Programu Mupya uwa Kulongana kwa Muputule

Akatiina limo kalondololwa ukuti “mucinshi nelyo ukucindika nga nshi, maka maka ukucindika Lesa.” Ubu bulondoloshi kuti bwalenga twaishiba umwalola akatiina kalandwapo mu Malembo ukuti “e kutendeka kwa mano.” (Amalu. 111:10) Lelo muli cino calo ca kwa Satana mwaba no mwenso umbi. Kuti twasengauka shani umwenso ilyo tulelundulula akatiina ka kuli Yehova? Ici cipusho cikaasukwa pali programu mupya uwa kulongana kwa muputule mu mwaka wa mulimo uwa 2002. Umutwe wa kulongana uleti: “Tiineni Lesa no Kumupeelo Mucinshi.” (Ukus. 14:7) Tukomfwa inshila shalekanalekana umo akatiina ka kuli Yehova katunonsesha umuntu umo umo e lyo na bonse ababa mu kuteyanya.

Nangu line ukulanda pa kutiina kuti kwatulenga ukutontonkanya pa kusakamikwa, bukuuwe, nelyo ukutiina ubwafya bumo, Baibolo yena ilanda ukuti: “Alishuka onse uutiina Yehova.” (Amalu. 128:1) Amalyashi ya pa kulongana kwa muputule yakatulanga ifyo twingashipikisha ku mafya ilyo tuletwalilila mu kupepa kwa cine. Tukomfwa ifyo twingafwa abapya ukulundulula akatiina kasuma aka musango yo kuli Lesa, akakabalenga bakafwaye ukumubombela no mutima wabo onse, umweo, umuntontonkanya, na maka. (Marko 12:30) Ilyashi lya kwa kangalila wa citungu ilya mutwe wa kuti: “Lyonse Palameni ku Bantu Mwatemwa,” e likalekeleshako pa bushiku bwa kubalilapo. Akalondolola ifyo twingebukila ku matukuto ya kwa Kaseebanya aya kutufumya kuli Yehova, ku lupwa lwesu na kuli bamunyinefwe Abena Kristu.

Ilyashi lya kukonkana ilya mbali shine ilikabako pa bushiku bwa cibili likaba no mutwe wa kuti: “Tiineni Yehova, Mwitiina Abantu.” Likalondolola ifyo twingacita pa kucimfya no mulandu tufwile ukucimfisha umwenso uwingatucilikila ukufishapo bukapyunga bwesu nelyo ukufilwa ukutwalilila na bumpomfu na kampingu wasanguluka pa sukulu nelyo ku ncito. Ilyashi lya cintubwingi ilya kuti “Tiineni Lesa no Kubaka Amafunde Yakwe” likalondolola ifintu fyalandwapo mu Ukusokolola icipandwa 14. Ukulongana kwa muputule kukasondwelela no kukoselesha kusuma mu lyashi lya kuti: “Twalilileni Ukwendela mu Katiina ka Kuli Yehova.”

Isukulu lya Butumikishi bwa Teokrasi, Ukulongana kwa Mulimo, ilyashi lya lubatisho, no kusupawila Isambililo lya Ulupungu lwa kwa Kalinda ni mbali na shimbi ishacindama ishikabako isho mushingatemwa ukupuswako. Laalikeni abasambi benu aba Baibolo ukuti bakasangweko pamo na imwe. Bonse abalefwaya ukuyabatishiwa bafwile ukweba kangalila wa kutangilila ukwabula ukupoosa ne nshita. Bonse tulefwaya ukulanga ukuti twaba na katiina kuli Yehova kabili tulamucindika pa kukanapuswa ku lyashi nangu limo pali yonse ayakaba kuli uku kulongana ukusuma nga nshi!