Bomfyeni Amatrakiti ku Kutendeka Ukulanshanya
1 Bushe teti musumine ukuti pa kushimikila bwino cashintilila sana pali imwe ukutendeka ukulanshanya? Icayafya kulanda icintu cimo icingalenga uyo muntu ukufwaya ukumfwa no kumubimbamo. Lelo bushe ico kuti cacitwa shani bwino?
2 Bakasabankanya abengi balisanga ukuti ukulanda fye amashiwi yanono ayasuma, ukutambika imo pa matrakiti yesu ayalanda pa fya mu Baibolo kuti kwayafwa ukutendeka ukulanshanya. Imitwe ilacebusha, ne fikope fyalibalabata kabili ifya kucebusha. Amatrakiti tayatiinya muntu, ukumona kwati muli ifingi sana ifya kubelenga. Nalyo line, ubukombe ubwipi ubwa muli trakiti bulalenga abantu ukufwaya ukulabelenga fye kabili kuti bwatungulula na kwi sambililo lya Baibolo.
3 Pano pali ifyo Nte umo ayumfwile. Atile: “Muno calo umo abantu baba fye abapamfiwapamfiwa, tabafwaya ukupoosa sana inshita ku kubelenga, lelo amatrakiti yalepa fye mu kulinga kabili yakwata ubukombe bwacindama, lelo tayalepesha ica kuti abantu balatiina ukupokako. Nalibelengele amatrakiti ayengi kabili nasukile nasambilile cine.” Te kwesha ukusuula amaka ya Cebo ca kwa Lesa icalondololwa muli ubu bukombe bwapulintwa ubwipi.—Heb. 4:12.
4 Inshila Shayanguka Shine: Abengi balibomba bwino ukupitila mu kubomfya fye imitendekele yayanguka. (1) Langeni uyo muntu amatrakiti yanono no kumwipusha intu engatemwapo. (2) Ilyo asalapo, mwipusheni icipusho mwapekenye bwino icilekomaila pa cishinka cikalamba ica iyo trakiti. (3) Pa kwasuka ico cipusho, belengeni paragrafu walinga nelyo ilembo ukufuma muli trakiti. (4) Nga ca kuti ayankulako bwino, twalilileni ukulanshanya ifyaba muli trakiti nelyo kabiyeni kwi sambililo lya muli broshuwa wa Cintu Lesa Afwaya nelyo icipandwa ca mu citabo ca Ukwishiba icilandapo na fimbi pa fyo mulelanshanya. Muli yi nshila pambi kuti mwamutwala na mwi sambililo lya Baibolo apo pene. Imitubululo yakonkapo kuti yamwafwa ukupekanya ifya kusosa pa kubomfya amatrakiti yane.
5 Umutwe wa trakiti uutila “Nani mu Cituntulu Ateka Icalo?” kuti waba e cipusho.
◼ Nga ca kuti uo mulelandako ayasuka ati “Ni Lesa,” nelyo ati “Katwishi,” belengeni amasentensi yabili aya kubalilapo pe bula 2 na paragrafu wa kubalilapo pe bula 3. Komaileni pali 1 Yohane 5:19 na pa Ukusokolola 12:9. Nampo ngo yo muntu atwishika ati Satana Kaseebanya tabako nelyo nga asumina ukuti alatungulula icalo, kuti mwatwalilila ukulanshanya pa kamutwe kaleti “Icishibilo Ukufuma ku Mibele ya Calo.” Nga ca kuti alefwaya ukwishiba na fimbi, mwebeni ukuti kuti mwalondolola ukwafumine Kaseebanya, ukubomfya ifishinka pa mabula 3 na 4 aya iyi trakiti.
6 Trakiti itila “Lisubilo Nshi Ilya Batemwikwa Besu Abafwa?” kuti yalenga umuntu ukufwaya ukumfwa apo pene. Kuti mwatendeka ukulanshanya ukupitila mu kwipusha ati:
◼ “Bushe mulatontonkanyapo nga tukamona abafwa besu na kabili?” Pa numa ayasuka, belengeni paragrafu wa cibili pe bula 4 ilya trakiti no kubelenga Yohane 5:28, 29. Lyene londololeni ukuti ilaafwa ukumfwikisha ifyebo pe samba lya kamutwe ka kubalilapo aka muli trakiti. Mwebeni ukuti kuti mwatemwa ukulanshanya nankwe.
7 Trakiti itila “Ipakishe Ubumi bwa Lupwa” ilafwaikwa ku ndupwa konse konse. Ukubomfya iyi trakiti kuti mwatila:
◼ “Napamo kuti mwasumina ati indupwa nashisanswa ilelo. Bushe muleti cinshi cingacitwa ku kukosha indupwa?” Pa numa uyo muntu ayasuka, mulangeni ifishinka fili muli paragrafu wa kubalilapo pe bula 6. Saleni ilembo limo ilyambwilwe pa mabula 4 na 5 aya trakiti, no kulondolola umo lilolele. Lyene tambikeni isambililo lya Baibolo ilya mu ng’anda ilya pa fye.
8 Imilandile yakonkapo kuti yabomba nga muli na trakiti itila “Umulandu Wingacetekela Baibolo”:
◼ “Abengi balyumfwapo ilyashi lya kwa Kaini na Abele, ilyaba mwi buuku lya kubalilapo ilya mu Baibolo. Mwi buuku lya Ukutendeka balandapo na pa lwa mukashi wa kwa Kaini. Bushe mwalitala amupapa ati ni kwi amufumishe?” Bomfyeni paragrafu wa kulekelesha pe bula 2 ilya iyi trakiti ku kwasuka. Londololeni no kuti iyi trakiti ilalanda na pa fintu fyacindama ifyo Baibolo yalandapo ifili ku ntanshi. Ukutendeka na paragrafu wa citatu pe bula 5, twalilileni ukulanshanya, ukubomfya amalembo yalelanda cimo cine.
9 Ukusabankanya amatrakiti yalanda pa fya mu Baibolo ni nshila yabomba bwino pa nshita ntali iya kubilishishamo imbila nsuma. Apo yalyanguka ukusenda konse uko mwaya, kuti mwayabomfya bwino mu mulimo wa ku ng’anda ne ng’anda na mu bunte bwa mu lyashi. Amatrakiti yalicindama sana mu kufishapo ubutumikishi bwesu. Shininkisheni ukuti mwasenda ayapusanapusana, no kuyabomfya sana ku kutendeka ukulanshanya.—Kol. 4:17.