Mulandu Nshi uwa Kukonkanyapo Ukushimikila?

¹ Bushe umulimo wa kushimikila pa Bufumu walibombwa pa nshita ntali ku mwenu? (Mat. 24:14) Nga e fyo cili, kuti mwatila icifulo ca kushimikilamo ica cilonganino cenu calibombelwamo sana. Nomba ilyo muleshimikila, nalimo abantu tabapoosako amano ku bukombe bwa Bufumu. Nalyo line, moneni icalandwa pa basambi ba cine aba kwa Yesu pe bula 141 mu citabo ca Ukusesema kwa kwa Esaya 2 ati: “Mu ncende shimo, ifiletumbuka mu butumikishi bwabo kuti fyamoneke fishacindama nga kufilinganya ku mulimo balebomba na maka balebomfya. Nalyo line, balashipikisha.” Lelo mulandu nshi uwa kukonkanyapo fye ukushimikila?

² Ibukisheni Yeremia: Tufwile lyonse ukushipikisha mu mulimo wa kushimikila nangu ca kutila abantu baleumfwa nelyo balekaana ukumfwa. Yeremia ashimikile pa myaka 40 mu cifulo cimo cine nangu ca kuti banono fye baumfwile kabili abengi balekaana ubukombe bwakwe. Mulandu nshi Yeremia atwalilile? Pantu alebomba umulimo Lesa amwebele ukubomba kabili ifyo aishibe pa fyali no kucitika ku ntanshi fyamulengele ukutwalilila ukubilisha.—Yer. 1:17; 20:9.

³ E fyo cili na lelo. Yesu “atukonkomeshe ukubila ku Bantu, no kushimikisho kuti e wasalwa kuli Lesa ku kuba Kapingula wa ba mweo na bafwa.” (Imil. 10:42) Mu bukombe tubilisha mwaba umweo ne mfwa ku bakutika. Abantu bakapingulwa ukulingana ne fyo bankula ku mbila nsuma. Apo cili ifi, umulimo wesu kucita ukulingana ne fyo twaebwa. Nelyo fye abantu bakaana ukumfwa, ici citupeela ishuko lya kulanga ifyo twabatemwa ne fyo twaipeela kuli Yehova pa kupampamina ukucita ico tufwile ukucita. Lelo kwaliba na fimbi.

⁴ Tulemwenamo: Ukucita ukufwaya kwa kwa Lesa, te mulandu ne fyo abantu baleyankulako mu cifulo cesu ica kubombelamo, kutulenga ukukanasakamikwa, ukwikushiwa, no kuba ne nsansa, ifishingasangwa kumbi. (Amalu. 40:8) Tulaba ne mikalile ine ine. Ilyo twacishapo ukubomba mu butumikishi, icitetekelo ca kwisaikala mu calo cipya ica kwa Lesa cilakulilako. Ukutontonkanya pali aya malayo ya mu Malembo kulatulenga ukubelako aba bumupashi no kukosha bucibusa bwesu na Yehova.

⁵ Nangu ca kuti tatumwene ifiletumbuka mu mulimo wa kushimikila apo pene fye, nalimo ulubuto lwa cine ulwabyalwa mu mutima wa muntu lukapuuka mu nshita ya kwa Yehova umwine. (Yoh. 6:44; 1 Kor. 3:6) Takwaba nangu umo uwaishiba abali no kusambilila pa lwa Bufumu ukupitila mu kubombesha kwa bantu ba kwa Yehova, aba muli cino calo nelyo aba mwi sonde lyonse.

⁶ Ino e nshita ya kumfwila sana ukukonkomesha kwa kwa Yesu ukwa kuti: “Cenjeleni, loleni kabili pepeni; pantu tamwaishiba ilyo inshita ikesabako. Awe ico ndeeba imwe, ndeeba bonse, nati, Loleni.” (Marko 13:33, 37) Shi, ifwe bonse tutwalilile ukubilisha imbila nsuma iya Bufumu, ukulenga umutima wa kwa Yehova ukusamwa ilyo tulebombako umulimo wa kushisha ishina lyakwe ilikulu kabili ilyashila.