Pashanyeni Yehova, Lesa Wesu “Uwa Nsansa”
1 Yehova alafwaya sana abantu ukuba ne nsansa. Icebo cakwe citweba ifisuma ifyo akacitila abantu ku ntanshi uku tuleya. (Esa. 65:21-25) Abantu bafwile ukwishiba ukutila tulomfwa bwino ukubebako pa “mbila nsuma iya bukata iya kwa Lesa wa nsansa.” (1 Tim. 1:11) Imilandile yesu ifwile ukulanga abantu ukutila twalitemwa icine no kuti twalitemwa na bantu bene abo twebako imbila nsuma.—Rom. 1:14-16.
2 Limo kwena cilakosa ukuba ne nsansa. Mu fifulo fimo umo tubombela, tusangamo abantu abanono fye abafwaya ukumfwa ubukombe bwa Bufumu. Kulaba ne nshita ilyo na ifwe tuba na mafya. Pa kuti tutwalilile ukuba ne nsansa, tatufwile ukulaba ukutila abantu mu cifulo tushimikila bafwile ukumfwa icine no kwishiba imbila nsuma ya Bufumu iyo tushimikila. (Rom. 10:13, 14, 17) Ukutontonkanya pali ici kukatwafwa ukutwalilila ukuba ne nsansa ilyo tuleeba abantunse pe pusukilo Yehova ateyanya mu nkumbu shakwe.
3 Mulelanda pa Fisuma: Tufwile ukubika amano na ku fyo tusosa. Nangu ca kutila pa kutendeka ukulanshanya kuti twalanda pa bwafya bumo nelyo ilyashi ilyo abengi balelandapo, tatufwile ukwikalila fye ukulanda pa fileletela abantu ubulanda. Umulimo wesu wa kulete “mbila nsuma ya fintu fisuma.” (Esa. 52:7; Rom. 10:15) Iyi mbila nsuma, lyashi tweba abantu ilya fintu ifisuma ifyo Lesa alaya ukutucitila ku ntanshi. (2 Pet. 3:13) Muletontonkanya pali ici cishinka no kubomfya Amalembo ku “kukakililako abafunaike misana.” (Esa. 61:1, 2) Ici cikatwafwa bonse ukuba ne nsansa no kusuubila ukuti ifintu fikawama.
4 Abantu bakamona insansa shesu ilyo tuleshimikila. E ico, lyonse natulepashanya Yehova, “Lesa [wesu] uwa nsansa,” ilyo tuleshimike mbila nsuma iya Bufumu ku bantu ababa mu cifulo tubombela.