Bushe Mulecita Ifyo Mwasambilile kwi Bungano lya Citungu Ilya “Bakasambilisha wa Cebo ca kwa Lesa”?
1 Bonse abasangilwe kwi bungano lya citungu uno mwaka balyumfwile ukuti abantu ba kwa Yehova bafwaya ukufishapo umulimo bapeelwa uwa kuba bakasambilisha wa Cebo ca kwa Lesa. (Mat. 28:19, 20) Ilyo mwabwelelemo ku mwenu, fishinka nshi mwasambilile ifyo mwalefwaisha ukucita mu mikalile yenu na mu mulimo wa mwi bala?
2 Amalembo Yapuutwamo ya Mulimo ku Kusambilisha: Umutwe wa bushiku bwa kubalilapo wakomaile pe lembo lya pali 2 Timote 3:16. Ilyashi likalamba lyalangile ukuti pa kuba “Abateyanishiwa nga Bakasambilisha wa Cebo ca kwa Lesa,” tulingile ukucindamika sana Icebo ca kwa Lesa, ukucipeela umucinshi wacila uo tupeela ku mano ya bantunse yonse nelyo ifishilano, no kucita pe fye ifyabamo. Na kabili tufwile lyonse ukulapepela umupashi wa mushilo ku kutwafwa mu mulimo wesu no kubombesha pa kulundulula icisabo ca uko icacilapo, e kuti ukutemwa. Kabili tufwile ukuleka ukuteyanya kwa kwa Yehova ukwa pe sonde ukutukansha ukuba abatumikishi ukupitila mu kulongana konse ukwa cilonganino.
3 Ilyashi lya kukonkana ilyaleti, “Ukuisambilisha Ilyo Tulesambilisha na Bambi,” lyalondolwele ukuti tufwile ukuba ica kumwenako cisuma pa (1) kukonka amafunde ya kwa Lesa mu mibele yonse iya Bwina Kristu, (2) kulapoosa amano ku kusambilila, no (3) kuleka imibele ya mutima ne mitontonkanishishe iyo Kaseebanya engashukila. Cimbi ico twasambilile ni nshila isho twingabomfya pa kucingilila indupwa shesu ku cinkunka cili mu calo ica kutamba ifye shiku. Abafyashi bakoseleshiwe ukuba ica kumwenako cisuma pa kukanatamba nangu fye panono ifikope filanga ubulalelale no kusopa abana babo ilyo balebomfya intaneti no kutamba televishoni. Fishinka nshi mwasambilile pa bushiku bwa kubalilapo ifyo mwatendeka ukubomfya?
4 Ilyashi lya kusondwelela pali ubu bushiku lyakoseshe ukupingulapo kwesu ukwa kuteesa ulubuuto lwa kwa Yehova, ukupalamina kuli Israele wa kwa Lesa, no kucitako fimo pa kuti abantu ba kwa Yehova babe no mutende. Bushe mwalibelenga icitabo cipya, ica Ukusesema kwa kwa Esaya—Ulubuuto lwa Bantu Bonse 2?
5 Abafikapo Bwino Bwino ku Kusambilisha Bambi: Ilembo lya bushiku bwalenga shibili lyali ni 2 Timote 2:2, NW. Ilyo mwalekutika ku lyashi lya kukonkana ulucelo, bushe mwaliumfwikisha imitubululo pa lwa (1) kufwaya abayana, (2) kukusha ukusekelela kwabo, no (3) kubasambilisha ukubaka fyonse ifyo Kristu asosele? Bushe mulecita ifyo mwasambilile—ukulanga abene mayanda nangu fye icishinka cimo mu Malembo no kulandako fimo ifyo mukesalandapo ilyo mukatandala umuku umbi?
6 Amalyashi ya kasuba yakomaile pa bucindami bwa kupashanya Kasambilisha Mukalamba, Yesu. Ni mwi umo muleesha ukumupashanya? Pa fyo mwasambilile mu lyashi lya kukonkana ilyalenga bubili pali ubu bushiku, ni shani ‘Mwinganonkelamo Nga Nshi mu Masambililo ya Bulesa’? Mitubululo nshi mwakonka pa lwa kulundako inshita mupoosako amano ku fyo mulesambilila pa lwenu na lintu muli ku kulongana kwa cilonganino?
7 Ukwabula ukutwishika, icitabo cili no kufuma icileti Nonkelenimo mu Masambililo ya mwi Sukulu lya Butumikishi Ilya Bulesa cikatwafwa ukulundulula amaka yesu aya kulanda no kuba bakasambilisha wa Cebo ca kwa Lesa. Kukaba ukupoosa sana amano ku milandile ya babomfi ba busumino aba kwa Lesa abalembwa mu Baibolo. Mwi sambililo limo limo mu citabo cipya muli imikululo iikwete amashiwi yanono ayalelanga ico tufwile ukucita, umulandu cicindamine, ne fya kucicita. Muli ne fyo mukabombelapo. Bankashi bakakwata inshila 29 isho bengasalapo pa kulanda ilyashi lyabo. Mu kuya kwa nshita, ukuteuluka kwabilishiwe ku kabako ukulosha ku mitungulwile ye sukulu. Bushe mwaba no mwata usuma uwa kubelenga no kupekanya pa kuti mulenonkelamo sana mwi Sukulu lya Butumikishi bwa Teokrasi cila mulungu?
8 Beni Bakasambilisha pa Mulandu wa Kupita Inshita: Ilembo lya AbaHebere 5:12 lyateyenye imintontonkanya ya bakakutika pa bushiku bwalenga shitatu. Ilyashi lya kukonkana ilyaliko ulucelo lyaleti, “Ukusesema kwa kwa Malaki Kutupekanishisha ku Kwisa kwa Bushiku bwa kwa Yehova,” lyatukoseleshe ukubombela Lesa apapela amaka yesu yonse no kupata ukufutika konse pa kuti twingesapusuka ubushiku bwa kwa Yehova ubukalamba kabili ubwa kutiinya. Icilangililo caleti, “Cindikeni Ubutungulushi bwa kwa Yehova,” calangile maka maka ifyo ukutumikwa, ukufwaye cifulo, akafindwe, no kuluba kwa kwa Kora wa pa kale na banankwe fyabalengele ukucita ifintu fya kupondokela Yehova umwine. Ilyashi lyakonkelepo lyakomaile pa bucindami bwa kunakila ubutungulushi bwa kwa Lesa mu lupwa na mu cilonganino. Ilyashi lya ku cintubwingi ilyaleti, “Ni Bani Balesambilisha Inko Shonse Icine?,” lyalangile ubushinino bwa kuti ni Nte sha kwa Yehova e balecite fyo ukupusanako na ba Kristendomu, abaitunga fye ukuti balasambilisha icine ca mu Baibolo.
9 Cailanga fye apabuuta ukuti ni Yehova e uletukansha bwino ifya kusambilishe Cebo cakwe. Natulebomfya ifyo twasambilile, ‘ukuimona fwe bene, ne sambilisho lyesu, pa kuti twingaipususha fwe bene na baletuumfwa.’—1 Tim. 4:16.