Lesa. Apo alisumine ifyo asomene ku yuniversiti ukuti abantunse basangwike fye, atendeke ukulanda ati Lesa takwaba. Umwanakashi umwina United States na o akushiwe nga Methodist. Ailesoma amano ya buntunse ku koleji. Cinshi cacitike ku fyo asuminemo? Atile: “Mu mwaka fye umo, nalisuulile fyonse ifya kwa Lesa ifyo nasuminemo pa mulandu wa fintu bansambilishe.”
5 Ukufika pa Mitima ya Bafumaluka: Abengi abatila Lesa takwaba kuti batemwa ukwishiba icingapwisha amafya ya kulwalilila, ukukanaumfwana mu ndupwa, ulufyengo na fimbi. Balafwaisha ukwishiba ifyasuko ku fipusho ifili nga: ‘Mulandu nshi kwabela amacushi?’ ‘Cinshi ifyabipa ficitikila ku bantu abasuma’ na ‘Bupilibulo nshi ubwa bumi?’
6 Abaupana ku Switzerland, baishibe ukuti takwaba Lesa ukufuma ku bwaice bwabo. Ilyo umo alandile na bo icine umuku wa kubalilapo, balikeene. Lelo balikwete amafya mu cupo cabo kabili baletontonkanya pa kulekana. Ilyo Inte shatandele na kabili, shalibalondolwelele ifyo bengakalulula amafya. Abaupana balisungwike pa kufunda kubomba ukusangwa mu Malembo, kabili balisumine ukusambilila Baibolo. Icupo cabo calikosele, balilundulwike lwa ku mupashi kabili balibatishiwe.
7 Ico Mwingasosa ku Muntu Uutila Takwaba Lesa: Nga umuntu amweba ukuti takwaba Lesa, esheni ukwishiba icalenga ukuti alesose fyo. Bushe mulandu wa masomo asambilila, bushe mafya yantu apitamo, nelyo bushe ni co alimona ubumbimunda bwa baya ku macalici nelyo balimusambilisha ifya bufi? Kuti mwamwipusha amuti: “Bushe ukufuma fye na kale ifi fine e fyo mwaishiba?” nelyo kuti mwatila “Cinshi calenga ukuti mulemona ukuti takwaba Lesa?” Nga amwasuka, e lyo mukeshiba ifyo mwingalanshanya nankwe. Nga kwaba imilandu iikalamba iya kulanshanyapo, icitabo ca Is There a Creator Who Cares About You? nalimo e cingaasuka ifipusho fyakwe.
8 Nalimo kuti mwaeshako ukulanda ifi ku muntu uutila takwaba Lesa:
◼ “Bushe mwalitala amutontonkanyapo ukuti: ‘Lesa nga e ko aba, mulandu nshi kwabela amacushi yafule fi no lufyengo muno calo?’ [Lekeni asuke.] Bushe kuti namulangako ico Baibolo isosa pa lwa uyu mulandu? Belengeni Yeremia 10:23. Cilya mwabelenga, mwipusheni ico engalandapo pe lembo, lyene mulangeni amabula 16 na 17 muli broshuwa wa Will There Ever Be a World Without War? Nelyo mulangeni icipandwa 10 mu citabo ca Creator. Mukoselesheni ukushala no lupapulo no kulubelenga.—Moneni imitubululo yalundwapo mu citabo ca Ukupelulula, amabula 258-260.
9 Ca cine, te bonse abatila takwaba Lesa abakapokelela icine. Lelo abengi kuti bakutika ku fyo twingabeba. Bomfyeni amano, ukunashanasha, ne cacindamisha, amaka ya Cebo ca kwa Lesa, ku kubafwa ukwishiba icine.—Imil. 28:23, 24; Heb. 4:12.