Bushe Mulabomfya Icitabo ca Ukupelulula?
1. Bushe umutumwa Paulo na Yesu balesambilisha shani abantu?
1 Umutumwa Paulo alibikile sana amano ku ‘kulanshanya na bantu Amalembo.’ (Imil. 17:2, 3; 18:19) Ilyo alecite fi, alepashanya Yesu, uwalelanda pa fyaba mu Malembo libili libili no kulanda pa filangililo pa kuti afwilishe abantu ukwishiba bwino bwino ukufwaya kwa kwa Lesa. (Mat. 12:1-12) Icitabo ca kuti Ukupelulula Ukufuma Mu Malembo calembeelwe ukuti ciletwafwa na ifwe ukulondolola amalembo.
2. Bushe icitabo ca Ukupelulula kuti catwafwa shani ukupekanya bwino intendekelo ilyo tuleshimikila?
2 Mulepekanya Bwino Intendekelo: Mu citabo ca Ukupelulula Ukufuma Mu Malembo, pa mabula 9 ukushinta ku 15, mwaliba ifyebo ifya kulanda pa ntendekelo ya kulanshanya ifilenga abengi ukufwaya ukusambilila na fimbi pali Baibolo. Nga mwaishiba imitendekele yalekanalekana no kuibomfya, maka maka nga ca kuti mu cifulo cenu mulabombelamo libili libili, mukalakwata ifyebo ifyalekanalekana ifya kweba abantu kabili mukeshiba bwino ifya kutendeka ukulanshanya na bo. Ilyo muleshimikila abantu pa foni nelyo nga tabafumine mu ng’anda ilyo mulelanshanya na bo, amashiwi ya kutendekelapo ukulanshanya kuti mwayabelenga fye filya fine yaba mu citabo.
3. Fyebo nshi fyaba pa mabula 16-24 mu citabo ca Ukupelulula ifingatwafwa ilyo tuleshimikila abantu?
3 Ifya Kulanda Nga Bantu Bacilikila Ukulanshanya: Kuti cawama mwatontonkanyapo pa bacilikila ukulanshanya na lintu tamulaya mu kushimikila kabili mwapituluka na mu fyebo fyaba pe bula 16-21 ifilanda pa fyo mwingasuka abacite fi. Bushe bamo ababa mu cifulo mubombela kuti baba baBudda, abaHindu, abaYuda nelyo abaShilamu? Nga e fyo, ifyebo fyaba pe bula 21 ukushinta ku 24 kuti fyamwafwa.
4. Bushe kuti twabomfya shani Icitabo ca Ukupelulula ilyo batwipusha icipusho cayafya nelyo nga tulelanda pa fyebo ifyayafya ukumfwa?
4 Ukwasuka Amepusho: Icitabo ca Ukupelulula kuti catwafwa na lintu batwipusha icipusho icakosa nelyo nga tulelanshanya pa fintu ifyayafya ukumfwa. Kuti mwaeba fye umuntu ukuti mulefwaya ukumulangako fimo ifyo engatemwa ukumfwa e lyo mwafumya ne citabo cenu ica Ukupelulula. Apo utumitwe twa malyashi muli ici citabo balitutantika bwino, kuti mwaya fye pa mutwe mulemona ukuti e pengasangwa ifyebo mulefwaya. E lyo mwamona pa fipusho fili mu filembo fyatikama. Nga tamusangile bwangu ifyebo mulefwaya, kabiyeni ku Cisontelelo pa mabula yaba ku mpela ya ici citabo. Nga mwasanga ifyebo mulefwaya, fibelengeni fye mu citabo cine. Nga mulelanshanya pe lembo, kuti mwasanga apo lyalondololwa nga mwaya pe bula 445 pa mutwe wa kuti “Amalembo Ayo Ilingi Yabomfiwa Bubi Bubi.”
5. Ni kuli finshi fimbi icitabo ca Ukupelulula cingabomfiwa?
5 Kumbi Uko Ici Citabo Cibomba: Bamo balasenda ici citabo ku ncito, nelyo ku sukulu pa kuti cingabafwa pa kwasuka ifipusho fimo pamo nge cipusho ca kuti, ‘Mulandu nshi mushisefesha amaholide?’ Ifyebo fyaba pa mutwe wa kuti “Ububumbo” na pa mutwe wa kuti “Ukusanguka” filafwa sana abacaice nga balepekanya ifya ku sukulu. Bushe kuli abalwele nelyo abafwilwa abo mulefwaya ukutandalila? Ifyebo fyaba pa kamutwe katila: “Ukukoselesha” kuti fyamwafwa ukubasansamusha ku fyo Baibolo ilanda. Icitabo ca Ukupelulula calikwata ne fyebo ifyo abalepekanya amalyashi nelyo ukutungulula ukukumana pa kuya mu kushimikila bengabomfya.
6. Cinshi tufwaya sana ilyo tuleshimikila?
6 Nga tuleshimikila, ico tufwaya te kulanga abantu ukuti twalishiba ifingi ukubacila; nelyo ukubeba fye ubukombe capwa. Tufwaya ukubalondolwela Amalembo bwino bwino. Nga tulebomfya bwino icitabo ca Ukupelulula, cileshibikwa ukuti twalibikako amano ku misambilishishe yesu.—1 Tim. 4:16.