Bombeniko na Maka Yonse mu Kulobolola

¹ Bakasesema ba kwa Yehova aba pa kale e lyo na Yesu Kristu umwine balandile pa mulimo wa kulonganya abantu. (Esa. 56:8; Esek. 34:11; Yoh. 10:16) Uyu mulimo nomba ulebombwa ilyo imbila nsuma ya Bufumu ileshimikilwa pano calo ponse. (Mat. 24:14) Apalekanina abalebombela Lesa na bashimubombela paleya palemonekesha. (Mal. 3:18) Bushe ici ciletukuma shani?

² Mulimo wa Muntu Umo na Umo: Kuti twasambililako fimo ku ca kumwenako ca kwa Paulo, uwabombele sana mu kulundulula ubutumikishi bwa Bwina Kristu. Aleimona uwa misha ya kushimikila pa kuti abantu bonse bengaba ne shuko lya kumfwa imbila nsuma no kupusuka. Ici camulengele ukutwalilila ukubacucutikila. (Rom. 1:14-17) Pa mulandu wa fintu fyabipisha ifilecitikila abantu pali lelo, bushe tatulecilanapo ukushingamwa ukushimikila ku baba mu cifulo ca kubombelamo ico twapeelwa?—1 Kor. 9:16.

³ Inshita ya Kucitapo Cimo mu Kampampa: Ukushimikila kuti kwapashanishiwa ku mulimo wa kufwayafwaya abali mu busanso no kubapususha. Abantu balekabila ukusangwa no kwafwiwa ukusange pusukilo ilyo kucili inshita. Inshita isheleko naicepa. Imyeo kuti yaisaloba! E mulandu wine kanshi Yesu acincishishe abasambi bakwe ‘ukulomba Umwine wa kulobolola, ku kuleka atume ababomfi mu kulobolola kwakwe.’—Mat. 9:38.

⁴ Ababomfi ba Bufumu abengi balingilishako imibombele yabo muli uyu mulimo wa kupususha imyeo pa kwishiba ukuti inshita isheleko naicepa. Umupungwe we shina lya Hirohisa aleikala mu ng’anda umwaba fye umufyashi umo na baice bakwe bane. Aleyafwako ulupwa lwakwe pa kushibuka pa 3 koloko ya ku maca no kuya ku kushitisha banyunshipepala. Nangu ni fyo, Hirohisa alefwaya ukulundako ifya kucita mu butumikishi, e co atendeke bupainiya bwa nshita yonse. Bushe kuliko inshila mwingabombelamo na maka yonse muli uyu mulimo uushakabwekelepo?

⁵ “Naipipe nshita iyashalako.” (1 Kor. 7:29) E ico, natubombeko na maka yonse umulimo ushaicindamina uulebombwa lelo pano isonde ponse e kutila ukushimikila imbila nsuma ya Bufumu no kupanga abasambi. Yesu apashenye ubu butumikishi ku kulobolola. (Mat. 9:35-38) Pa kubombako na maka yonse mu kulobolola, ifikafuma mu kubombesha kwesu kuti fyasanshamo ukwafwa umuntu umo ukuba mwi bumba likalamba ilya bakapepa balondololwa pa Ukusokolola 7:9, 10.