Ifyo Twingatendeka Ukulanshanya na Bantu Ukubomfya Amatrakiti

Ukutula mu January 2018, pe bula lya kubalilapo mu Akatabo ka Mikalile no Mulimo Tubomba palaba icipande citila, ifyo mwingalanda. Muli ici cipande batukoselesha ukubika amano ku kulanshanya na bantu mu cifulo ca ku bashila fye impapulo. Pa kwafwa bakasabankanya ukwishiba ifya kulanshanya na bantu, kwaliba amavidio yalanga ifya kutendeka ukulanda na bantu ukubomfya fye Baibolo. Bushe nomba ici cilolele mu kuti tatufwile ukulabomfya impapulo ilyo tulebila imbila nsuma ku ng’anda ne ng’anda? Awe! Ku ca kumwenako kuti twabomfya amatrakiti pa kutendeka ukulanshanya na bantu. Kuti twabomfya inshila yakonkapo ilyo tulelanshanya no muntu ukubomfya trakiti iili yonse:

1. Ipusheni icipusho caba pa ntanshi ya trakiti.

2. Balangeni ifyo Baibolo yaasuka ico cipusho ukubomfya ilembo nelyo amalembo yali pa muulu pe bula lyakonkapo. Abo mulelanshanya nabo nga nabakwata inshita kuti mwabelenga no kulanshanya nabo ifyebo ifili mu kati ka trakiti.

3. Peeleni abo mulelanshanya nabo trakiti kabili bakoselesheni ukubelenga ifyebo fyashalako ilyo bakakwata inshita.

4. Ilyo mushilaya balangeni icipusho caba apatila “Ifyo Mulingile Ukulatontonkanyapo” kabili panganeni ilyo muli no kuyaasuka ico cipusho.

Nga mwabwelelako mukalanshanye icipusho mwabepwishe umuku wafumineko, pa numa mukabepushe icipusho na cimbi ico mukayaasuka ilyo mukabwelelako. Kuti mwabomfya icipusho caba pa webusaiti nelyo icaba mu lupapulo ulwaba pa mpela ya trakiti. Mwe bene kuti mwamona nga nacilinga ukubapeela broshuwa ya Imbila Nsuma Ukufuma Kuli Lesa! nelyo ulupapulo lwaba pa Mpapulo Tubomfya Sana pa Kusambilisha Abantu.