Ulubali 1—Ifyo Tupaalwa nga Tuletasha pa fyo Yehova Atutemwa
1 Umutumwa Yohane alembele ati: “Ifwe twatemwa, ico Wene [Yehova] abalilepo ukututemwa.” (1 Yoh. 4:19) Nga twatontonkanya pali fyonse ifyo Yehova atupeela, tulacincishiwa ukutasha pali fyene. Yesu atwimikile ica kumwenako ca kutasha. Pa kuba ne cumfwila, ashimikile pa lwe shina lya kwa Lesa no Bufumu. (Yoh. 14:31) Kuti cawama twabebeta inshila shimo isho twingatashishamo pa fyo Yehova atutemwa ne fyo tupaalwa nga twacite fyo.
2 Ukuya ku Ng’anda ne Ng’anda: Yesu asambilishe abasambi bakwe ifya kushimikila pa lwa Bufumu. Ifyo abebele fyalangile bwino bwino ukuti baleya ku ng’anda ne ng’anda, balebilisha imbila nsuma ku ncende ishingi. (Luka 9:1-6; 10:1-7) Tukabila ukutemwa Lesa na banensu pa kutwalilila ukushimikila ku ng’anda ne ng’anda ilyo twakumanya abakaanya na bashangwa ku fyo tulanda. Lelo, nga tuleshimikila ku ng’anda ne ng’anda tulanonkelamo pantu icitetekelo cesu cilakoselako, tulashininwa sana, ne subilo lyesu lilakoselako.
3 Apo tutungululwa na bamalaika muli uyu mulimo, twalisanga ababa ne nsala ne cilaka ca kufwaya ukumfwe cine. (Ukus. 14:6) Abene ba mayanda balasosa ukuti baalepepa ukuti bafwiwe ilyo Nte akonkweshe pa ciibi. Inte shibili no mwaice baleshimikila ku ng’anda ne ng’anda pa cishi ca ku Caribbean. Ilyo abakalamba bafwaile ukwinuka, umwaice ena atwalilile eka no kuyakonkonsha pa ng’anda yakonkelepo. Umukashana aiswile icibi. Ilyo abakalamba bamwene ifi, baile kuli wene no kulanda nankwe. Abebele ukwingila mu ng’anda no kulondolola ukuti alepepa kuli Lesa ukuti atume Inte ku kwisamusambilisha Baibolo!
4 Ukushimikila mu Musebo: Apo calyafya mu ncende shimo ukusanga abantu pa mayanda, ukushimikila mu musebo kulafwa sana ukusanga abantu. Na kabili, abengi bekala mu mayanda ayacingililwa sana uko tushingashimikila ku ng’anda ne ng’anda. Lelo, ukutasha Yehova pa fyo atutemwa, kutucincisha ukubomfya inshila yonse iyo twingebelamo abantu ubukombe bwa Bufumu, ukusanshako no kushimikila mu musebo.—Amapi. 1:20, 21.
5 Ifipempu fya Kubwelelamo: Apo tufwaya “abaibukila ukuti balakabila ifya ku mupashi,” tufwaya ukubombesha apo twingapesha ukuti twikushe ukukabila kwabo. (Mat. 5:3, NW) Ici cikabila twabwelela mu kutapilila imbuto sha cine isho twabyele. (1 Kor. 3:6-8) Nkashi ku Australia ashilile trakti ku mwanakashi uwamoneke kwati tapooseleko mano. Lelo, nkashi apampamine fye pa kubwelela kuli wene ukuti akamusange pa ng’anda na kabili. Ilyo amusangile kuli pele pele, nkashi yesu aishibe ukuti pa numa ya kumutandalila pa muku wa kubalilapo, uyu mwanakashi alishitile Baibolo uwa mutengo. Nkashi atendeke ukusambilila nankwe!
6 Ukutungulula Amasambililo ya Baibolo: Ulu lwaba lubali lwa butumikishi bwesu ulo twingaipakisha no kulambwilwapo sana. Mwandini lipaalo ukwafwa abantu ukusambilila pa lwa kwa Yehova, ukumona bayalula imikalile yabo pa kuti bamusekeshe, lyene no kumona uko babatishiwa ku kulangilila ukuipeela kwabo kuli Lesa nga Abena Kristu!—1 Tes. 2:20; 3 Yoh. 4.
7 Mu Ubutumikishi Bwesu Ubwa Bufumu ubukakonkapo, tukabebeta inshila na shimbi umo tupaalilwa nga tuletasha pa fyo Yehova atutemwa.