Kampeni Yaibela iya Kushalika Trakiti Ukutendeka pa 20 October Ukuyashinta pa 16 November!
1 Ukutampila pa Mande, pa 20 October, kabili ukutwalilila fye pa milungu ine, tukalashiila abantu trakiti iipya iikwete umutwe wa kuti Bushe Kuti Mwatemwa Ukwishiba Icine? Tulesubila ukuti iyi kampeni yaibela iikabombwa mwi sonde lyonse ikalenga abantu abengi ukufwaya sana ukwishiba icine.—Yoh. 17:17.
2 Iyi trakiti ileasuka amepusho ayacindama 6 aya kuti: “Bushe Lesa alatusakamana?” “Bushe inkondo no kucula fikapwa?” “Cinshi cicitika nga twafwa?” “Bushe umuntu nga afwa ninshi calaala capwa?” “Kuti nacita shani pa kuti Lesa asuke ipepo lyandi?” na “Kuti nacita shani pa kuti mbe ne nsansa?” Amacalici ayaitunga ukukonka Kristu yalifilwa ukwasuka amasuko yalungama kuli aya mepusho. Nangu fye bantu abengi abashili Bena Kristu na bo bene tabaishiba, kabili tabaishiba no kutila amasuko yene yene kuti bayasanga muli Baibolo. Kanshi, tule-enekela ukuti abantu abengi bakatemwa ubukombe buli muli iyi trakiti.
3 Bombeleni Sana mu Cifulo Cenu Ica Kushimikilamo: Esheni na maka ukushimikila ku ng’anda yonse iyaba mu cifulo cenu ica kushimikilamo. Nga ca kutila icifulo cenu ica kushimikilamo cikalamba sana, baeluda nalimo bakamukoselesha ukusha trakiti pa ng’anda apo mushisangile abantu pa muku wa kubalilapo. Ibukisheni ukupeela trakiti abena mupalamano benu, balupwa, abo musambilila nabo ku sukulu, abo mubomba nabo, na bambi abo mulanshanya nabo ilingi. Napamo kuti mwapekanya ukubombako bupainiya bwa kwafwilisha mu October nelyo mu November. Bushe mwalikwata umwana nelyo umusambi wa Baibolo uulelunduluka uo mulemona ukutila kuti afikapo ukubomba pamo na ifwe iyi kampeni nga kasabankanya ushabatishiwa? Nga e fyo cili, ebeni baeluda.
4 Ifya Kulanda: Pa kuti tukashiile abantu abengi iyi trakiti, kuti cawama sana ukulanda fye ifyebo ifinono. Ipusheni abene ba ng’anda icipusho fye cimo pa fipusho 6 ifili pali trakiti no kubalanga icasuko icili mu kati. Ici cikalenga ukuti bakasabankanya bonse bakalelanshanya na bantu ifyebo ukulingana ne fyo abantu mu cifulo ca kushimikilamo balekabila. Nga ca kutila umuntu amoneka ukutila kuti atemwa ukwishiba na fimbi, lembeni ifyebo pali uyo muntu kabili mukabweleleko. Pa mpela ya mulungu, tukalashalika magazini ya nomba line pamo pene na trakiti. Kampeni nga yapwa pa 16 November, tukalashalika icitabo ca kuti Ico Baibolo Isambilisha. Amatrakiti ayakashalapo tukalayashalika filya fine tushalika amatrakiti yonse.
5 Tendekeni Isambililo lya Baibolo: Ico bapekanishishe iyi trakiti kutwafwa ukutendeka amasambililo ya Baibolo. Nga mwabwelela ku muntu uwalefwaya ukwishiba na fimbi, kuti mwamwipusha icine ico Baibolo isambilisha icamusansamwishe nelyo icalengele ukuti omfwe bwino. Mulangeni ifyebo ifili ku numa ya trakiti ifilelanda pe sambililo lya Baibolo, kabili mupeeleni icitabo ca kuti Ico Baibolo Isambilisha. Nga cingacitika, mu kwipifya, lanshanyeni nankwe paragrafu imo nelyo yabili mu cipandwa icilelanda pa lyashi asalile.
6 Yehova alefwaya abantu aba kumupepa mu “mupashi na mu cine.” (Yoh. 4:23) Shi ifwe bonse tukabombeko iyi kampeni yaibela pa kuti tukafwe abantu ukwishiba icine!