Lungikeni Ukusose Cebo ca kwa Lesa

¹ Ilyo aleshimikila ku mulashi, “Filipi ayasamwine akanwa kakwe, no kutendeka pe lembo [limo ifi], amushimikile Yesu.” (Imil. 8:35) Filipi ‘alilungike ukusose cebo ca Cine.’ (2 Tim. 2:15) Nangu cibe fyo, pali lelo, bakangalila benda balimona ukuti bakasabankanya abengi tababelenga sana Baibolo ilyo baleshimikila. Bushe mulabomfya Baibolo mu butumikishi bwenu?

² Mu Cebo ca kwa Lesa e mwafuma fyonse ifyo twasumina ne fyo tusambilisha. (2 Tim. 3:16, 17) Ni ci Cebo e cikula abantu ukwisa kuli Yehova no kubasambilisha pa kuti bakabe no mweo. E mulandu wine cacindamina ukuti tulebomfya Baibolo mu butumikishi bwesu ukucila ukulalanda fye pa malyashi ayo tutemenwe. (Heb. 4:12) Pa mulandu wa kuti abantu abengi baishiba fye ifinono pali Baibolo, tufwile ukubelenga yene pa kuti tubalange ifyo ubutungulushi bwaba mu Baibolo bwafwa abantu ne fyo yalaya abantunse ku ntanshi.

³ Belengeni mu Kulungatika Muli Baibolo: Napamo kuti mwaesha ukuya mu kushimikila ukwabule cola ca fitabo. Kuti mwabika impapulo shiletambikwa isho mulefwaya ukuyashalika muli faelo no kwesha ukusenda Baibolo ku minwe. Lyena, ilyo mwatendeka ukulanshanya na umo, kuti mwabula Baibolo ukwabulo kuti mulenge uyo muntu ukumona kwati mwalatendeka ukumupepesha nga mu calici. Iminineni mu musango umo uwa kuti uo muleshimikila alekonkamo ilyo mulebelenga Baibolo wenu. Nalimo kuti mwamulomba ukubelenga icikomo cimo mu kupongomoka. Ifyebo kuti fyamufika pa mutima nga aimwena ifyo Baibolo isosa ukucila nga alekutika fye kuli imwe. Kwena, pa kuti mumwafwe ukumfwikisha ico mwabelengela ilembo, pa kubelenga mufwile ukushimpa amashiwi yapulilemo.

⁴ Ukushimikila kwa Kubelengako Ilembo Limo: Ilyo mwapwisha ukuilondolola, kuti napamo mwatila: “Abantu bafwaya ubutungulushi mu mikalile yabo ukufuma ku ntulo shalekanalekana. Ni ku ntulo nshi imwe mulemona ukuti e kwingafuma ubutungulushi bwingabomba bwino? [Lekeni asuke.] Cinshi mwingasosa pali aya mashiwi? [Belengeni Amapinda 2:6, 7, lekeni asuke.] Amano ya buntunse yalifilililwa fye ukutungulula abantu, yalenga fye abengi ukupelelwa. Lelo amano ya kwa Lesa, yena yaba pe ayacetekelwa kabili aya kunonsha.” Lyene mulangeni ulupapulo muleshalika, kabili soobolenimo ica kumwenako cimo icilelangilila ifyo amano ya kwa Lesa yabomba bwino.

⁵ Yesu abomfeshe Amalembo ku kwafwa abafumacumi. (Luka 24:32) Paulo alelondolola no kushininkisha ifyo alesambilisha ukupitila mu kubelenga Amalembo. (Imilimo 17:2, 3) Tukacilapo ukuicetekela no kusekelela mu butumikishi nga twaba abalamuka mu kulungiko kusose Cebo ca kwa Lesa.