“Bushe Iyi Imyaka 1,000 Iipya, Finshi Imukwatile?”
1 Ici e cipusho abantu baletontonkanyapo mwi sonde lyonse. Nangu ca kuti umuntu alipwishishisha ifingi pa myanda ya myaka, abantu bali abapelenganishiwa pantu amafya ya mikalile ayashingwana na bantu pa makana ya myaka yacilipo. (Yobo 14:1; Amalu. 90:10) Ni kwi abantunse bengasanga ukwilululwa kwine kwine?
2 Mu mweshi wa October na November, tukakwata ishuko lyaibela ilya kwasukila abantu banensu ici cipusho. Tukabasuka shani? Kupitila mu kwananya trakiti wa Imbila ya Bufumu Na. 36. Ikwete umutwe uuleti “Bushe Iyi Myaka 1,000 Iipya, Finshi Imukwatile?” Ilyo tushilafika pa kati ka mweshi wa October, twakulatambika magazini wa Ulupungu lwa kwa Kalinda na Loleni! Lyene ukufuma pali Cimo pa October 16, ukufika pali Cisano pa November 17, tukaba no mulimo wa kwananya trakiti wa Imbila ya Bufumu Na. 36. Muli uyu kampeni, tukangwa sana ukushalika trakiti wa Imbila ya Bufumu Na. 36 mu kati ka mulungu. Pa mpela ya milungu e po tukalaitambikila pamo na bamagazini abo tukalashalika pali ilya nshita.
3 Bushe Mukabombako mu Kukumanina? Baeluda, ababomfi batumikila, na bapainiya e bakaba basolwesolwe muli uyu kampeni, pantu e batungulula umulimo. Bakasabankanya abengi nabaiteulula pa kutila babombeko bupainiya bwa kwafwilisha pa mweshi umo nelyo pa myeshi yonse ibili iya kwananishishamo trakiti. Bambi batantike ukulabomba inshita iikalamba mu butumikishi ukucila iyo babombamo lyonse.
4 Bakatungulula be Sambililo lya Citabo kuti baafwilisha sana ilyo balekoselesha onse uwaba mwi bumba lyabo ukubomba mu kufikapo mu mulimo wa kwananya trakiti wa Imbila ya Bufumu Na. 36. Nalimo kuli bakasabankanya bamo abanaka mu mulimo wa kushimikila. Baeluda bafwile ukutandalila aba musango yu pa kuti beshibe ico bengacita pa kubafwilisha. Nakalimo kuti kwaba ukutantikako kasabankanya wabelesha ukubombela pamo no wanaka mwi bala muli iyi myeshi. Akacilangililo kayanguka pa fya kushalika trakiti wa Imbila ya Bufumu Na. 36 napamo e kengakabilwa fye pa kupupuutula aba bakasabankanya banaka.
5 Iyi ikaba ni nshita isuma na ku basambi ba Baibolo abafikile apatali mu kusambilila icitabo ca Ukwishiba kabili abafikilepo ukuba bakasabankanya bashabatishiwa ukutendeka ukubombako mu butumikishi. Na bana na bo bene kuti babombako uyu mulimo wa kucincimusha.
6 Icikabilwa fye cilangililo cayanguka. Napamo kuti mwatila:
◼“Nimpaatulako inshita yandi pa kuti ntandaanye ubu bukombe bwacindama ku ndupwa shonse muli ino ncende. Uyu ni trakiti wenu. Mukwai mushale mwabelengamo.” Napamo kuti cawama ukukanasenda icola musenda pa kushimikila ilyo muleananya trakiti wa Imbila ya Bufumu Na. 36.
7 Ukukumana kwa Mulimo wa mwi Bala Ukwateyanishiwa Bwino: Baeluda bafwile ukushininkisha ukuti imitantikile ya kushimikila yawamina bonse kabili ilebomba. Kangalila wa mulimo maka maka akashininkisha ukuti ukwa kubombela pamo nga ku ng’anda ne ng’anda na mu ncende sha matuuka e ko kuli pa kutila onse akabombeko uyu mulimo mu kufikapo. Uko bengakumanisha, ukukumana kwa mulimo wa mwi bala kuti kulebako cila bushiku mu kati ka mulungu, pa mpela ya milungu, na mu cungulo. Kuti mwatantikako no kulakumana mu cungulo kasuba pa kuti abana ba masukulu, ababomba ifipani, na bambi fye bamwenemo.
8 Ifya Kucita Pa lwa Bashakulasangwa pa Mayanda: Ubuyo bwesu kulanda ku bene mayanda abengi nga nshi nga kuti twakumamo. Nga ca kuti tapali nangu umo pa ng’anda ilyo mwayapo, lembeni adresi wa ng’anda iyo no kubwelelapo inshita imbi. Nga ca kuti abene mayanda tabasangilwepo na mu mulungu wa kulekelesha uwa kampeni, napamo kuti mwabashilako trakiti umo uwa Imbila ya Bufumu Na. 36 ukumubika pa ncende ishingamonwa ku bapita nshila. Baeluda kuti baeba icilonganino ukusha trakiti wa Imbila ya Bufumu Na. 36 umuku fye wa kubalilapo basanga ukuti pa ng’anda tapali bantu ilyo balebombela mu mishi na mu ncende umwaba icifulo ca kubombelamo icikulu nga nshi ica kuti te kuti cipwishishiwe conse mu nshita ya kampeni.
9 Lekeni Tupamfiwe! Ifilonganino fifwile ukutukuta ukupwishishisha icifulo cabo ica kubombelamo ilyo kampeni ashilapwa pa November 17. Nga ca kuti icifulo cenu ica kubombelamo cikalamba sana, bakasabankanya bamo kuti babomba beka uko ici cingabomba kabili ukushingaba utupondo. Ukutantika kwa musango yu kukalenga ukuti canguke ukufika pa bengi nga nshi abalefwaya ukusambilila icine. Shininkisheni ukuti mwalemba bwino bwino bonse abalefwaya ukusambilila.
10 Tamulekabila ukuorda trakiti wa Imbila ya Bufumu Na. 36, pantu cila cilonganino ciletuminwa uyu trakiti. Bapainiya baibela, aba nshita yonse, na ba kwafwilisha bakapoka cila muntu batrakiti 100 aba kwananya, e lyo cila kasabankanya akapeelwa batrakiti 30. E co bushe namuipekanya nomba no kufwaisha ukubombesha muli uyu mulimo waibela? Mwandini twalipaalwa pa kuba no mulimo wa kwebako abantu banensu ifyo Lesa alaya ku nshita ya ku ntanshi iipalamishe!