Mwe Bafyashi—Kansheni Abana Benu Ukushimikila
1 Mu filonganino fyesu mwaliba abacaice abengi abafwaisha ukubombela Lesa mu kufumaluka. (Luk. Mil. 12:1) Basanshiwa muli abo abalaalikwa na Yehova ukumulumbanya. (Ilu. 148:12-14) E ico, ilyo abafyashi balekansha abana babo cila bushiku balingile ukusanshako na makambisho pa lwa fya kulanda na bambi pa lwa citetekelo cabo mu mulimo wa kushimikila Ubufumu.—Amala. 6:6, 7.
2 Kansheni Abana mu Nshila Shilunduluka: Abana bawaminwa ukukanshiwa pa mushinku wa mu kubangilila nga nshi ukuya na bafyashi babo mu butumikishi. Ilyo mushilaya mwi bala, pekanyeni abana benu ukushimikilako mu nshila yabamo bupilibulo. Ishibileni kabela fintu mulebenekela ukucita pa ng’anda. Abana abanono nga nshi kuti batambika amatrakiti no kulaalika abantu ku Ng’anda ya Bufumu. Abacaice ababelenga bwino kuti baebwa ukubelenga amalembo pa mwinshi. Kuti batambika bamagazini, ukubomfya inshila ya kulandilamo iipi. Ilyo babelesha, bakansheni ukubomfya Baibolo mu nshila balelandilamo. Bakasabankanya bacaice abengi baliikwatila abantu bashalikako bamagazini lyonse kabili lyonse balaya ku fipempu fya kubwelelamo. Caliwamisha ku mwana ukubomba no mukalamba ukucila ukubomba no wacaice umbi. Umukalamba kuti alondolwela mwine ng’anda ukuti uwacaice alekanshiwa mu butumikishi.
3 Umukashana munono umo aipwishe baeluda ukuti bamwaafweko pa kuti engafikapo ukuba kasabankanya wa Bufumu. Nangu cingati aali fye ne myaka ya bukulu isano pali iyo nshita kabili taishibe ukubelenga, aleshimikila ubukombe bwa Bufumu mu nshila ibomba bwino nga nshi pa mayanda. Alisungile ku mutwe ifya kusanga amalembo, alekupukulapo, ukweba mwine ng’anda ukuyabelenga, kabili lyene aleyalondolola.
4 Na kabili abana balekabila ukusambilishiwa ubucindami bwa kukwata imitande isuma iya kubomfya lyonse mu butumikishi, ukupitila mu ca kumwenako ca bafyashi. Abafyashi balekabila ukutantika ukulafumina mu mulimo cila mulungu no kukakatila kuli uko kutantika, pa kuti abana baishiba inshiku sha mu mulungu isho shabikwa pa mbali lyonse ku mulimo wa kushimikila.
5 Lintu abana bakanshiwa ukufuma ku bwaice ukutemwa ubutumikishi no kuipakisha, bakakuntwa ukutinamina amashuko yakulilako ku ntanshi, nakalimo ukusanshako no mulimo wa bupainiya. (1 Kor. 15:58) Ifwe bonse tulingile ukukoselesha abana abo tuli na bo ukulunduluka bwino pamo nga aba kulumbanya Yehova.