Lundeniko Ukusekelela Kwenu mu Kushimikila
1 Bushe muleipakisha ukusekelela kwaba mu kushimikila imbila nsuma mu butumikishi bwenu? Nga tatucenjele, icalo twaikalamo umwaba ububifi kuti catuletela umwenso wa kushimikila, calenga no kusekelela kwesu ukupwa. Ukushimikila mu ncende umo abantu bashankulako bwino kuti kwatufupula. Finshi tulingile ukucita pa kusekelela nga nshi mu butumikishi?
2 Mulesuubila Ifintu Ukuwama: Ukusuubila kulaafwa sana. Cimo icingatwafwa ukuba no ko kusuubila kwetetula pe shuko lishaikulila twakwata ilya kuba “babomfi ba kwa Lesa abalebombela pamo.” (1 Kor. 3:9) Na Yesu wine abombela pamo na ifwe ku kupwisha uyu mulimo. (Mat. 28:20) Kabili ena no mulalo wakwe uwa bamalaika balatutungilila. (Mat. 13:41, 49) Kanshi kuti twacetekela ukuti ni Lesa e utungulula ukubombesha kwesu. (Ukus. 14:6, 7) E co te mulandu na fintu abantu bamo bengankulako ku mulimo wesu, ifyo aba ku muulu bamona umulimo e fitulenga ukusamwa icine cine!
3 Pekanyeni Bwino: Ukupekanya bwino na ko kulatulenga ukusekelela nga nshi. Ukupekanishisha ubutumikishi takufwile ukuba mulimo uukalamba. Maminiti fye yanono e yakabilwa pa kupituluka mu fya kuyatendekelapo ukulanda ifili muli bamagazini ba nomba nelyo impapulo shileshalikwa uyo mweshi. Saleni ifya kulanda mu Ubutumikishi Bwesu Ubwa Bufumu pa cipande citila “Ifya Kulanda Pali Bamagazini.” Moneni ica mukati ca January 2002, icitila, “Imitubululo pa fya Kulanda mu Mulimo wa Mwi Bala,” nelyo belengeni mu citabo ca Ukupelulula pa mitendekele isuma. Nga ca kutila kuliko icintu cimo icilemucilikila ico abene ng’anda batemwa ukulandapo, pekanyeni ifyasuko fingasuminishanya na fintu balelanda kabili tendekeni ukulanda ilyashi ilyo bengatemwa ukuumfwa. Icitabo ca Ukupelulula cilaafwa sana pa fyo mwingacita ifyo. Ukubomfya ishi mpapulo kukatulenga ukuba abaicetekela. Kabili ici e co tukabila pa kushimikila no kusekelela.
4 Pepeni no Mukoosha: Pa kulasekelela lyonse ipepo lyalicindama. Apo umulimo tulebomba wa kwa Yehova, tufwile ukulomba umupashi wakwe, icisabo cimo ica uyu wine mupashi caba kusekelela. (Gal. 5:22) Yehova akatupeela ubukose pa kuti tutwalilile ukushimikila. (Fil. 4:13) Ukupepela ubutumikishi bwesu kuti kwatwafwa ukumfwikisha ifintu bwino lintu ifyabipa fyatucitikila. (Imilimo 13:52; 1 Pet. 4:13, 14) Nga batutiinya, ipepo kuti lyatwafwa ukutwalilila abashipa no kuba ne nsansa.—Imilimo 4:31.
5 Fwayeniko Inshila sha Kushimikilamo: Kwena, nga ca kutila twasanga abantu mu butumikishi no kubashimikila tulasekelela. Ukwalula imibombele yenu iya kuya ku ng’anda ne ng’anda pa nshita shapusanapusana, napamo ukuyako akasuba nelyo icungulo kasuba, kuti kwalenga mwalabomba bwino. Lyonse ilyo muleenda mu musebo, ilyo mwaya ku kushita fimo, ilyo muli muli motoka, nelyo ilyo muli mu parka mulakumanya abantu. Cinshi teti mupekanishishe amashiwi ya kutendekelako ukulanshanya ayepi no kuitendekelako ukulanda na bantu abalemoneka ukuba na bucibusa? Kuti nalimo mulabomba incito nelyo mulaya ku sukulu lya buteko, uko mulanda lyonse na bambi. Kuti mwaba ne shuko lya kucitilo bunte lintu mwatendeka ukulanshanya ilyashi lya mu Malembo ilingalenga bafwaya ukwishibilapo na fimbi. Imitubululo iisuma ili pe bula lya kubalilapo ilya ca mukati ca Ubutumikishi Bwesu Ubwa Bufumu ubwa mu January 2002. Ukubombesha kwenu konse pali uku kuti kwalenga mwalasekelela nga nshi mu kushimikila.
6 Apo ukusekelela kulatwafwa ukushipikisha, calicindama ukutwalilila na ko! Nga twacita ifyo, tukaseepa icilambu icikulu ilyo uyu mulimo uushakabwekeshiwepo ukapwa. Ukwenekela ifyo fintu kweka kweka kuti kwalundako ukusekelela mu kushimikila.—Mat. 25:21.