Ukutendeka pa 16 October Ukushinta pa 12 November Kukaba Kampeni Waibela!

¹ “Impela ya Kupepa kwa Bufi Naipalama!” E mutwe wa trakiti ya Mbila ya Bufumu Na. 37, iyo tukapeela abantu bonse isonde lyonse ukutendeka uyu mweshi uleisa. Imilungu ya kubalilapo ibili mu October, tukalapeela abantu bamagazini ba Ulupungu lwa kwa Kalinda na Loleni! Ukutampa pali Cimo, pa 16 October, ukushinta pa Mulungu pa 12 November, tukalasabankanya trakiti ya kuti Imbila ya Bufumu Na. 37. Pa mpela ya milungu ilyo tukaba pali kampeni, tukalashalika bamagazini abapya pamo pene ne yi trakiti.

² Abengabombako: Bonse abasabankanya imbila nsuma bakabombako no mweo onse. Bambi bakapekanya ukubomba bupainiya bwa kwafwilisha. Bushe mwalikwata abana nelyo abo musambilisha Baibolo abalelunduluka? Bafweni ukulanda na baeluda pa kuti bamone nga nabalinga ukuba bakasabankanya bashabatishiwa. Baeluda bakakoseleshe bakasabankanya abanaka pa kutila nabo bakabombeko, nalimo kuti bapekanya ukuti bakabombe na bakasabankanya ababelesha.

³ Ifilonganino fyonse fikapokelela amatrakiti ya Mbila ya Bufumu Na. 37 kabili bakasabankanya bakapokako amatrakiti 24. Bapainiya bena bakapoka amatrakiti 48. Bakasabankanya bonse ilyo bakalalemba lipoti ya mu October na November bakalembe ku numa ya lipoti impendwa ya matrakiti bakashalika. Kalemba akasansha impendwa yonse iya matrakiti icilonganino cikashalika no kutuma kwi ofesi lya musambo pa mpela ya October na November. Amatrakiti ya Mbila ya Bufumu ayakashala kampeni nga yapwa kuti mwayabomfya konse uko muleshimikila.

⁴ Ifyo Tukalalanda pa Kupeela Trakiti: Mukalelanda fye ifyebo ifinono pa kupeela trakiti, ne ci cikalenga mukapeele abantu abengi iyi trakiti. Nalimo kuti mwatila: “Ndesabankanya ilyashi ilyacindama ku cintubwingi kabili uyu mulimo uli fye isonde lyonse. Nalamupeela aka katrakiti ukwabula ukumulipilisha. Mukwai mubelengemo.” Limbi kuti cabapo bwino nga tamusendele icola ilyo muleshimikila ku ng’anda ne ng’anda. Mukwai lembeni bonse abalefwaya ukusambilila Baibolo.

⁵ Ifyo Mwingacita pa Kupeela Abantu Bonse mu Cifulo Cenu: Bombesheni ukusabankanya trakiti ya Imbila ya Bufumu ku ng’anda ne ng’anda na mu ncende sha makwebo, ukucila ukulashimikila fye mu misebo. Lembeni amayanda mushisangilepo abantu, kabili bweleleniko inshita imbi nelyo ubushiku bumbi mu mulungu. Ukutendeka pali Cimo pa 6 November, nga mulefwaya kuti mwasha amatrakiti pa mayanda apashili abantu. Lelo, nga ca kuti icilonganino calikwata icifulo ca kubombelamo icikalamba ico bashingapwisha ukufika pa 12 November, baeluda kuti limbi basalapo ukuti trakiti ya Imbila ya Bufumu bakalesha pa mayanda apashili abantu ukutendeka fye ilyo kampeni ikatampa.

⁶ “Babiloni Mukalamba” ali no konaulwa nomba line. Abantu balingile ukufuma muli Babiloni Mukalamba ilyo ashilaonalwa. (Ukus. 18:8) Pekanyeni bwino ino nshita pa kuti mukabombeko iyi kampeni iikaba mu fyalo fyonse iya kusoka abantu bonse ukuti impela ya kupepa kwa bufi naipalama!