Ni Shani Fintu ‘Balingwa’?

¹ Pa mulandu wa kuti ukuteyanya kwa kwa Yehova kuletwalilila ukukulilako, bamunyina bafikapo bacili balekabilwa ukuba ababomfi batumikila. Bamunyina abengi abo bashilasontwa, kumo fye na bacaice, balafwaisha ukubomfiwa mu cilonganino. Lintu bapeelwa imilimo na imbi, balomfwa bwino ukuti balebomfiwa pa kuti na bo balebombako imilimo. Pa kuti balunduluke ukucila apa, cashintilila pa ‘kulingwa.’ (1 Tim. 3:10) Ni shani fintu balingwa?

² Umulimo wa Baeluda: Pamo nge casanshiwamo mu kulinga munyina ukubomfya imilingo ya mu Malembo iisangwa pali 1 Timote 3:8-13, baeluda bakalinga ifyo munyina aba na maka ya kubomba imilimo. Kuti bamupeela umulimo wa kubombela kuli magazini ne mpapulo, ku fisoselo, no kuwamya Ing’anda ya Bufumu, ne milimo imbi. Baeluda bakamona fintu ankulako ku milimo apeelwa ne fyo abomba iyo milimo. Bakamona nga aba uwashintililwapo, nga alafika mu nshita, nga alabombesha, nga alifuuka, nga alaitemenwa ukucita ifyo aebwa, kabili nga alomfwana na bambi. (Fil. 2:20) Bushe aba ica kumwenako mu mifwalile yakwe ne misakwile? Bushe alapoosako amano ku kubombe milimo? Bakafwaya ukumona “imilimo yakwe ku mibele yakwe isuma, mu bufuuke bwa mano.” (Yako. 3:13) Bushe alatinamina icine cine pa kutila alebomfiwa mu cilonganino? Bushe alakonka ukukambisha kwa kwa Yesu ukwa ‘kulenga abantu ukuba abasambi’ ukupitila mu kubombako ubutumikishi bwa mwi bala?—Mat. 28:19; moneni Ulupungu lwa kwa Kalinda ulwa September 1, 1990, amabula 18-28.

³ Nangu cingati Baibolo tayaimika umushinku waimikwa apa kutendekela ukusonta umuntu ukuba umubomfi utumikila, ilanda pa lwa bamunyina basontwa ukuti “baume abapyunga.” (NW) Te kuti tubenekele ukuba aba myaka ya bupungwe nelyo abali pa kati ka iyo myaka, maka maka apo ukukwata umukashi na bana kwalilumbulwa. (1 Tim. 3:12, 13) Abaume ba musango yo tabafwile ukuba no “lunkumbwa lwa bulumendo” lelo bafwile ukuba abantu abapoosako amano ku fintu, abashimikwa bwino kabili abakwata kampingu musuma mu menso ya kwa Lesa na bantu.—2 Tim. 2:22.

⁴ Nangu ca kuti ukulamuka kwa cifyalilwa kulakabilwa, icacindama sana caba mibele ya umo no mutima. Bushe uyo munyina alafwaisha ukulumbanya Lesa no kwafwilisha bamunyina? Nga ni fyo, Yehova akapaala ukubombesha kwakwe ukwa kufwaya ukulunduluka mu cilonganino.