Bushe Muleba Abantu Ifyaba mu Cebo ca kwa Lesa?

¹ Mu calo umo abantu basuula Baibolo, Abena Kristu bene bene baleba abantu ifyo Icebo ca kwa Lesa cilanda. Apo twalicetekela ukuti “Amalembo yonse yantu yapuutwamo kuli Lesa,” tulasuminisha filya Yesu Kristu alandile mwi pepo kuli Yehova ati: “Icebo cenu e cine.” (2 Tim. 3:16; Yoh. 17:17) Bushe finshi tulingile ukucita pa kuti tuleafwa abantu ukwishiba bwino sana ifyo Icebo ca kwa Lesa cilanda?

² Sambilileni Amalembo: Te ca kutwishika no kutwishika ukuti Yesu alibikile sana amano ku kuisambilisha umwine Icebo ca kwa Lesa. E calengele ukuti alesambilisha abantu ifya mu Malembo inshita yonse ilyo alebila imbila nsuma. (Luka 4:16-21; 24:44-46) Bushe kuti twacita shani pa kuti tuleibukisha amalembo ayengi? Kuti twacite fyo nga tulebelenga Baibolo cila bushiku e lyo no kutontonkanyapo sana pa cikomo ico twaumfwa ukuti catukoselesha nangu ico tulemona ukutila kuti twacibomfya mu mulimo. Ilyo tulepekanya ukulongana, tufwile ukubelenga amalembo mu Baibolo na ayo bashambwile mu kulungatika e lyo limbi no kupekanya ifyo twalayalandapo pali ayo malembo. Ilyo tuli pa kulongana, kalanda nga alebelenga ilembo, na ifwe tufwile twakonkamo, tulebelenga muli Baibolo yesu. Nga twasambilila amalembo ya mu Baibolo ninshi tukeshiba ‘ukulungika bwino icebo ca cine.’—2 Tim. 2:15.

³ Belengeleni Abantu Baibolo: Ilyo tuli mu mulimo wa mwi bala, tufwile ukubelengela abantu Baibolo. Ica kumwenako fye, nga ca kuti kuli inshita kuti twabelengela umwine wa ng’anda ilembo limo no kulanshanya nankwe. Nga aipusha icipusho nangu alekaanako fimo, kuti cawama ukubelenga Baibolo pa kwasuka. Nga ca kuti umwine wa ng’anda takwete inshita, limbi kuti cawama twalandako fimo ifyalembwa mu Baibolo, limbi kuti twati fye, “Ilyo nshilaya, ndefwaya imwebeko ifyalembwa pali ili lembo.” Lyonse muleesha na maka ukubelenga muli Baibolo, no kuleka uo mulelanda nankwe amona ifyo mulebelenga mu Baibolo.

⁴ Ilyo umwine wa ng’anda umo bamulangile amalembo ayalelangilila ukuti muli Lesa umo tamwaba balesa batatu, alipapile no kulanda ukuti, “Yangu! ndaya lyonse ku ceci, lelo nshaishiba ukuti Baibolo yalilandapo ifi pali ili lyashi!” Alisumine ukulasambilila Baibolo. Yesu atile, impaanga shakwe shili no kulaumfwa kwi shiwi lyakwe. (Yoh. 10:16, 27) Nga tulefwaya abafumacumi beshibe icine ca mu Baibolo, tufwile ukuleka baimwena abene ifyo Amalembo yalanda. E ico natulelanda icine caba mu Cebo ca kwa Lesa!