Amatrakiti Yapya Yalipangwa Bwino Sana!
1. Ni mpapulo nshi isha kubomfya pa kushimikila ishipangilwe mu nshila yaibela?
1 Pa Kulongana kwa Citungu ukwa mu 2013 ukwaleti: “Icebo ca kwa Lesa e Cine!” twalipokelele amatrakiti 5 ayapya. E lyo ukulunda pali aya amatrakiti, nomba pali na Imbila Nsuma ya Bufumu iya kampeni yalenga 38 iitila: “Bushe Cine Cine Abafwa Kuti Baba aba Mweo na Kabili?” Aya matrakiti yonse 6 baliyapanga mu kuibela. Mulandu nshi bapangila aya matrakiti mu kuibela? Bushe kuti twabomfya shani ifyo bapanga aya matrakiti ilyo tuleshimikila ku ng’anda ne ng’anda?
2. Cinshi bapangila aya matrakiti muli iyi nshila ipya?
2 Cinshi Bapangila aya Matrakiti mu nshila Iipya: Pa kushimikila bwino ku ng’anda ne ng’anda ilingi tubomfya inshila shine: (1) Ukwipusha icipusho ca kutendekelapo ukulanshanya no muntu. (2) Ukumubelengela Ilembo. (3) Ukumushiila ulupapulo lwa kubelenga. (4) Ukumwipusha icipusho ico tukayalanshanya nankwe umuku uukakonkapo, no kupangana ilyo tukamonana nankwe. Ifyo aya matrakiti yapangwa filenga tulekonka bwino ishi inshila shine.
3. Kuti twashalika shani amatrakiti ayapya ilyo tuleshimikila?
3 Ifya Kubomfya Amatrakiti Ayapya: (1) Pa numa ya kuposha umuntu, mulangeni icipusho icili pa ntanshi ya trakiti no kumweba ukusalapo icasuko pe samba. (2) Isuleni trakiti kabili lanshanyeni pa kamutwe akatila “Ifyo Baibolo Ilanda.” Nga nacilinga, belengeni ilembo mu kulungatika ukufuma mu Baibolo. Nga nakwata inshita, lanshanyeni pa kamutwe akatila “Ubusuma Bwaba mu Kucetekela Ifyo Baibolo Ilanda.” (3) Mushileni trakiti no kumukoselesha ukupwisha ukuibelenga ilyo akwata inshita. (4) Ilyo mushilafumapo, mulangeni icipusho caba ku numa ya trakiti pe samba lya kamutwe akatila “Ifyo Mufwile Ukulatontonkanyapo” kabili panganeni ilyo mukaya-asuka ico cipusho ukubomfya Baibolo.
4. Kuti twabomfya shani amatrakiti ayapya ilyo twabelela kubo twashimikileko?
4 Nga mulebomfya aya matrakiti, ukucita icipempu nako takwafya na kwafya. Kuti mwabomfya fye amalembo yaba ku numa ya trakiti pa kwasuka icipusho mwaipwishe umuku wafumineko. Ilyo mushilafumapo, balangeni icikope ca broshuwa ya Imbila Nsuma, lyene balangeni broshuwa ne sambililo ilikumine ifyo mulelanshanya, no kubashiila broshuwa. Nga basumina, umfwaneni ukuti mukalanshanye ifyaba muli broshuwa umuku uukakonkapo. Nga mwacita ifi ninshi na mutendeka isambililo lya Baibolo! Mu nshita ya kubashiila broshuwa, kuti limbi mwabashiila trakiti na imbi no kumfwana nabo ilyo mwingayalanshanya ifilimo.
5. Bushe amatrakiti yacindama shani mu mulimo wa kushimikila?
5 Ukutula apo twatendekela ukubomfya amatrakiti pa kushimikila, napapita ne myaka ukucila pali 130. Nangu ca kuti mu kupita kwa nshita ifyo tupanga amatrakiti filapusanapusana, yalitwafwa sana mu mulimo wa kushimikila. E ico, natulebomfya bwino aya matrakiti ayapangwa mu nshila iipya ukwafwa abantu mwi sonde lyonse ukwishiba ifyaba mu Baibolo.—Amapi. 15:7a.