Umulandu Tuyila ku Bantu Libili Libili
1. Cipusho nshi twingepusha icakuma umulimo wesu uwa kushimikila imbila nsuma?
1 Mu ncende ishingi tulashimikila sana mu fifulo batupeela ifya kushimikilamo. Tulabwelelako sana ku bantu bamo bene, nangu ca kutila limo limo abene ba mayanda tabafwaya ukukutika kuli ifwe. Mulandu nshi lyonse tuyila ku bantu abashalefwaya ukukutika ilyo twabatandalile?
2. Mulandu nshi uukalamba uo tushilekela ukushimikila?
2 Twalitemwa Yehova na Bantu: Umulandu uukalamba uo tushilekela ukuya mu kushimikila ni co twalitemwa Yehova. Umutima wesu ulalenga twatwalilila ukwebako abantu bambi pali Lesa wesu uwakulisha. (Luka 6:45) Ukutemwa twatemwa Yehova e kulenga tuleumfwila amafunde yakwe kabili tulaafwa na bantu bambi ukucita cimo cine. (Amapi. 27:11; 1 Yoh. 5:3) Icilenga ukuti tube abacishinka no kushipikisha muli uyu mulimo te pa mulandu wa fyo abantu bankulako lintu tulebashimikila. Ilyo Abena Kristu ba kubalilapo balebacusha, balitwalilile ukushimikila “ukwabulo kuleka.” (Imil. 5:42) Abantu nga bakaana ukukutika, na ifwe tatuleka ukushimikila kabili tatufuupulwa, tutwalilila fye abakosa. Ukucita ifi kulanga ukuti twalitemwa Yehova kabili twaliipeelesha kuli wena.
3. Bushe ukutemwa abantu kuti kwatwafwa shani ukutwalilila ukushimikila?
3 Na kabili tulatwalilila ukushimikila abantu pantu twalibatemwa. (Luka 10:27) Yehova tafwaya umuntu nangu umo ukonaika. (2 Pet. 3:9) Nelyo fye ni mu fifulo umo tushimikila lyonse, tucili tulasangamo abantu abafwaya ukubombela Yehova. Ku ca kumwenako, mu Guadeloupe, abantu 214 balibatishiwe umwaka wapwile nangu ca kutila pa bantu 56 umo fye e uba Inte ya kwa Yehova. Abantu nalimo 20,000 e basangilwe ku Cibukisho. Kanshi kuti twatila pa bantu nalimo 22 mu Guadeloupe, umuntu umo pali aba e wasangilwe ku Cibukisho!
4. Bushe fintu fyaluka shani mu cifulo tushimikila?
4 Ifintu Filaluka mu Cifulo Tushimikila: Abantu abapusanapusana balakuukila mu cifulo tushimikila. Lintu twabwelela pa ng’anda apo twasangile abantu bashalefwaya ukukutika, limbi kuti twasangapo lupwa umbi nalimo uushaumfwapo no bukombe bwesu. Nelyo kuti twasanga palikuukila abantu bambi abafwaya ukusambilila. Abana abakulila pa bafyashi abashifwaya ukusambilila Baibolo, nga batendeka ukuikalila nalimo kuti bafwaya ukukutika ku bukombe bwa Bufumu.
5. Fintu nshi nalimo ifingalenga abantu ukufwaya ukukutika ku mbila nsuma?
5 Abantu nabo balaaluka. Inshita imo umutumwa Paulo ali ‘uwa miponto kabili uwalecusha abantu kabili uwa musaalula.’ (1 Tim. 1:13) E fyo caba na lelo line, abengi pali ino nshita ababombela Yehova kale tabalefwaya ukusambilila icine. Bamo nalimo balekaaninina fye ndai ukumfwa ku mbila nsuma. Bambi nabo abalekaana ukumfwa ku mbila nsuma napamo nomba kuti bafwaya ukukutika pa mulandu wa kumona imibele mu calo yayaluka. Bamo na bo kuti bafwaya ukukutika nga ca kutila icibi cimo cabacitikila pamo nga imfwa ya muntu umo mu lupwa, incito nga yapwa, nga tabakwete indalama, nelyo nga balwala.
6. Mulandu nshi tufwile ukutwalilila ukuba abacincila ilyo tulebila imbila nsuma?
6 Cino calo calapwa, umulimo wa kushimikila abantu no kusambilisha wena uleya fye pa ntanshi. (Esa. 60:22) E ico kanshi, tulatwalilila ukuba abacincila mu kushimikila no kulwisha na maka yonse pa kutila tatufupwilwe ilyo tulebomba uyu mulimo. Nalimo umuntu umbi uo twalanda nankwe kuti afwaya ukukutika. Ifwe tulekabila fye ukutwalilila ukulalanda na bantu! ‘Nga tulecita ifyo tukaipususha fwe bene na baletuumfwa.’—1 Tim. 4:16.