Ifya Kulundulula Amaka ya Kupelulula
1 Ubupilibulo bumo ubwe shiwi lya “ukupelulula” bwaba “kulanda no muntu pa kuti mwingaalula incitilo shakwe nelyo imitontonkanishishe.” Mulekabila ukulundulula amaka ya kupelulushanya na bantu mwakumanya pa kuti mwingawamyako ukubomba bwino mu butumikishi. (Imil. 17:2-4) Lelo kuti mwalundulula shani aya maka ya kupelulula?
2 Balilenipo no Kwetetula: Ukutontonkanya pa fyo mulebelenga lintu mulesambilila icine ca Baibolo kukamwafwa. Nga ifishinka fimo tafyumfwikile, pooseniko inshita ya kusapika no kwetetula pa fyo mwasapika. Esheni ukumfwikisha ifyalondololwa capamo no kupelulula kufumine mu Malembo pali ubo bulondoloshi.
3 Ukupekanishisha Ubutumikishi Kulakabilwa: Tontonkanyeni pa fyo mwingalondolola icine ku bantu bapusanapusana. Pekanyeni icipusho cingalenga umuntu ukutontonkanya no kufwaya ukusambilila icine. Tontonkanyeni pa fyo mukalondolola ilembo pa numa ya kwipusha icipusho ne fyo mu kapelululapo. Tontonkanyeni pa fintu abantu bengapaasha, kabili tontonkanyeni na fintu mwingalanshanya na bo. Saleni mu lupapulo luleshalikwa icishinka ico mwingalandapo.
4 Pashanyeni ica Kumwenako ca kwa Yesu: Yesu alitwimikile ica kumwenako cawamisha ica kupelulula bwino ukufuma mu Malembo. Pa kubebeta ifyo alesambilisha, moneni Luka 10:25-37. Moneni inshila sha kukonka pa kusambilisha: (1) Lintu muleasuka ifipusho abantu baleipusha, mulebomfya Amalembo. (2) Bakoselesheni ukulandapo, kabili batasheni nga bayasuka bwino. (3) Shininkisheni ukwibukisha fintu icipusho campene na Malembo. (4) Bomfyeni icilangililo icingafika pa mutima wa muntu pa kuti mushininkishe ukuti naumfwikisha icasuko.—Moneni Ulupungu lwa kwa Kalinda ulwa March 1, 1986, amabula 27-8, amaparagrafu 8-10.
5 Bomfyeni Icibombelo ico Twapeelwe: Icitabo ca Ukupelulula Ukufuma Mu Malembo calembelwe ukubomfya mu mulimo wa mwi bala. Imitendekele, ifya kwasuka abacilikila ukulanshanya, ne fishinka fyabamo ukupelulula filatwafwa ukulundulula amaka ya kupelulula. Icitabo ca Ukupelulula cibombelo icacindamisha ico tufwile ukulasenda lyonse mu mulimo kabili tatufwile ukushimunuka ukucibomfya ilyo tulelanshanya na bantu ifya mu Baibolo. Pitulukeni mu mabula 7-8 muli ici citabo no kumona fintu mwingacibomfya bwino.
6 Ukulundulula amaka yenu aya kupelulula kukalundako ukulamuka kwenu mu mulimo wa kushimikila no kusambilisha. Ici cikalenga ukuti mukapaalwe apakalamba capamo na bantu mushimikilako mu butumikishi.