Tushimikila Imbila Nsuma

¹ Mwandi lishuko lintu twakwata ukuba bakasenda wa “mbila nsuma iya fisuma!” (Rom. 10:15) Ubukombe twakwata bulapembesula abalemenenwa na mafya kabili ababula isubilo. Bushe tukabafwa shani pa kuti bengeshiba ukuti tulebatwalila ‘imbila nsuma’?—Esa. 52:7.

² Pekanyeni Ubukombe bwa Kukuulilila: Ukulanshanya kwesu mu butumikishi kukabomba bwino nga ca kuti tulelanda sana pa fintu ifikuulilila. E ico, lintu tulepekanya ifya kuyalanda no kubelenga mu mpapulo tuli no kuyashalika, tulingile ukukomaila pa fisuma ifili mu bukombe. Nga ca kuti tuli abashipa kabili abacincimuka lintu tuleshimika isubilo lyesu ilyashimpwa pali Baibolo, kuti twaenekela ifya kufumamo fya kukoselesha.—Amapi. 25:11.

³ Nangu cingati tulomfwila abantu uluse lintu batweba fintu bambukilwa ne mibele ileya ilebipilako fye mu calo, tufwile ukubalangilila ukuti Ubufumu bwa kwa Lesa e bukapwisha amafya ya bantunse. Nangu fye lintu tulelanshanya pa kwisa kwa “bushiku bwa cilandushi” ubwa kwa Yehova, tulefwaya ukubalangilila ukuti ubu bushiku bupilibula “imbila nsuma ku balanda.” (Esa. 61:1, 2) Kuti twakoselesha sana abalekutika kuli ifwe ukuti conse ico Yehova acita kuli pele pele cikaleta insansa ishingi ne fintu fishaiwamina.

⁴ Langeni Ubuseko Bwine Bwine Ilyo Muleshimikila Icine: Lintu abantu batulolesha pa menso no kumona icinso cesu ica buseko kabili ne shiwi lyesu lileumfwika ilyashipa, balafwaisha ukukutika. Nga ca kuti natushininkisha ukuti ifyo tulelanda fisuma, abalekutika bakamona ukuti ni ‘ku kucetekela twabela abasamwa.’ (Rom. 12:12) Na muli fyo kuti bafwaisha ukukutika ku mbila nsuma. Ukwabula ukutwishika, twalikwata umulandu usuma uo tulingile ukulangila imibele isuma no kusekelela ilyo tulebomba ubutumikishi mu nshila iili yonse.

⁵ Imbila nsuma tushimikila ku bantu yalicila pa kubasambilishako fye fimo, pantu ipeela isubilo line line ilya bumi bwawaminako mu bwikashi bwa nomba no bukesa. (1 Tim. 4:8) Ilyo tulelanda ku bantu bapusanapusana, ifyo tulelanda filingile ukubelebesha amatontonkanyo yesu ayasuma kabili filingile ukwafwa abantu ukupokelela imbila nsuma. Shi natwafwe aba mitima ya bufumacumi ukupokelela imbila nsuma ya cisansamushi iyo tushimikila lintu tulesakamana cintu tulefwaya ukusosa na fintu twalasosa ico cintu!