“Loleni”
1 Pa numa ya kulondolola ifyacindama ifyali no kucitika no kwishibisha inshiku sha kulekelesha isha buno bwikashi, Yesu acincishe abasambi bakwe ati “loleni.” (Marko 13:33) Mulandu nshi Abena Kristu balingile ukuba abalola? Pantu tuleikala mu nshita shabipisha ishishabala ashibako. Te kuti tushipule lwa ku mupashi ukwabula ukuiletelela fwe bene. Ukucite co kuti kwatulenga ukufilwa ukutasha pa mulimo Yehova atupeela ukubomba muli iyi nshita ya mpela. Mulimo nshi atupeela?
2 Yehova alelenga abantu bakwe ukubilisha mwi sonde lyonse imbila nsuma pa lwa Bufumu bwakwe, ubwaba e subilo lyeka fye ku bantunse. Ukubomba capamo no kuteyanya kwa kwa Lesa mu kupalamisha kutwishibisha ukuti tuli Bena Kristu ba cine, abaibukila ulwa nshita tuleikalamo no lwa kukabila kwa kwafwa abantu ukumfwe “fyebo fya mweo wa muyayaya.” (Yoh. 6:68) Tulangilila ukuti twaliba abalola lwa ku mupashi ukupitila mu kubombako mu kupimpa uyu mulimo wacindamisha.
3 Ifitulenga Ukushimikila: Nge Nte sha kwa Yehova, tufwile ukutemwa ubutumikishi bwesu. Ukutemwa Lesa na banensu fitulenga cila muntu ukubombako uyu mulimo wa kushimikila. (1 Kor. 9:16, 17) Ilyo tulecite fyo, tukaipususha fwe bene na baletumfwa. (1 Tim. 4:16) Natupampamine pa kubombako lyonse apapela amaka yesu kabili no kubomba amaawala ayengi, ukushimikila pa lwa buteko bwawamisha pali yonse ubukateka abantunse—no bu Bufumu bwa kwa Lesa!
4 Kwaliba icishinka cacindama icitulenga ukumfwikisha sana ifyo ubutumikishi bwesu bupamfishe—icishinka ca kuti ubucushi bukalamba bukesa lintu tucili tulebomba uyu mulimo. Pa mulandu wa kuti tatwaishiba ubushiku ne nshita, tufwile ukuba abalola no kuiteyanya inshita yonse, ukulapepa kuli Yehova no kushintilila pali wene. (Efes. 6:18) Umulimo wa kushimikila ucili uletwalilila ukukulilako. Lelo bushiku bumo, nomba line, uyu mulimo wakulisha uwa kushimikila uo icalo cishatala acimonapo uli no kupwa.
5 Mu busumino umfwileni ikambisho lya kwa Yesu ilya kuti “loleni.” Ukumfwila lyene kulekabilwa ukucila na kale lyonse. Shi natukonke ili kambisho mu kupamfiwa. Ukutula ilelo kabili cila bushiku, natutwalilile ukuba abasakamanishisha lwa ku mupashi, abalola, kabili abacincila mu mulimo wa kwa Yehova. Shi ‘natulole kabili tutekanye.’—1 Tes. 5:6.