Twalilileni Ukushimikila!
1 Lesa afwaya “abantu bonse ukupusuka no kufika ku kwishibe Cine.” (1 Tim. 2:4) Ecalenga ukuti atutume ukulashimikila imbila nsuma. (Mat. 24:14) Nga ca kuti twatesekesha umulandu tulingile ukutwalilila ukushimikila, ninshi ukufuupula ukuli konse nelyo ukupumbula kwingesa teti kutubweseshe numa.
2 Mulandu Nshi Tufwile Ukukoselela? Kwaba ifingi ifipumbula abantu mu calo ifingabalenga ukulaba nelyo ukwangusha ifyo tubeba. E co tufwile ukutwalilila ukubacinkulako ubukombe bwa kwa Lesa ubwe pusukilo. (Mat. 24:38, 39) Ukulunda pali fyo, imikalile ya bantu ilaluka cila nshita. Nangu fye fintu mu calo kuti fyayaluka mu kupumikisha. (1 Kor. 7:31) Imikalile ya bantu tushimikilako kuti yayaluka mailo, uyu mulungu, nelyo umweshi uleisa, kabili kuti bakwata amafya na masakamika ayengabalenga ukutontonkanyapo sana pa mbila nsuma tubashimikila. Bushe tamutasha pa kuti Nte wamuletele icine alikoselele?
3 Ku Kupashanya Inkumbu sha kwa Lesa: Yehova mu kutekanya alileka inshita yapita ilyo ashilapingula ababifi. Ukupitila muli ifwe alitwalilila ukupaapaata aba mitima yalungama ukuti bapilibukile kuli wene no kupusuka. (2 Pet. 3:9) Nga tatulebilisha ubukombe bwa nkumbu ubwa kwa Lesa ku bantu no kubasoka pa lwa bupingushi bwa kwa Lesa ubuleishila bonse abashitaluka imibele yabo ibi, kuti twaba no mulandu wa mulopa. (Esek. 33:1-11) Nangu ca kuti abantu te lyonse bakutika ku kushimikila kwesu, te kwesha ukunakuka no kuleka ukubombesha mu kwafwa abafumaluka abatesekesha inkumbu shakulisha isha kwa Lesa.—Imil. 20:26, 27; Rom. 12:11.
4 Ku Kulangilila Ifyo Twamutemwa: Ni Yehova Lesa e wasosele ukupitila muli Yesu Kristu ukuti imbila nsuma ishimikilwe isonde lyonse. (Mat. 28:19, 20) Nangu abantu bakaane ukukutika, twalikwata ishuko lya kulangilila ukutemwa twatemwa Lesa ne fyo twaipeelesha kuli wene ukupitila mu kukoselela ukucita icalungama.—1 Yoh. 5:3.
5 Shi natupampamine pa kutwalilila ukushimikila! Lekeni tucite fyo no kupimpa ilyo bucili “bushiku bwe pusukilo” ubwa kwa Yehova.—2 Kor. 6:2.