Ishuko Abacaice Bakwata

¹ Abafyashi abengi ilelo balomfwa bwino ilyo baibukisha ishuko bakwete ilya kubombako umulimo pa Bushiku bwa Magazini lintu balekula mu cine. Uyu mulimo watendeke mu filonganino fyonse mu 1949. Cila muntu aletontomesha pa kushalika Ulupungu lwa kwa Kalinda na Loleni! ubushiku bumo mu mulungu mu misebo, ku ng’anda ne ng’anda, mu matuuka, no kubomfya inshila shimbi. Bakasabankanya bacaice maka maka balefwaisha ukubombako uyu mulimo pa mulandu wa kuti balekwata ishuko limo line ilya kubombako umulimo umo wine untu na bakalamba mu cilonganino balebombako. Bushe na imwe mwalebombako ilyo mwali abaice?

² Lekeni na Bana Benu Babombeko: Na bana banono abashilaishiba ifya kutendeka ukulanshanya kwa mu Malembo na mwine ng’anda na bo bene kuti batambika bamagazini. Ukucite fyo kukabila ukusambilila ukulanda amashiwi ayanono fye ayayanguka. Kuti caba fye bwino ukulanda amashiwi yanono pa cikope ca pa nkupo. Abene mayanda abengi balapoka bamagazini bantu abacaice babatambika, kabili balatasha pa kufumaluka kwa aba abacaice ne mibele yabo iisuma. Uyu, mulimo untu abacaice bengabomba bwino sana ukupitila fye mu kubafwako panono, na muli fyo kuti babombako mu nshila yawamisha ukusalanganya imbila nsuma ya Bufumu. Lelo ilyo abana baya balekula, abafyashi kuti bafwaya ukubafwilisha ukutwalilila ukulunduluka mu mishimikilile yabo.

³ Manuel atendeke ukushimikila ku ng’anda ne ng’anda lintu ali ne myaka itatu. Abafyashi bakwe bamusambilishe ukusungila ku mutwe amashiwi ya kulanshanya na mwine ng’anda ayepi. Alashimikila capamo na bo mu kupimpa, kabili alashalika bamagazini abengi, babroshuwa, na matrakiti. Alashimikila no bunte bwa mu lyashi. Inshita imo lintu abafyashi baile nankwe mu kukokoloka ku parka, aliitendekeleko ukushalika amatrakiti ku bantu bambi abali mu parka. Nangu cingati acili umwaice sana, ukupimpa kwa kwa Manuel mu butumikishi kulakoselesha abafyashi bakwe ne cilonganino conse.—Amapi. 22:6.

⁴ Cila Cibelushi pali Kalenda wa Nte sha kwa Yehova uwa mu 2000 paliba “Ubushiku bwa Magazini.” Mwe bafyashi tulemukoselesha ukuti bukululeni cipya cipya ukutemwa uyu mulimo, no kwafwilisha abana benu ukubombako lyonse apapela amaka yabo muli uyu mulimo.