Fundeni Abana Benu Ukutasha Yehova
1. Bushe abaice kuti batasha Yehova?
1 Amalumbo 148:12, 13 yakoselesha abalumendo na bakashana ‘ukutasha ishina lya kwa Yehova.’ Amalembo yalilanda pa baice abengi nga nshi abatashishe ishina lya kwa Yehova. Umo ni, ‘Samwele umwaice uwalepyungila ku cinso ca kwa Yehova.’ (1 Sam. 2:18) Umbi “mukashana munono” uwaebele muka Naamani ukuti kasesema wa kwa Yehova mu Israele kuti aposha Naamani ifibashi ifyo alwele. (2 Isha. 5:1-3) Ilyo Yesu aingile mwi tempele no kucita ifipesha mano, “bakalume” e babilikishe abati: “Shi pususheni, Mwana Davidi!” (Mat. 21:15) Finshi fingaafwa abafyashi ukufunda abana babo ukulatasha Yehova?
2. Mulandu nshi abafyashi bafwile ukubela ica kumwenako cisuma ku bana babo?
2 Ifyo Abafyashi Bacita: Ifunde ilyo abena Israele bapeelwe lyali lya kuti, ilyo wishi talafunda abana bakwe, alingile intanshi umwine aisambilisha ukutemwa Yehova no kubaka amafunde ya kwa Yehova mu mutima wakwe. (Amala. 6:5-9) Nga ca kutila mulelanda pa fisuma ifyaba mu mulimo wa kubila imbila ya Bufumu no kubomba mulebombako cila mulungu, abana benu na bo bakacindamika umulimo wa kubila kabili bakalaumfwa bwino ukubombako.
3. Bushe nkashi umo akoseleshiwe shani ku fyali abafyashi bakwe?
3 Nkashi alebukisha ne nsansa ifyo cali. Atila: “Ilyo nalekula, umulimo umo uo twalebomba pa ng’anda pa mpela ya cila mulungu, wa kushimikila. Nalemona ukuti abafyashi bandi baleumfwa bwino sana ukushimikila. Na ifwe e fyo twakulile ifyo fine, twalicindamike umulimo wa kubila imbila.” Uyu nkashi aishileba kasabankanya ushabatishiwa ilyo aali fye ne myaka 7 kabili pali ino nshita napwisha imyaka 33 mu mulimo wa nshita yonse.
4. Bushe kuti mwasambilisha shani abana pa kuti balelunduluka?
4 Ifya Kubasambilisha pa Kuti Balelunduluka: Ilyo muli mu mulimo muleleka na bana benu na bo bacitako fimo. Limbi kuti bakonkosha ku ciibi, nangu ukupika oti pa ng’anda ya muntu, limbi kuti bapeela umwine wa ng’anda trakti, nangu kuti babelengako ilembo. Nga mulecite ifi kuti baleumfwa bwino kabili bakulaya baleishibilako ifya kubila imbila ya Bufumu. Ilyo bele balekula, bafwile no kulabomba sana umulimo wa kushimikila. E ico bafweni ukulalunduluka no kulatontonkanya pa mulimo bengesatemwa ukulabomba ku ntanshi mu mulimo wa kwa Lesa.
5. Bushe umwana pa kuti abe kasabankanya ushabatishiwa finshi fifwaikwa?
5 Landeni na baeluda ilyo fye mwamona ukuti abana benu kuti baba bakasabankanya bashabatishiwa na lintu bailandila abene ukuti balefwaya ukuba bakasabankanya. Nga baba bakasabankanya bakalaipamfya ukulatasha Yehova. Muleibukisha ukuti umwana te kutila afwile ukwishiba ifingi nga filya abakalamba beshiba pa kuti fye abe kasabankanya. Bushe umwana wenu alishiba amasambililo yacindama aya kutampilapo aya mu Baibolo? Bushe alakonka ifyalembwa mu Baibolo pa mibele isuma? Bushe alafwaya ukulaya mu mulimo wa kubila imbila nsuma e lyo no kwishibikwa ukuti ni Nte ya kwa Yehova? Nga ni fyo, baeluda kuti bamona ukutila nalinga ukuba kasabankanya ushabatishiwa.—Moneni icitabo ca kuti Abaiteyanya Ukucita Ukufwaya kwa kwa Yehova, amabula 79-82.
6. Mulandu nshi cawamina ukuti abafyashi balefunda abana babo?
6 Ukufunda abana ukulatasha Yehova no mutima onse mulimo ukalamba. Lelo kwena, abafyashi balaba ne nsansa icine cine nga bamona uko abana babo baleya pa ntanshi mu mulimo wa kwa Lesa. E lyo kabili, Yehova alatemwa nga nshi ilyo abana baleebako bambi pa milimo yakwe iya kupapusha.