Tekeni Imitima ku fyo Mwakwata
1 Amalembo yatukonkomesha ukuteyanishisha aba mu ng’anda yesu ifya ku mubili, lelo ici tacifwile ukuba e buyo bukalamba mu mikalile yesu. Ifya ku mupashi fifwile ukwisa intanshi. (Mat. 6:33; 1 Tim. 5:8) Calyafya ukuba uwashikatala muli ishi “nshita shayafya.” (2 Tim. 3:1) Cinshi cikatwafwa ukucite co?
2 Beni ne Mimwene ya Baibolo: Icebo ca kwa Lesa citusoka ukuti ukusupila ifyuma kuti kwaonaula bumupashi. (Luk. Mil. 5:10; Mat. 13:22; 1 Tim. 6:9, 10) Ino nshita yayafya, kuti caba kayofi kuli ifwe nga twaobelwa sana ne ncito nelyo ukusakamikwa mu fya ndalama ica kuti twapoosa ifya ku mupashi—ukulongana, ukubelenga, no mulimo—ku numa mu mikalile yesu. (Luka 21:34-36) Lelo, Baibolo itufunda ukuti: “Pa kuba ne fya kulya ne fya kufwala, tuteke imitima kuli ifyo fine.”—1 Tim. 6:7, 8.
3 Ici tacilolele mu kuti Abena Kristu bali no kwikala mu bupiina bwa kuilengela fye. Lelo citwafwa ukwishiba ifyo tukabila sana—ifya kulya, ifya kufwala, ne ng’anda ilingene na ku ncende twikala. Nga natukwata ifikabilwa mu mikalile, tatulingile ukuipamfya ukufwaisha imikalile ya pa muulu sana. Lintu tuletontonkanya pa lwa kushita ifintu nelyo ukubombako incito na imbi, tufwile ukuipusha ukuti, ‘Bushe iyi ncito cine cine ilekabilwa?’ Ukucite fyo kukatwafwa ukuumfwila ukufunda kwapuutwamo ukwa kuti: “Imibele yenu ibe iishatemwa ndalama; muteke imitima ku fintu ifyo mukwete.”—Heb. 13:5.
4 Nga twacetekela Yehova, akatwafwa. (Amapi. 3:5, 6) Nangu line tulingile ukubombesha pa kusanga ifyo tukabila cila bushiku, tatoobelwa ne fyo fintu. Nangu tukwete ifinono nelyo ifingi, tucetekela Yehova ukutwikusha mu fyo tukabila. (Fil. 4:11-13) E co, tulaipakisha bukapepa no kuteko mutima na mapaalo yambi.
5 Pashanyeni Icitetekelo ca Bambi: Umufyashi umushimbe uwalekusha umwana wakwe umukashana mu cine alyangwishe imikalile yakwe mu kuya kwa nshita. Nangu line aliipakishe ukwikala bwino mu ng’anda yakwe iikulu, akukiile mu ng’anda inono lyena akukiile mu muputule unono. Ici camulengele ukucefyako inshita alepoosa ku ncito no kulapoosa inshita iikalamba mu butumikishi. Pa numa lintu umwana wakwe umwanakashi akulile no kuupwa, uyu nyina apokele penshoni ninshi talafika na pa mushinku wa kupokelapo penshoni, nangu line ici calengele ukuti indalama shibe shinono. Uyu nkashi yesu nomba ali mu mwaka walenga 7 muli bupainiya bwa nshita yonse kabili tafuluka ifyo ashile pa kuti engabika ifya Bufumu intanshi mu mikalile yakwe.
6 Eluda no mwina mwakwe balibombele umulimo wa bupainiya pa myaka iingi ilyo balekusha abana babo batatu. Ulupwa lonse lwasambilile ukuteke mitima ku fyo balekabila ukucila ukwikusha ifyo balefwaya. Munyina atila: “Twalyangwishe imikalile yesu. Nangu line twalikwete amafya yamo, Yehova lyonse aletupeela ifyo twalekabila. . . . Nga namona ulupwa lwandi lulebalilapo ifya ku mupashi nge fi, ndeshiba ukuti fyonse fili fye bwino, kabili ndayumfwa ukuti nimombako fimo.” Umwina mwakwe na o atila: “Nga namona [abalume bandi] nabobelwa ne fya ku mupashi, ndatemwa icine cine mu mutima.” Abana na bo balasekelela pa kumona ukuti abafyashi babo basalilepo ukubombela Yehova inshita yonse.
7 Bonse abasala inshila sha kuipeelesha kuli bukapepa ukucila ukufwaisha ifikwatwa, Baibolo ibalaya amapaalo yawamisha mu bwikashi bwa nomba no bukesa.—1 Tim. 4:8.