Langeni Bucishinka bwa Bwina Kristu Lintu uwa mu Lupwa Atamfiwa

1. Mibele nshi ingesha bucishinka bwa Mwina Kristu?

¹ Ukwampana kwa ba mu lupwa kuti kwaba ukwapalamisha nga nshi. Ici cileta ubwesho pa Mwina Kristu lintu umwina mwabo, umwana, umufyashi, nelyo lupwa umbi uwapalamisha atamfiwa nelyo aifumya mu cilonganino. (Mat. 10:37) Bushe Abena Kristu ba cishinka bafwile ukubomba shani na lupwa wa musango yu? Bushe ifyo bafwile ukucita kuli yu muntu fifwile ukupusanako nga ca kuti bekala na ulya muntu mu ng’anda? Ica ntanshi, natupituluke mu fyo Baibolo ilanda pali ili lyashi, ifishinte ifibomba ku batamfiwa na ku baifumya mu cilonganino.

2. Ukulingana na Baibolo, Abena Kristu bafwile ukubomba shani na batamfiwa mu cilonganino?

² Ifya Kubomba na Batamfiwa: Icebo ca kwa Lesa cifunda Abena Kristu ukukanabishanya no muntu uwatamfiwa mu cilonganino: “Mwiyampana na muntu uwitwo wa bwananyina, nga abo wa bulalelale, napamo uwa lunkumbwa, napamo uupepo tulubi, napamo uutukana, napamo uukolwo bwalwa, napamo umupupu. Mwiyampana no wabe fi, nangu kulya nankwe. . . . Fumyeni muli imwe bene imbifi iyo.” (1 Kor. 5:11, 13) Amashiwi ya kwa Yesu ayalembwa pali Mateo 18:17 na yo yalicindama: “[Uwatamfiwa] akabe kuli iwe kwati Mwina fyalo kabili umusangushi.” Abaleumfwa Yesu balishibe ukuti abaYuda ba muli shilya nshiku tabalebishanya na Bena fyalo no kuti bapatile abasangushi ukubamona nga bakankambwa. E co Yesu alefunda abakonshi bakwe ukukanabishanya na batamfiwa.—Moneni Ulupungu lwa kwa Kalinda ulwa March 15, 1982, amabuula 16-18.

3, 4. Kubishanya nshi kwabindwa na bantu abatamfiwa na baifumya mu cilonganino?

³ Ici cilepilibula ukuti Abena Kristu ba cishinka tababishanya lwa ku mupashi na uuli onse uwatamfiwa mu cilonganino. Lelo fingi fyasanshiwamo. Icebo ca kwa Lesa cisosa ukuti ‘tatufwile ukulya nankwe.’ (1 Kor. 5:11) E co tatwangala no muntu uwatamfiwa. Ici kuti casanshamo ukukanacite fi, ukuya nankwe mu kukokoloka, ku parte, ukuteya nankwe umupila, nelyo ukuya nankwe ku matuuka nelyo ku cikuulwa ca mangalo nelyo ukuliila capamo nankwe ica kulya pa ng’anda nelyo mu cikuulwa bashitisha ifya kulya.

⁴ Ni shani pa lwa kulanda no watamfiwa? Ilyo Baibolo tailanda pa mibele yonse, 2 Yohane 10 ilatwafwa ukumona ifyo Yehova amone ci: “Ngo muntu aisa kuli imwe, ne sambilisho ili taliletele, mwimupokelela ku mwenu.” Ukulanda pali ci, Ulupungu lwa kwa Kalinda ulwa March 15, 1982, ibula 23, lwatile: “Ukuposha umuntu kuti kwaba e lutampulo lwa kubalilapo mu kutendeka ukulanshanya na mu kutendeka fye bucibusa. Bushe kuti twafwaya ukucita ulo lutampulo lwa kubalilapo ku muntu uwatamfiwa?”

5. Lintu umuntu atamfiwa, finshi alufya?

⁵ Cine cine, caba fye nga fintu ibula 30 ilya Ulupungu lwa kwa Kalinda litila: “Icishinka ca kuti lintu Umwina Kristu awila mu lubembu kabili atamfiwa, alalufya ifintu ifingi: ukwiminina kusuma pa cinso ca kwa Lesa; . . . ukubishanya kusuma na ba bwananyina, ukusanshako no kubishanya na balupwa lwakwe Abena Kristu.”

6. Bushe Umwina Kristu afwile ukuleka ukubishanya umupwilapo na lupwa lwakwe untu bekala ing’anda imo? Londololeni.

⁶ Abekala Ing’anda Imo: Bushe ici cilepilibula ukuti Abena Kristu abekala ing’anda imo na lupwa uwatamfiwa tabafwile ukulanda nankwe, ukulya nankwe, nelyo ukubishanya nankwe ilyo balebomba imilimo ya cila bushiku? Ulupungu lwa kwa Kalinda ulwa April 15, 1991, mu tulembo twa pe samba pe bula 22, lutila: “Nga ca kuti mu cinshingwa ng’anda ca lupwa lwa Bwina Kristu muli umuntu wabo uwatamfiwa, uyo kuti atwalilila ukuba ulubali lwa mibombele ya cinshingwa ng’anda iya lyonse, iya kasuba na kasuba ne milimo.” E co, aba mu lupwa kuti basala ukuti bakulalya nankwe nelyo ukubomba nankwe imilimo ya pa ng’anda. Na lyo line, tabengafwaya bambi ukumona ukuti ifintu tafyaaluka nangu ulya muntu alitamfiwa.

7. Bushe ukubishanya kwa ku mupashi mu ng’anda kwaluka shani ilyo uwa mu lupwa atamfiwa?

⁷ Lelo, Ulupungu lwa kwa Kalinda ulwa March 15, 1982, ibula 27, lulanda pa lwa muntu uwatamfiwa nelyo uwaifumya mu cilonganino ati: “Ukwampana kwa ku mupashi ukwaliko kale kulapwa. E fyo ciba na kuli balupwa lwakwe, ukusanshako na balya ekala nabo ing’anda imo. . . . Ico kuti capilibula ukwaluka mu kubishanya kwa ku mupashi ukwaliko mu ng’anda. Ku ca kumwenako, nga ca kuti umulume natamfiwa, abakashi bakwe na bana tabengatemwa aletungulula isambililo lya Baibolo ilya lupwa nelyo ukutungulula mu kubelenga Baibolo nelyo ipepo. Nga ca kuti alefwaya ukupepa, pamo nga pa kulya, kuti acite co mu ng’anda mu mwakwe. Lelo kuti bapepela mu mutima amapepo yabo kuli Lesa. (Amapi. 28:9; Amalu. 119:145, 146) Ni shani nga ca kuti umuntu uwatamfiwa mu ng’anda alefwaya ukulasangwako lintu ulupwa lulebelengela capamo Baibolo nelyo lintu kuli isambililo lya Baibolo? Bambi kuti bamusuminisha ukusangwako no kukutikako fye nga taeshe ukubasambilisha nelyo ukulandapo ifyakwe ifya mipepele.”

8. Mulimo nshi abafyashi ba Bwina Kristu bakwata pa mwana uwatamfiwa uuleikala mu mwabo?

⁸ Nga ca kuti umwana wa mu ng’anda atamfiwa, abafyashi bakwe aba Bwina Kristu bacili nabakwata umulimo wa kumukusha. Ulupungu lwa kwa Kalinda ulwa November 15, 1988, ibula 20, lutila: “Filya fine bali no kutwalilila ukumupayanishisha ifya kulya, ifya kufwala, no mwa kwikala, bafwile ukumufunda no kumusalapula mu kumfwana ne Cebo ca kwa Lesa. (Amapinda 6:20-22; 29:17) E co abafyashi baba no kutemwa kuti batantika ukutungulula kuli wene Isambililo lya Baibolo ilya pa ng’anda, nangu alitamfiwa. Nalimo ali no kulungikwa ku kusambilila na wene eka. Nelyo kuti basalapo ukuti atwalilile ukulasangwa pe sambililo lya lupwa.”—Moneni na Ulupungu lwa kwa Kalinda ulwa October 1, 2001, amabula 16-17.

9. Ni ku cipimo nshi Umwina Kristu alingile ukubishanya na lupwa watamfiwa uo bashikala ing’anda imo?

⁹ Balupwa Abashili ba mu Ng’anda: Ulupungu lwa kwa Kalinda ulwa April 15, 1988, ibula 28 lutila: “Imibele ilapusanako nga ca kuti uutamfiwe nelyo uwaifumya ni lupwa wa patali nelyo tali wa muli iyo ng’anda. Kuti cacitika ukukanabishanya na ulya lupwa. Nangu kuli imilandu ya lupwa iilekabila ukulanshanya, kuti kwaba ukucefyako ukulanshanya,” mu kumfwana no kufunda kwa kwa Lesa ukwa ‘kukanayampana no muntu’ uushilapila. (1 Kor. 5:11) Abena Kristu ba cishinka bafwile ukutukuta ukukanabishanya na lupwa wa musango yu lintu cishilekabilwa, no kucefyako imibombele yabo nankwe mu fya bukwebo.—Moneni na Ulupungu lwa kwa Kalinda ulwa March 15, 1982, amabula 28-30.

10, 11. Cinshi Umwina Kristu ali no kutontonkanyapo ilyo talaleka lupwa watamfiwa ukubwela pa ng’anda?

¹⁰ Ulupungu lwa kwa Kalinda lulanda pa mibele imbi iingabako: “Ni shani nga ca kuti lupwa wapalamisha, pamo ngo mwana nelyo umufyashi uo mushikala nankwe ing’anda imo, atamfiwa kabili afwaya ukubwela pa ng’anda? Ulupwa kuti lwasalapo ica kucita ukulingana ne mibele. Ku ca kumwenako, umufyashi watamfiwa kuti napamo alwala nelyo alefilwa ukuisakamana mu fya ndalama nelyo lwa ku mubili. Abana ba Bwina Kristu balikwata icishingamo ca kwafwa. (1 Tim. 5:8) . . . Icingacitwa kuti cashintilila pa fintu pamo nga ifyo umufyashi alekabila icine cine, imibele yakwe ne fyo umutwe wa ng’anda wayangwa bumupashi bwa ba mu ng’anda yakwe.”—Ulupungu lwa kwa Kalinda ya March 15, 1982, amabula 27-8.

¹¹ Ulwa mwana, icipande cimo cine cikonkanyapo ukuti: “Inshita shimo abafyashi ba Bwina Kristu balileka umwana uwatamfiwa uulwele lwa ku mubili nelyo lwa mu muntontonkanya ukwisaikala na bo pa kashita. Lelo mu mulandu umo na umo abafyashi kuti bapimununa imibele. Bushe uyu mwana watamfiwa aleikalila, nomba alefilwa ukuikalila? Nelyo bushe alefwaya ukubwelela pa ng’anda pa mulandu wa kuti ubumi kuti bwayanguka? Ni shani pa lwa mibele yakwe? Bushe kuti aleta ‘icitutumushi’ mu ng’anda?—Gal. 5:9.”

12. Busuma nshi bumo ubwaba mu mitantikile ya kutamfya?

¹² Ubusuma bwa Kubela Aba Cishinka Kuli Yehova: Ukukonka ukutantika kwa mu Malembo ukwa kutamfya no kutaluka kuli bakacita wa fibi abashilapila, kusuma. Kusungilila umusangwela wa cilonganino kabili kulanga ukuti tulakonka ifipimo fya pa muulu ifya mibele ya mu Baibolo. (1 Pet. 1:14-16) Kutucingilila ku fikowesha. (Gal. 5:7-9) Na kabili kupeela ulya kacita wa fibi ishuko lya kunonkelamo nga nshi mu kusalapula kwapeelwa, ukwingamwafwa ukulundulula “icisabo ca mutende, ica bulungami.”—Heb. 12:11.

13. Kwaluka nshi ulupwa lumo lwacitile, kabili finshi fyafuminemo?

¹³ Pa numa ya kukutika ku lyashi pa kulongana kwa muputule, munyina wacaice na mpundu munankwe umwanakashi bakutulwike ukuti balekabila ukwaluka mu fyo balebomba na banyina, abali abatamfiwa pa myaka 6. Pa numa fye ya uko kulongana kukalamba, uyu mulumendo atumine lamya banyina, kabili pa numa ya kubeba ukuti alibatemwa, alondolwele ukuti balaleka ukulanda na bo kano nga kuli ifipamfishe. Tapakokwele, banyina batendeke ukusangwa ku kulongana kabili basukile babweshiwa. Na bena mwabo abashali abasumina batendeke ukusambilila kabili balibatishiwe.

14. Mulandu nshi tulingile ukutungilila muli bucishinka ukutantika kwa kutamfya?

¹⁴ Ukukonka muli bucishinka ukutantika kwa kutamfya ukwalondololwa mu Malembo kulanga ifyo twatemwa Yehova kabili kupeela icasuko ku Ulemuseebanya. (Amapi. 27:11) Na ifwe, kuti twacetekela ukuti Yehova akatupaala. Imfumu Davidi yalembele pali Yehova ati: “Ne fipope fyakwe nshatalusha kuli ine; Ku wa [cishinka muli ba cishinka, NW].”—2 Sam. 22:23, 26.