“Ifya Bupe ku Bantu” Bacema Umukuni wa kwa Lesa no Mukoosha
1 Mwandi Yehova aliteyanya bwino ukupitila mu Mwana wakwe pa kutupeela ‘ifya bupe ku bantu’! (Efes. 4:8, 11, 12) Balikwata imilimo iingi, pamo fye no kucema umukuni wa kwa Lesa mu kupimpa no mukoosha. (1 Pet. 5:2, 3) Ifwe bonse tulamwenamo muli uku kuteyanya tukabila sana. Aba bantu bafwaisha onse ukuba bwino lwa ku mupashi nampo nga bamo nabakwata amafya, bapya, bali no bunake bumo, nelyo balipumbuka.—Fil. 2:4; 1 Tes. 5:12-14.
2 Ilyo ifimfulunganya filecitika mu calo fyaleta umunsokwe, aba bakacema banono baba “ngo mwa kufisama ku mwela, ngo mwa kubelama ku kupongoloka kwa mfula.” Balatupuupuutula ilyo twafunshika nelyo ukufinwa kabili tulefwaya icisansamushi. Ilyo cabe fyo, baba “nge mimana ya menshi apaumisha” nelyo “nge cintelelwe ca cilibwe cikalamba mu calo icatembuka.”—Esa. 32:2.
3 Ukukoselesha Abanaka: Baeluda balebombesha ukukoselesha bamanshintula nelyo abanaka, ukubafwa ukutendeka na kabili ukubombako imilimo ya cilonganino. Ifipempu fya bucemi ificitilwa mu kutemwa fyalyafwa abengi ukusangwa ku kulongana kwa cilonganino lyonse no kukoshiwa lwa ku mupashi ica kutila batendeka na kabili ukubombako umulimo wa mwi bala. Ukubombesha konse ukwa baeluda kulanga ukutemwa kwa kwa Yehova no butungulushi busuma ubwa kwa Yesu Kristu. Atubikile ica kumwenako ku kutulanga ifya kusakamana impaanga shakwe abengapumbuka nelyo ukuluba.—Mat. 18:12-14; Yoh. 10:16, 27-29.
4 Bakacema banono bamona ifishibilo filanga ukutila umo alepungaila lwa ku mupashi. Onse uulemoneka ukufupuulwa, uusangwa ku kulongana limo limo, nelyo uushibomba libili libili umulimo wa mwi bala ilingi line akabila ubwafwilisho bwa ku mupashi. Baeluda balafwaisha ukwaafwa onse uwatendeka ukukonkelela imifwalile ya ku calo ne misakwile nelyo uwapata icilonganino. Bakangalila baangwa no kutemwa abantu icine cine, balaitemenwa ‘ukupeela imitima yabo iine’ pa kwesha ukwaafwa aba musango yo ukubukulula ukutemwa Yehova.—1 Tes. 2:8.
5 Ku numa uku, Abena Kristu baipeela balileka ukubishanya ne cilonganino, calenga baleka no kushimikila pa mulandu wa kunashiwa ku kulwala, ukubulwa indalama, nelyo amafya ya mu lupwa. Ukwabula ukukosha ifintu, baeluda mu cikuuku bapeela ubushinino bwa kuti Yehova alasakamana impaanga shakwe shonse no kushilama pa nshita ya mafya. (Amalu. 55:22; 1 Pet. 5:7) Bakacema ba mukuni abaibukila kuti bayafwa umukuni ukwibukisha ukuti nga ‘bapalama kuli Lesa, na o alapalama kuli bena,’ akabasansamusha no kubapembula.—Yako. 4:8; Amalu. 23:3, 4.
6 “Ifya bupe ku bantu” maka maka balebukisha ifyo bamunyinabo bakabila lwa ku mupashi pali ino nshita ya mwaka, e kutila inshita ya Cibukisho. Mwandi ni nshita yalinga kuli baeluda ukubombesha pa kwaafwa bonse abapumbuka ukuipakisha na kabili insansa no mutende wa mutontonkanya uubako fye lintu mu cilonganino muli ukubishanya kusuma! Tulasekelela icine cine ilyo twamona ‘aba bwananyina bwa mu citetekelo’ ku kulongana kwa cilonganino na lintu bali mu mulimo, balekosha icitetekelo cabo mwi lambo lya cilubula.—Gal. 6:10; Luka 15:4-7; Yoh. 10:11, 14.