Mulandu Nshi Tutwalilila Ukulabwelelako?
1 Bushe mwalibala amuipushapo ico cipusho, nakalimo ilyo mwalepekanishisha ubushiku bwa kubomba mwi bala? Mu ncende shimo umo tubomba mu cifulo cesu libili libili, abene mayanda abengi balatwishiba no kututamfya mu kwangufyanya. Banono fye nga nshi bengankulako mu nshila isuma. Nalyo line, kwalibako imilandu yakosa iingi iitulenga ukubwelelako.
2 Uwa kubalilapo, twalikambishiwa ukutwalilila ukushimikila ubukombe bwa Bufumu ukufikila impela ikese. (Mat. 24:14; 28:19, 20) Kasesema Esaya alipwishe ubutali bwa nshita aali no kutwalilila ukushimikila. Icasuko bamwaswike calembwa pali Esaya 6:11. Mu kumfwika, aebelwe ukutwalilila ukulabwelela ku bantu no bukombe bwa kwa Lesa. Mu kupalako ilelo, nangu cingati abantu nalimo kuti batutamfya, Yehova atwenekela ukutwalilila ukuya ku bantu bekala mu cifulo cesu. (Esek. 3:10, 11) Ici caba cishingamo cashila ico twaseekeshiwa.—1 Kor. 9:17.
3 Umulandu na umbi uwa kuti tuletwalilila ukubwelelako wa kuti cilatupeela ishuko lya kulangisha fintu ukuipeelesha kwesu kuli Yehova kwashika. (1 Yoh. 5:3) Pa mbali ya ico, lintu twalanguluka pa fikacitikila abantu ku ntanshi mu kwangufyanya, mulandu nshi twingalakwindila ukusoka abanensu mu kutemwa? (2 Tim. 4:2; Yako. 2:8) Bucishinka bwesu mu kubomba umulimo wesu bulalenga abantu ukuba na mashuko ya kwankula ku bukombe bwe pusukilo ubwa kwa Lesa, pa kuti bekalanda ukuti tabasokelwe.—Esek. 5:13.
4 Mu kulundapo, tatwingeshiba lintu abantu bamo bengaluka imitima. Kuti caba mibele yabo iyayaluka e ingalenga, akayofi mu lupwa lwabo, nelyo imibele ya calo iyo ibalenga ukutontonkanya mu kukatama pa lwa nshita ya ku ntanshi. Lubali lumbi, ico twalanda pa mwabo nalimo kuti cabalamuna ukwankulako kusuma. (Luk. Mil. 9:11; 1 Kor. 7:31) Na kabili, abantu balakuuka. Nakalimo kuti twasanga abene mayanda abapya mu cifulo cesu abo bengakutika ku mbila nsuma—nakalimo abakalambako abo nomba baleikalila kabili abaletontonkanya mu kukatama pa lwa mifwaile yabo mu bumi.
5 Bushe tukatwalilila ukubwelelako? Ee! Amalembo yalatukunta mu kufikapo ukubwelela ku bantu libili libili. Mu kupelako, lintu umulimo wa kushimikila wapwishishiwa, Yehova akatupaala pa kubomba mu kutwalilila mu butumikishi, kabili akapaala abo abayankulako bwino ku mbila nsuma iya Bufumu.—1 Tim. 4:16.